2 Minkte 2 - Kalate Zambe Nnomo a Mfefe Mfefé Nkôñelan

¹ Ane Solômon a nga lañe bôte toyini mewôme zamgbwa asu mbe'ane mimbe'e, beba *mekok, e minkô, bôte toyini mewôme muam a bôte toyini éla a mintete misamane ya fombô ésaé ba bo.

² Solômon a nga lôme bôt be kate Uram, njô bôte ya Tir na: Bo'o ma avale fe ô nga bo David ésaa wom na ô nga lôme nye besédre asu ya lôñe *nda ya tabe.

³ Tame yene na ma, e mone wé, ma zu lôñe *nda, asu jôé Nti, e Zambe wom, a telé je étyi asu dé, asu ya di'i ôlobinda a ne mbamba menyum ôsu vié, asu ya liti minnoñ mi belet éyoñ ése, a mimvean ba di'i ngumba, mametyé a mamengô'é, a besabat, e meté me ngon a éyoñe ya beta mebô'ô me Nti, e Zambe wongan, aval'ane Israél a yiane bo jame te melu mese.

⁴ Nda ma zu lôñ ja yiane bo anen, amu Zambe wongan a ne anen a dañe bezambe bese.

⁵ Ve za a bili nguleya lôñe nye *nda, amu na yôp a yôbe ya môp é se nguleya yiane nye? A me nga ye bo za asu ya lôñe nye *nda nge é nji ye bo asu ya di'i biôm bi ne mbamba menyum ôsu vié'

⁶ Eyoñe ji lôme ma e môt a yeme bo ésaé or, argent, mvot a étyé, nalé fe nyô a yeme dube biyé évele, angôô nge blum, a yeme fe kpwele biôm. Ba be bôte bam ba ye saé, e ba ésaa wom David a nga top, mbe be too Yérusalém nge mevôm mefe e si ya Yuda été.

⁷ Lôme fe ma bilé bi sédre, sipré a santal, bi so'ok e Libañ, amu ma yeme na bebo bisaé bôé ba yeme tyi'i bilé ya Libañ, a bebo bisaé bam ba be émbôé ba ye ke,

⁸ asu ya kôme ma abui bilé, amu e Nda ma zu lôñ ja ye bo anen a abeñ.

⁹ Mfa'a wom, ma ye ve bebo bisaé bôé ba tyi'i bilé, fôn, tône toyini ésaman, nlisi tône toyini ésaman, woon lita toyini mintete muam a belita be mbon toyini mintete muam.

¹⁰ Ane Uram, njô bôte ya Tir, a nga yalan e kalate a nga lôme Solômon été na: Amu Nti *a yem ayoñe bôte dé nde a nga telé wo na ô jôô be.

¹¹ Uram a nga beta fe jô na: Nti, Zambe ya Israél, a bo'o ébotan, Nyô a nga té yôb a si, amu a nga ve njô bôte David mfefe'e mon, Nyô a yeme fase mam a too fe atyeñ, nyô a zu lôñe Nti *nda, a lôñe fe ndaa njô bôt asu dé!

¹² Eyoñe ji, ma lôme wo ntyetyeñe môt wo yeme fas,

¹³ Uram-Abi, e mone minga ya bengone be Dañ, ésaa a too mone Tirieñ. A yem ésaé or, argent, mvot a étyé, akok a bilé, bindelé bi ne nduban évele a blum, bindelé bi bisus a Karmin. A yem ésaé nkpwelane biôm a mboone biôm bise ba ye ve nye na a bo, ba be mintyetyeñ mi bôte bôé a mintyetyeñ mi bôt Esaa wom David, ésoo.

¹⁴ Eyoñe ji, e Nti wom a lôme bebo bisaé bé avut, nlisi, mbon a woon wo te jô bie.

¹⁵ Mfa'a wongan bia ye tyi'i bilé ya Libañ abim ese wo ye kômbô; bia ye lôme wo bie e mañe mañ a kui e Yafa, éyoñe te wo ye bo na bi bet a kui e Yérusalém.

¹⁶ Ane Solômon a nga lañe mintabe mise mi mbe si ya Israél été, avale David ésaa wé a nga lañe mie. Be nga koone mi too toyini ntet, mewôm metan a éla a mintet misaman.

¹⁷ A nga nyoñe toyini mewôme zamgbwa asu ya be'e mimbe'e, toyini mewôme muam ane beba *mekok e nkôle yôp, a bôte toyini éla a mintete misaman asu ya fombô a tindi bôte na be saé.