2 Minkte 29 - Kalate Zambe Nnomo a Mfefe Mfefé Nkôñelan

Ezékias, njô bôte ya Yuda

¹ Ezékias a nga tebe njô bôt a too mimbu mewôm mebaé a mitan. A nga jôô tañe mimbu mewôm mebaé a ébu e Yérusalém. Nyia a mbe jôé Abiya, ngone Zakari.

² A nga bo mam me ne *zôsôô e mise me Nti aval ése ésaa wé David a nga bo.

³ E ngon ôsu ya mbu ôsu a nga taté jôô, a nga diine mimbé ya Nda Zambe Nti a kôme mie.

⁴ A nga loone betuni a Belévit, ve sulane be e vôm a mbe ndam mfa'a jôp da tôô,

⁵ a jô be na: Vô'ôla'an a mia Belévit, éyoñe ji tunane miabebien a tunane fe Nda Nti, e Zambe b'ésoo benan, a vaa jôm ése é ne mvin e vôm a n'étyi.

⁶ Amu b'ésaa bangan be nji ke wulu e *zôsôô été; be nga bo e mam me n'abé e mise me Nti, Zambe wongan, be nga li'i nye, be nga vaa mise map e Nda Nti é n'étyi a lume nye mvus.

⁷ Be nga fete mimbé ya Nda Zambe, be nga dime belambe. Be nji ke ve Zambe Israél to'o beôlobinda. To'o mimvean ba di'i ngumba e vôm a n'étyi.

⁸ Ajô te Nti a nga yaa Yuda a Yérusalém. A nga veñesane be be bo jôme ya mate, jôm angôndô, jôm ékpwe'ele avale mi ne nguleya yen a mise menan.

⁹ Ajô te b'ésaa bangan be nga ku a nkpwaté mekôn, a ajô te bobefame bangan a bobebinga bangan a e binga bangan be ne minkôm.

¹⁰ Eyoñe ji me bili nkômbane ya bo élat a Nti, Zambe Israél, nalé ate mbia ayaa wé a ye kôlô be bia.

¹¹ Eyoñe ji a bone bam, te beta biane mam éngbwemese, amu Nti a nga tobe mia na mi tebe ôsu vié a saane nye, na mi bo bebo bisaé bé a ve nye beôlobinda.

¹² Nde Belévit ba be nga kôlô si na be bo ésaé: mfa'a bone be Kehat: Mahat e mone Amasayi; Yôél e mone Azariahu, mfa'a bone be Merari: Kis e mone Abdi, Azariahu e mone Yehaléleél; mfa'a ya bone be Gerson: Yôa e mone Zima; Eden e mone Yôa;

¹³ mfa'a bone be Elisafan: Simri a Yeiél; mfa'a bone b'Asaf: Zakari a Mataniahu;

¹⁴ mfa'a bone be Eman: Yehiél a Simeyi; a mfa'a bone be Yedutun: Semaéya a Uziél

¹⁵ Be nga sulane bobenyañe bap, a éyoñ be maneya tune bebien, be nga zu tune Nda Nti aval'abendé njô bôt é mbe a aval'ane mejô me Nti me mbe.

¹⁶ Betuni be nga nyiin e *nda Nti été mfa'a ya tune je; be nga vaa e biôm bise bi ne mvin be nga koone bie e *nda Nti été a kui minseñe ya Nda Nti, e vôme Belévit be nga nyoñe bie a kee bie atan ôtôñe Sédroñ.

¹⁷ Be nga taté ntunane Nda Nti e *môs ôsu ya ngon ôsu; e môse muame be nga kui *mbé si ya Nda Zambe; ntunan Nda Nti ôbien ô nga tabe fe melu muam, e ngone melu awôm a mesaman nye ésaé ése é nga man.

¹⁸ Ane be nga ke be njô bôt Ezékias a jô nye na: Bi maneya tune Nda Nti ése, ata'a metuna'a mimvean ba di'i ngumba a biôm mebelan bise y'été, e tawôlô ba beté minnoñ mi belet a biôme mebelan bise y'été.

¹⁹ Bi maneya kôm a tune biôm bise njô bôt Akaz, ékotekote jé été, a ndaman étyi éyoñ a nga jôô: bi ne ôsu ata'a metuna'a.

Ezékias a beta kôme mame ya nkañane Zambe

²⁰ Ndibe tyé, njô bôt Ezékias a nga kôlô si a sulane bivete ya tison a bet e Nda Nti.

²¹ Nde be nga kee beyôm benyak zamgbwa, beyôm mintômba zamgbwa, bitoñ mintômba zamgbwa a beyôm bikela zamgbwa asu mimveane ya *njaman abé; be nga ve biôm bite asu *nda njô bôt, *nda é n'étyi a asu ayoñe Yuda. Ane njô bôt a nga jô betuni, bone b'Aron na be ve bie e ata'a metuna'a Nti.

²² Nde betuni be nga tyi'i beyôm benyak, be nyoñe metyi a miame me ata'a metuna'a yôp; be nga tyi'i fe beyôm mintômba a miame metyi y'été ata'a metuna'a yôp; be nga tyi'i bitoñ mintômba a miame metyi y'été ata'a metuna'a yôp.

²³ Be nga zuu fe beyôm bikela asu *njaman abé ôsu be njô bôt a ékôane bôt ése be ve beté mo map e be be.

²⁴ Nde betuni be nga tyi'i be *tyiñ a miame metyi map ata'a metuna'a yôp, asu *njaman abé Israél ase; amu njô bôt a nga jô na, mvean wo di'ibane ngumba a mvean asu *njaman abé bi ne asu Israél ase.

²⁵ Ane a nga telé Belévit e *nda Nti be bili biwoé, memvet a bingombé, aval'ane mebendé me David, Gad ñyene mame njô bôt, a *nkulu mejô Natan me mbe; amu abendé te é mbe di Nti nde a nga kalan anyu bekulu mejô bé.

²⁶ Belévit be nga tebe be bili bibômebômé bi David, a betuni ki be bili metoñ.

²⁷ Ane Ezékias a nga jô na be ve mvean wo di'ibane ngumba ata'a metuna'a yôp. Eyoñe mvean wo di'ibane ngumba wo taté, éyoñe te fe nyiane bia asu Nti ô nga taté a metoñ a bibômebômé bi David njô bôte ya Israél.

²⁸ Ane ékôane bôt ése é nga kute meboñe si, be nga yia jia a loñe metoñ akekui mvean wo di'ibane ngumba ô maneya dik.

²⁹ Eyoñe mvean wo di'ibane ngumba ô maneya veban, njô bôt a bôte bese ba be be be nga too be nga luu mesu si *a kañ.

³⁰ Eyoñe te njô bôt a bivet be nga jô Belévit na be kañe Nti a mejô me David a ma me ñyene mam Asaf; nde be nga kañe nye a mevak be nga vitibi a kute meboñe si.

³¹ Ane Ezékias a nga nyoñe nkobô a jô na: Eyoñe ji, amu mi ntoo ntelan asu Nti, suba'ane bebé, a za'ane *bityi'a, mi ve Nda Nti mimveane ya mvean akéva. Eyoñe te ékôane bôt é nga zuu *bityi'a a ve mimvean asu ékaña'a a ba bese be mbe minlem ékekaé be nga ve mimvean mia di'ibane ngumba.

³² Mimvean mia di'ibane ngumba ékôane bôt é nga soo mie mi mbe: benyak mewôme zamgbwa, beyôm mintômba ntet, bitoñ mintômba mintete mibaé; biôm bite bise bi too asu mimvean mia di'ibane ngumba ba ve Nti.

³³ Be nga beta fe ve benyak mintete misaman, bikela a mintômba toyini éla.

³⁴ Ve betuni be mbe tyôtyoé be nji bo nguleya soé betit ba di'ibane ngumba bikôp; nde bobenyañe bap, Belévit, be nga volô be akekui na ésaé é man, a ke fe kui na betuni bevok be mane tuneban, amu Belévit mbe be nga semé ajô ya tune bebien a dañe betuni.

³⁵ Mimvean ba di'i ngumba mi mbe fo'o abui, ô laté fe mevoñe *bityi'a ya nlatane ngbwa a binyunyui bia tôñe mvean wo di'ibane ngumba. Nalé ate nkañan e Nda Nti ô nga beta teléban.

³⁶ Ezékias a bôte bese be nga vak amu Zambe a nga kôme mam mese asu ayoñ, amu jame te é nga boban atemetem.