2 Minkte 25 - Kalate Zambe Nnomo a Mfefe Mfefé Nkôñelan

Amatsia, njô bôte ya Yuda

¹ Amatsia a nga tebe njô bôt a too mimbu mewôm mebaé a mitan, a nga jôô mimbu ébu e Yérusalém. Nyia wé a mbe a too Yérusalém jôé na Yôadan.

² A nga bo mam me ne *zôsôô e mise me Nti, ve nleme wé ô mbe nkaban.

³ Eyoñ éjôé é nga bo ngu e mo méé, nde a nga wôé bebo bisaé bé be nga wôé njô bôt ésaa wé.

⁴ Ve a nji ke wôé e bone bap, amu a nga bo ane e ne ntilan e metiñ été, e kalate Môze, vôme Nti a ve abendé di na: B'ésaa ba ye bo te wu ajô ya *bon, a *bon ba ye bo te wu ajô b'ésaa, ve môt ase a ye wu ajô ya *abé dé.

⁵ Ane Amatsia a nga sulane bôte ya Yuda a telé be ane menda b'ésaa me né, bivete betoyini a bivete mintet asu Yuda ase a Bényamin; a nga bo élañe bôt ataté mimbu mewôm mebaé, a lôte valé, a nga yene mintobane mi bôt toyini mintete mila be too nguleya ke wosan, be yeme belan akoñ a ében.

⁶ A nga nyoñe fe biwôlô mimben toyini ntet, Israél été, a yaka'ane be a mfe'e wé tañe betalañ be argent ntet.

⁷ Nde môta Zambe éziñ a nga zu jô nye na: A njô bôt, nkane bita y'Israél ô bo'o te wulu a wo amu Nti a nji bo be Israél a e be bone b'Efrayim bana bese.

⁸ Nge mia be be mia ke, to'o na ô ne éwôlô e mewosan, Zambe a ye fô'ô wo ôsu besiñ, amu Zambe a bili nguleya volô, a bili fe nguleya bo na môt a tôbane njuk.

⁹ Ane Amatsia a nga jô môta Zambe na: Me bo aya mfa'a betalañ be argent ntet me veya nsamba Israél? Môta Zambe a nga yalane na: Nti a ne nguleya ve wo a dañ abime te.

¹⁰ Eyoñe te Amatsia a nga kandane minsamba mi bôt mi nga so nye Efrayim, na mi bulan e male map. Ve be nga yaa Yuda mbia ñyaan, nde be nga bulane male map be wô'ô mbia ôlun.

¹¹ Ane Amatsia a nga yemete ngule jé a jôô bôt. A nga ke e mbi'ili nku a bôé toyini bôt awôme ya bone be Séyir.

¹² Bone be Yuda be nga nyoñe toyini bôt awôm ya be be, a kee be abôbôn akôme yôp. Nde be nga sô'ôlô be be bete abôbôn akôme wé, nde bese be nga mane fiti.

¹³ Ve da, bôte ya nsamba Amatsia a nga titane na ba be be be bo te ke bita be nga mialan e bitisone ya Yuda, ataté Samari a kui Bétôroñ. Be nga wôé bôt toyini éla a ndamane biôm abui.

Yôas, njô bôte ya Israél a bôé Amatsia

¹⁴ Eyoñ Amatsia a nga bulan a kooé na a maneya dañe bôte ya Edom, ane a nga soo bezambe y'Edom a nyoñe be ane bezambe bé; a nga kute be meboñe si a di'i be beôlobinda.

¹⁵ Eyoñe te ayaa Zambe e nga yôñe Amatsia nyô, a a nga lôme *nkulu mejô be nye a jô nye na: Amu jé ô nga beta ke nyoñe bezambe ya ayoñe bôte te éyoñ be nji kui na be nyii bôte bap e mo môé'

¹⁶ A ngenan a kobô'ô nde Amatsia a jô nye na: Ye bi nga telé wo ô bo môt a ve njô bôte mefek? Suku'u valé! Amu jé wo kômbô na be bôme wo? Nde *nkulu mejô a nga mane nkobô a jô'ô na: Ma yeme na Zambe a tyi'iya na a ye jiane wo, amu wo te bo jame te a amu ô nji kômbô wô'ô melebe mam.

¹⁷ Eyoñ a maneya bo ékôan, Amatsia, njô bôte ya Yuda, a nga lôme bôt be kate Yôas, e mone Yoakaz, e mone Yéhu, njô bôte y'Israél na: Za'ak, bia wo bia ye tômetan!

¹⁸ Eyoñe te Yôas, njô bôte ya Israél nye fe a lôme bôt be kate Amatsia njô bôte ya Yuda na: Ndôé ya Libañ é nga lôme sédre ya Libañ tyiñe na: Va'a mone wom ngo jôé a lu'u je! Ve betite ya fé be ne Libañ be nga lôt a mane tibi ndôé.

¹⁹ Ô nga bôé b'Edomite, nalé wo jô, ajô nleme wôé wo bo mebun a wo ve womiene duma. Eyoñe ji tabe'e ñhe si jale dôé. Amu jé wo kômbô futi womien e jam da su'ulane wo *abé? Wo ye ku mia Yuda nsamba.

²⁰ Ve Amatsia a nji wô'ô nye, amu jame te e nga so be Zambe, nalé ba ye veban e mo besiñ. Amu be nga ke nyoñe bezambe y'Edom.

²¹ Ane Yôas, njô bôte y'Israél a nga bet; nde be nga tômetan ba Amatsia, njô bôte ya Yuda e Bétsemék ya Yuda.

²² Ane Israél a nga bôme Yuda, a môt ase a nga tup e *nda éndelé jé.

²³ Yôas njô bôte ya Israél, a nga bi Amatsia, njô bôte ya Yuda, e mone Yôas, e mone Yoakaz mbôk e Bétsemék. A nga kee nye e Yérusalém, nde a nga sale mfine ya Yérusalém tañe méta mintete mibaé, ataté *mbé y'Efrayim, a kui *mbé ya Akot.

²⁴ A nga nyoñe or ase a argent a biôm bise bi nga too e Nda Zambe, e *nda Obéd-Edom, a mefo'o mese ya *nda njô bôt; a nga bi fe minkôm a bulane Samari.

²⁵ Amatsia e mone Yôas, njô bôte ya Yuda, a nga nyiñ mimbu awôm a mitan mvus awu Yôas e mone Yoakaz, njô bôte ya Israél.

²⁶ Mimboon mi Amatsia mivok, mi ya atata'a a mi ya asu'ulan, mi ne ntilan e kalate bejô bôte ya Yuda a Israél.

²⁷ Eyoñ Amatsia a li'iya Nti, be nga bôndé fe'e ya wôé nye Yérusalém, nde a nga tup a ke Lakis; ve be nga tôñe nye Lakis e vôm be nga wôé nye.

²⁸ Be nga be'e nye e bikabela yôp a jame nye ba b'ésaa e tisone ya Yuda.