2 Minkte 21 - Kalate Zambe Nnomo a Mfefe Mfefé Nkôñelan

¹ Ane Yôzafat ba b'ésaa be nga bômbô, a nga jambe ba b'ésaa, e tisone David. Ane mone wé Yôram a nga jôô éjiane jé.

Yoram, njô bôte ya Yuda

² Yôram a nga bili bobenyañ, bone be Yôzafat: Azaria, Yehiel, Zakari, Azariahu, Mikaél a Sefatiahu, bese bone be Yôzafat, njô bôte ya Israél.

³ Esaa wop a nga ve be beta be biôm bi too mboon a argent, a or, nalé fe bitisone ya Yuda bi bili alem; v'a nga li'i éjôé e mo me Yôram, amu a mbe ntôl.

⁴ Eyoñe Yôram a tabeya éto njôan ésaa wé, a a yemeteya je, nde a nga wôé bobenyañ bese a bivete biziñe ya Israél a nkpwaté mekôn.

⁵ Yôram a nga bili mimbu mewôm mela a mibaé éyoñ a nga tebe njô bôt, a a nga jôô mimbu muam e Yérusalém.

⁶ A nga wulu e zene bejô bôte ya Israél, avale *nda Akab é nga bo, a a nga bo mam me n'abé e mise me Nti.

⁷ Ve Nti a nji ke kômbô jiane *nda bôte David amu élat a nga bo a David, amu a nga tiñeti na éto njô bôt ja ye bo te kôlô be nye a bone bé.

⁸ Melu a nga jôô, Edom a nga ben éjôé Yuda, a tobe njô bôte wé.

⁹ Ane Yôram a nga ke a bivete bié a bevagoñe bé bese; a nga kôlô si a alu, a bôé Beédomite be nga bômane nye a bivete bevagoñ.

¹⁰ Mbenan Edom a nga ben éjôé Yuda ô nga tabe a kui môse wu. Libna fe a nga ben éjôé Yôram melu mete, amu a nga li'i Nti, Zambe b'ésaa bé.

¹¹ Yôram a nga bo bito ya bikôndô'ô yôp e minkôle mi Yuda; a nga tindi bôt be too Yérusalém na be bo ébamba a soñe fe Yuda a bo avale te.

¹² Ane a nga nyoñe ntilan ô so'o be *nkulu mejô Elie na: Amu ô nji wulu mezene m'ésoo Yôzafat, a ma m'Asa, njô bôte ya Yuda,

¹³ ve viane wulu e zene bejô bôte ya Israél, amu ô nga dutu Yuda a bôte be too Yérusalém na be bo ébamba avale *nda Akab é nga bo a amu ô nga wôé to'o na bobenyoñ, *nda bôt ésoo, mbe be mbe *mvo'é a dañe wo.

¹⁴ Ajô te Nti a ye zuu beta ébubua e be bôte bôé, bone bôé, binga bôé a akume dôé ése;

¹⁵ a a ye bibi womien a mbia b'akon, ôkone ya *miñya miôé, ñwô wo ye yaé *môs ane *môs, akekui *miñya mia ye vam atan amu ngule ya ôkon.

¹⁶ Ane Nti a nga vele nsisime Befilisteñ a Bearabe be mbe bebé a bôte ya Kus ôyo na be wosane Yôram.

¹⁷ Nde be nga bet a wosane Yuda, be nga kui ôban été, be mane be'e akum ése e nga too *nda njô bôt, ô laté a bone bé a e binga bé, mone mfe a nji li'i nye ve Yôakaz, e mone wé a nga dañe mongô.

¹⁸ Eyoñe mam mete me maneya, ane Nti a nga bibi Yôram a ôkone *miñya ô ne te k'ayeté.

¹⁹ Okone te ô nga yaé *môs ane môs; amané mbu baa y'ôkon, ñwô *miñya mi Yôram mi nga taté vam atan amu ngule ya ôkone vié. A nga wu e mbia mintaé été. E bôte bé be nji di'i beôlobinda asu duma dé, avale be nga bo asu b'ésaa bé.

²⁰ A nga bili mimbu mewôm mela a mibaé éyoñ a nga tebe njôô. A nga jôô mimbu muam e Yérusalém. A nga ke teke môt a nyamete nye, a be nga jame nye e tisone David, ve sa ñhe mesoñ bejô bôt.