2 Minkte 23 - Kalate Zambe Nnomo a Mfefe Mfefé Nkôñelan

Ba telé Yôas njô bôt

¹ Mbu zamgbwale, Yehôyada a nga tyi'i na a nyoñe bivete mintet: Azariahu e mone Yeroham, Yismaél e mone Yéhôhanan, Azariahu e mone Obéd, Maséyahu e mone Adayahu, Elisafat e mone Zikri na be bo élat a nye.

² Ane be nga wulu e Yuda a sulane Belévit ya bitisone bise e Yuda a bivete *meyoñ ya Israél, nde be nga bulan e Yérusalém.

³ Ane ékôane bôt ése é nga bo élat a njô bôt e Nda Zambe été. Yehôyada a nga jô be na: E mone njô bôt nye nyô. A yiane jôô aval'ane Nti a nga jô ajô bone be David.

⁴ Mia ye bo avale di: Ngabe lale ya be mia, betuni a Belévit mia bo ésaé môse Sabat, e menyiin, mia ye bo beba'ale mimbé,

⁵ ngabe lale fok ja ye tabe e *nda njô bôt a nyô fok e *mbé ya mbôka'a; bôte bese ba ye tabe e minseñe ya Nda Nti.

⁶ Môt éziñ a bo'o te nyiin e Nda Nti, veñgeveñge ve betuni a Belévit ba bo ésaé *môs ôte: mbe be ne nguleya nyiin amu be ne ntelane ya bo ésaé. E bôte bese ba ye bo nsamba beba'ale Nti.

⁷ Belévit ba ye bômane njô bôt njiñelete, môt ase a bili mengale mo; môt ase a ye kômbô nyiin e Nda Nti ba ye wôé nye; mia be njô bôt bo'one nsamba e vôm ase a ke.

⁸ Ane Belévit a Yuda ase be nga bo avale *ntuni Yehoyada a nga jô. Be nga nyoñ, môt ase, e bôte bé, ba be nga yiane nyiin ésaé môse Sabat a ba be nga kôlô ésaé, amu *ntuni Yehôyada a nji ke suu minsamba mi mbe ésaé.

⁹ A nga ve bivete mintet mekoñ a mevale biben bi njô bôt David bi nga too e *nda Zambe.

¹⁰ A nga telé bôte bese, môt ase a bili akoñe dé mo, ataté aku'u *nda ya mbo nnôm a kui aku'u ya mbo nga, bebé ata'a metuna'a ya Nda Zambe, asu ya bômane njô bôt.

¹¹ Nde be nga kuli e mone njô bôt atan, be jalé nye kuron a mendem me njô bôt: ane be nga telé nye njô bôt. Yehôyada a bone bé be nga wo'o nye mbon a yôtane na: Enyiñe njô bôt é bo'o ayap!

¹² Eyoñ Atali a nga wô'ô zô'é bôt be nga mate mimbi a nyoñe njô bôt a mevak, ane a nga ke mfa'a bôt be mbe e Nda Nti.

¹³ Nde a nga fombô a yene na njô bôt a tele e vôme wé a yiane tebe yôp anyiine ya Nda; bivet a beloñe metoñ be tele e fefele njô bôt; bôte bese be mbe meva'a été, metoñ me kobô'ô; beyeme mezik be bômôk biôme biap, be wulu'u fe mam mese ya mevak. Nde Atali a nga nyabe mengômesane mé a yône na: Njoñ! njoñ!

¹⁴ Ane *ntuni Yehôyada a nga kuli bivete mintet atan mbie bi nga jôô nkane bita a jô bie na: Kelane nye atan, atane ya nka'alé! Môt ase a ye tôñe nye a ye wu a nkpwaté mekôn! Amu *ntuni a nga jô na: Mia ye bo te wôé nye e Nda Nti.

¹⁵ Ane be nga bi Atali, a kee nye mfa'a ya *nda njô bôt, éyoñ a nga kui *mbé bikabela, be nga wôé nye valé.

¹⁶ Ane Yehôyada a nga bo élat e zañe jé émien, bôte bese a njô bôt, asu ya na be bo ayoñe bôte Nti.

¹⁷ Ane bôte bese be nga ke e *nda baal, be mane tyame je, be mane bu'u meta'a metuna'a a bive'ela'a bié a wôé fe Matan, *ntuni baal, ôsu meta'a metuna'a.

¹⁸ Yehôyada a nga kalane mba'alane ya Nda Nti e mo betuni a Belévit. David a nga kabe be minsamba e Nda Nti asu ya ve Nti mimvean mia di'ibane ngumba, avale e ne ntilane kalate metiñ me Môze, e meva'a été a e bia été, avale David a nga ye'ele.

¹⁹ A nga telé beba'ale mimbé ya Nda Nti, nalé jôm é ne te *mfuban ja ye bo te nyiin a *zen éziñ.

²⁰ Ane Yehôyada a nga nyoñe bivete mintet, benya bôtô, e ba be nga bili éjôé be bôt, a bôte bese; a nga bo na njô bôt a sis a kôlô Nda Nti, be nga tyii *mbé ya yôp a nyiin e *nda njô bôt, nde be nga tooé njô bôt éto njôane yôp.

²¹ Bôte bese be nga vak a tison é mbe ne mieññ. Ve be nga wôé Atali a nkpwaté mekôn.