2 Minkte 20 - Kalate Zambe Nnomo a Mfefe Mfefé Nkôñelan

Yôzafat a dañe Bemôabit a Beamônit

¹ Melu me lôteya, ane bone be Môab, bone b'Amon ba be Maônite nsamba wua, be nga zu wosane Yôzafat.

² Nde be nga zu kate Yôzafat foé be jô'ô na: Ézu'u bôt ja zu wosane wo be so'ok e kindi'i mañe ya yat, ataté Siri, a be ne e Atsatson-Tamar, nalé a ne na: Eyin-Gédi.

³ Ane Yôzafat a nga ko woñ a tyi'i na a sili nkômbane Nti. A nga telé *ntyiane bidi asu Yuda ase.

⁴ Nde Yuda a nga sulane na be jeñe Nti.

⁵ Ane Yôzafat a nga tebe tetele ézezañ ékôane bôte ya Yuda a Yérusalém, e *nda Nti, ôsu ya mfefé nseñ.

⁶ Nye na: A Nti, Zambe b'ésaa bangan, ye ô nji bo Zambe e yôp a ye sa wo ô koo bijôé bise ya *meyoñ e nlô yôp? Ye ngu a éwolo bi nji bo e wo wôé été? Ajô te nde môt éziñ a se nguleya dôñgane wo!

⁷ Ye sa wo, e Zambe wongan, ô nga titane bôt be nga too *si nyô ôsu ya ayoñe bôte dôé Israél, a ve je nnôm éto e be mvoñ bôt Abraham a mbe a nyeke'e wo'

⁸ Be nga tab'été a lôñe *nda asu jôé dôé be jô'ô na:

⁹ Nge mbia jam a kui be bia: nkpwaté mekôn, ayaa, bim nge mfumbale zaé, bia ye tebe ôsu ya *nda éte a ôsu viôé amu jôé dôé e ne *nda nyôna été. Bia ye loone wo ô volô ôlune viangan été: wo ye wôk a nyii bia!

¹⁰ Tame yen éyoñe ji ane Beamônite a Bemôabite a ba be too minkôle ya Séyir, mbe ô nji kañese na Israél a nyiine si jap éyoñ be nga so si y'Ejipte, amu a nga sa'ale be a bo te bôé be,

¹¹ mbe bana ba ya'ane bia éyoñ ba titane bia e si ô nga ve bia.

¹² A Zambe wongan, ye wo ye bo te liti mintyi'ane mejô miôé be be? Amu bi ne teke ngu, ôsu ézu'u bôt ja zu wosane bia ji, a bi nji yeme jam bi bo, ve mise mangan me lôô ve wo.

¹³ Yuda ase a nga tele tetele asu be Nti, to'o na ba be bendaé bap, binga bap a bone bap.

¹⁴ Ezezañ ékôane bôt, nde Nsisime Zambe ô nga bi Yahaziél e mone Zakari, e mone Benaya, e mone Yeiél, e mone Matania, mone Lévite ya bone b'Asaf.

¹⁵ Nde Yahaziél a nga jô na: Vô'ôla'an, Yuda ase a e bôt be too Yérusalém, nalé fe wo njô bôte Yôzafat! Avale di nde Nti a kobô: te koone woñ nge fô'ôban ôsu ya ézu'u bôte ji, amu bita bite bi nji bo émbienan, ve bi bi Zambe.

¹⁶ A akiti, sisan a wosane be; ba ye so abete ya Atsis, a mia ye koone be mbi'ili yat, *zôsôô a *nkôte si ya Yeruél.

¹⁷ Mia ye ke wosane valé: lita'ane mia bebien, teba'ane valé a mia ye yene nyiane Nti ô ne asu denan. A Yuda a Yérusalém, te koone woñ nge fô'ôban: a akiti, kuan atan mi ke tôbane be a Nti a ye tabe be mia!

¹⁸ Ane Yôzafat a nga vitibi asu é butu si, nde Yuda ase a e bôt be too Yérusalém be nga ku si asu be Nti na be kañe nye.

¹⁹ Ane Belévit ya bone be Kehat a ba be bone be Koré, be nga kôlô si a kañe Nti e Zambe Israél, be bete'e tyiñe ngu a ôyabe yôp.

²⁰ Be nga kune kôlô si a kui atan a ke mfa'a *nkôte si ya Tekôa. Eyoñ be nga kui, Yôzafat a nga tebe a jô na: Vô'ôla'ane ma, a Yuda a e bôt be too Yérusalém! Yemane ngu, e ndi jenan mi bili Nti, e Zambe wônan, éyoñe te mia ye vebane ngu e mewosane menan été. Yemane ngu e ndi mi bili bekulu mejô bé éyoñe te mia ye dañ.

²¹ Wôna ba be bôt be nga bo émo'o, nde a nga telé bôt ba yia Nti bia, be bete'e metyiñ *a kañ be be'e mengômesan me n'étyi. Eyoñ be nga tebe ôsu ya nkane bita, be mbe be jô'ô na: Kañane Nti, amu mvame jé é too nnôm éto!

²² Eyoñ be nga taté na ba loñ ayenga a yia bia, nde Nti a nga telé bôte ya té metyama'an e be bone b'Amon, Môab a e bôt be too minkôle ya Séyir mbe be nga zu be Yuda na be wosane nye, nde be nga wôane zañe jap.

²³ Ane bone b'Amon a ba be Môab be nga kôlô si a wosane bôt be too minkôle ya Séyir na be bôé be a jiane be. Eyoñ be maneya a bôte ya Séyir, nde be nga taté na ba wôan e zañe jabe bebien.

²⁴ Eyoñe bôte ya Yuda be nga kui e vôm ba yene *nkôte si, be nga kôñelan mfa'a ézu'u bôt é mbe, nde ba yene ve mimbim bi bôô si; teke môt a nga fam awu.

²⁵ Nde Yôzafat a bôte bé be nga ke sa mimbime miap, be nga koon abui akum, mimbim a biôm bi n'édima. Be nga vaa abui biôm, ve be nji bo nguleya kee bie bise. Be nga nyoñ melu mela asu ya sa akum, amu e mbe abui.

²⁶ E môse nyini, be nga sulan e mbi'ili Beraka, vôm ate nye be nga botane Nti; ajô te be nga loone vôm ate na, mbi'ili Beraka a kui môse wu.

²⁷ Ane bôte bese ya Yuda a Yérusalém be nga bulane Yérusalém a meva'a mese, Yôzafat a tele be ôsu, amu Nti a nga jalé be a mevak, éyoñ a nga liti besiñe babe njuk.

²⁸ Be nga nyiin e Yérusalém a memvet, bingombé a metoñ, a kui e *nda Nti.

²⁹ Nde nkoone Nti woñ ô nga bi bijôé bise ya mesi mevok, éyoñ be nga wô'ô na Nti a nga wosane besiñ b'Israél.

³⁰ Ane si Yôzafat a nga jôô é nga tabe *mvo'é ne mieññ, a e Zambe wé a nga ve nye awo'on meku'u mese.

Amané ya njôane Yôzafat

³¹ Yôzafat a nga jôô Yuda. A nga bili mimbu mewôm mela a mitan éyoñ a nga taté jôô, a nga jôô mimbu mewôm mebaé a mitan e Yérusalém. Nyia wé a mbe jôé na Azuba, ngone Sili.

³² A nga wulu e *zen ésaa wé Asa, teke kôlô été, a bo'o ve mam me ne mvaé e mise me Nti.

³³ Ve da na bito ya bikôndô'ô yôp bi nji ke vas: Valé minlem mi bôt mi ngenane teke dañe kabetan a Zambe ya b'ésaa bap.

³⁴ Mimboon mi Yôzafat mivok, mi ya atata'a a mi mia su'ulan, mi ne ntilan e kalate mimboon mi Yéhu, e mone Anani, a e mmie mi ne nyiñelan e kalate bejô bôt.

³⁵ Eyoñe mam mete me maneya, Yôzafat, njô bôte ya Yuda, a nga lat a njô bôte ya Israél jôé na Akazia, nye ate ntabane wé ô mbe angôndô ya *abé.

³⁶ Ba nye be nga lat asu ya kôme besitima be nga yiane ke Tarsis; be nga kôme besitima bete e Etsion-Géber.

³⁷ Eyoñe te Eliézer, e mone Dodayahu ya Maréka a nga kulu mbia mejô ajô Yôzafat a jô na: Amu ô nga lat a Akazia, ajô te Nti a ye tyam ésaé jôé. Besitima be nga bôlé a be nji bo nguleya ke Tarsis.