2 Minkte 26 - Kalate Zambe Nnomo a Mfefe Mfefé Nkôñelan

Ozias, njô bôte ya Yuda

¹ Ane bôte bese ya Yuda be nga nyoñ Ozias, a too mimbu awôm a misaman, a telé nye njô bôt éjian ésaa wé Amatsia.

² Nye a nga bo na, éyoñ ésaa wé a wuya, a nga beta nyoñe tison Elat a lôñe je mfefé nlôñan.

³ Ozias a nga bili mimbu awôm a misaman éyoñ a nga taté jôô. A nga jôô bôt mimbu mewôm metan a mibaé e Yérusalém. Nyia wé a mbe ngone ya Yérusalém a too jôé na: Yekôlia.

⁴ A nga bo mam me ne mvaé mimfa'a mise, aval ésaa wé Amatsia a nga bo.

⁵ A nga jeñe Zambe melu Zakari a nga vee, amu nye a nga ye'ele nye nkoone Zambe woñ, nté ôse a nga jeñe Nti, Zambe a nga bo na e mame mé me ke ôsu. Ve nkôñelan bi nga nyoñ wo dañe *mvo'é.

⁶ A nga ke wosane Befilisteñ a tyame minka'alé ya Gat, Yabné a Asdôd; a nga lôñe bitison e mefôla ya Asdôd a si Befilisteñ.

⁷ Zambe a nga volô nye a wosane Befilisteñ, Bearabe be nga too Gur-Baal a Bemaonit.

⁸ Beamônite fe be nga ya'an Ozias *toya. Jôé dé e nga wum a kui minné ya Ejipte amu ngule jé é nga dañe dañe bete yôp.

⁹ Ozias a nga lôñ azomezome menda asu benonô e Yérusalém. A nga lôñ ôzomezome *nda wua e *mbé abu'u nka'alé, wu ôvok e *mbé mbi'ili a wu ôvok e vôme mimfine mibaé mia tôban; a a nga bômane azomezome menda te a alem.

¹⁰ A nga lôñ alem e *nkôte si a fa'a abui menjeñ, amu a nga bili abui mimbame biyem éfuse si ba loone Seféla a e minje'ese ya fefele mañ, a nga bili fe besenane si a beba'ale mefube mindik e minkô a e Karmel, amu a mbe a nyeke'e ésaé mefup.

¹¹ Ozias a nga bili nkane bita ô too ngu asu mewosan, ô too nkabane minsamba, aval'ane ésaé élañe bôt e bôte bana be nga bo é mbe: Yeiél ñyeme bekalate Maaséya ngovina a Anania wua ya bivete bezimbi bi njô bôt.

¹² Biwôlô bezimbi bite bi too éjôé bivete menda me bôt toyini ébaé a mintete misaman,

¹³ bi mbe bôte toyini mintete mila a zamgbwa a bôte mintete mitan; be mbe njalan a ngu, nkômesane ya wosane besiñe be njô bôt.

¹⁴ Eyoñ ése ba ke bita, Ozias a mbe a va'a be biben, mekoñ, mefô'ôlô bityé, mengômesane bityé, bilaé a mekô'ô me toloo.

¹⁵ A nga kôme beta beminsini, asu ya telé be azomezome menda benonô, a meku'u mimfin, be volô'ô asu ya wua mekoñe bilaé a beta *mekok. Duma dé e nga ke ôyap, amu a nga bili abui mvolan akekui a yemeteya éjôé jé.

Ozias a nyoñ ôkone Zam

¹⁶ Eyoñ a maneya yemete éjôé jé, nleme wé ô nga bo mebun a kui vôme ya dutu nye na a jañele ényiñe jé. A nji fe wulu ane Nti, e Zambe wé, a yene mvaé; a nga nyiin e Nda Zambe Nti, asu ya ve mimbon mi ne mbamba menyum e ata'a metuna'a beôlobinda yôp.

¹⁷ *ntuni Azariahu a nga nyiine nye mvus a betuni be Nti, bôte mewôme muam,

¹⁸ biwôlô bi bôt, mbe be nga tebe njô bôt Ozias e ngame yat a jô nye na: Sake wo Ozias wo yiane di'i Nti beôlobinda, ve betuni, e bone b'Aron, mbe be nga teléban na be bo ésaé te. Kôlô'ô Nda Zambe amu ô nji bo *zôsôô e mise me Nti, a jame te da ye su'ulan asu duma dôé e mise me Nti.

¹⁹ Nde ôlun ô nga bi Ozias, a tele a bili ésua ba di'i mbon ô ne mbamba menyum e mo. A ngenan a wô'ô betuni ôlun, nde *zam é nga kubu nye asu, betuni be too, e Nda Nti, e fefel ata'a metuna'a beôlobinda.

²⁰ Ane *ntuni nnen Azariahu a betuni bese be nga kôñelane be nye, ateme na *zam é too nye asu. Nde be nga ji'a kuli nye atan, a émiene fe a nga bo avôle ya kui atan, amu Nti a nga bibi nye.

²¹ Njô bôt Ozias a mbe nkôkone *zam a kui e *môs a nga wu, a a nga tabe e ngume *nda ane nzezam, amu be nga kuli nye atane ya Nda Nti. E mone wé Yôtam a mbe njôô ya *nda njô bôt, a jô'ô fe bôte be nga too si ya Yuda.

²² Mimboon mi Ozias mivok mi ya atata'a a mi mia su'ulan, *nkulu mejô Ezayi, e mone Amots, a nga tili mie.

²³ Ane Ozias a nga bômbô vôme wua ba b'ésaa, be nga jame nye ba b'ésaa afube mesoñe bejô bôt: amu be mbe be jô'ô na: A ne nzezam. Ane Yôtam, e mone wé a nga jôô éjiane jé.