2 Minkte 3 - Kalate Zambe Nnomo a Mfefe Mfefé Nkôñelan

Nlôñane * nda Zambe

¹ Ane Solômon a nga taté na a lôñe Nda Nti e Yérusalém e nkôle Moriya yôp, e vôme Nti a nga yené be David ésaa wé, e vôme David a nga kôm, abôta si Ornan, mone Yébuzieñ ba tya'a nlisi.

² A nga taté melôñ e ngone baa é too melu mebaé e mbu nyini ya njôane wé.

³ E minté mina mmie Solômon a nga nyoñ asu ya lôñe Nda Zambe: Ayap méta mewôm mela, ndam méta awôm.

⁴ Mbala'a si ô nga too ôsu ya Nda ô mbe ndam méta awôm, ane Nda Zambe ébien, ôyabe yôp méta mewôm mesaman. Mbala'a si te mfa'a y'été ô mbe ñyañane nya or.

⁵ A nga dibe beta aba *nda a bilé bi Sipré, a mane fe yañe bie a nya or, a kpwele fe mintemba melen a bengôkop été.

⁶ A nga kôme *nda éte abeñ a meko'o me n'édima. Or be nga belane nye a mbe nyô a so e Parvayim.

⁷ Be nga yañe or ja'ana e mimbôñ, e mimbô'ô ya mimbé, e mimfin, e bivine mimbé ya aba nda; be nga kpwele fe Bekerubim e mimfin.

⁸ A nga bo aba *nda étyi ya bityi, ayap méta awôm ane Nda Zambe ébien, étok méta awôm. Be nga belane tôñe nya or mewôm mebaé asu ya yañ mfa'a y'été.

⁹ Mesene me or be nga belane me me mbe adit tañ begram mintete mitan. To'o na bitune bi *nda ya yôbe fe bi mbe ñyañan a or.

¹⁰ Be nga bo bive'ela Bekerubim bibaé e *nda étyi ya bityi, a yañe fe be a or.

¹¹ Mefabe Bekerubim me mbe ayap méta awôm: Afabe da ya kérubim wua, ayap tañe méta ébaé a étun, é mbe é nambe'e mfine ya Nda; afab avok, méta ébaé a étun, é mbe é nambe'e afabe da ya kérubim mbok;

¹² Afabe da ya kérubim, méta ébaé a étun, é mbe é nambe'e mfine Nda, afab avok, méta ébaé a étun, é mbe é nambe'e afabe kérubim mbok.

¹³ Mefabe Bekerubim bete, éyoñ be ndaméya me, me mbe méta awôm. Be nga tele e mebo map, mesu me lôô mfa'a ya *nda été.

¹⁴ Be nga bo éndelé ya tyelé zañe Nda, é too nyôle blum, évele, angôô, éfumulu. Be nga tiñ Bekerubim été.

Mekône me mvot a ata'a metuna'a

¹⁵ Be nga bo beta mekôn mebaé me too ôyabe yôp, méta awôm a zamgbwa, a telé me ôsu ya Nda Zambe. Ando'o e nga too akôn ese yôp e mbe ôyabe yôp, méta ébaé a étun.

¹⁶ Be nga bo bone bengôkop a futi be e sôso'o beta mekôn, be nga bo bive'ela bibuma begrenadié ntet a tyelé bie e bengôkop.

¹⁷ Be nga telé beta mekôn ôsu ya Nda Zambe, da e mbo nnôm di avok e mbo nga; a nga yôlé di ya mbo nnôme na Yakin, a di ya mbo ngale na Bôaz.