2 Minkte 19 - Kalate Zambe Nnomo a Mfefe Mfefé Nkôñelan

Nkulu mejô Yéhu a wosan élate Yôzafat ba Akab

¹ Ane Yôzafat, njô bôte ya Yuda, a nga bulane *mvo'é e *nda jé Yérusalém.

² Nde Yéhu, e mone ñyene mam Anani, a nga ke tôbane nye. A nga jô njô bôte Yôzafat na: Ye ba yiane volô mbo *abé, a ye wo nye'e ba ba vini Nti? Amu nalé, Nti a wô'ô wo *abé.

³ Ve mbamba be mam be ne be wo, amu ô nga vose mekône m'Akéra e si a ô nga ve nleme wôé mfa'a ya jeñe Zambe.

Yôzafat a telé betyi'i mejô

⁴ Ane Yôzafat a nga tabe e Yérusalém, nde a nga beta ke a wulu e be bôte ya ayoñ, ataté Birséba a kui e minkôle mi Efrayim, nde a nga bo na be bulan e be Nti, Zambe b'ésaa bap.

⁵ A nga telé betyi'i mejô e bitisone bise ya si ya Yuda bi nga bili alem, e tison ése.

⁶ A nga jô betyi'i mejô na: Taba'ane ntyel mfa'a jam mia ye bo amu mia ye ke be tyi'i mejô asu bôt, v'asu Nti nye a ye tabe be mia éyoñ mia kobô mejô.

⁷ Eyoñe ji nkoone Nti woñ ô tabe'e be mia; taba'ane ntyel éyoñ mia ye bo mam, amu mvô, nsemane mingumba mi bôt a nyoñan éboteze, bi nji bo e be Nti e Zambe wongan.

⁸ Avale te fe, mbulane ya Yérusalém, Yôzafat a nga telé Belévit, betuni a bivete menda me bôte ya Israél asu ntyi'ane mejô Nti a asu mejô bôt ba sôane ntyi'an.

⁹ A nga bendé be na: Mia ye bo avale di e nkoone Nti woñ été, *zôsôô a e *nlem ô nji bo nkaban.

¹⁰ Ajô ese e bobenyoñ be too bitisone biap ba ye liti mia e fombô'ô mewôé me môt, ntyamane metiñ, mebendé, memvinda a minjôan, mia ye ve be ayemé, nalé ba ye bo te vebane mekua be Nti a ayaa Nti e bo te kui be mia a bobenyoñe benan. Avale te nde mia ye bo, nalé ate mia ye bo te be'e mekua.

¹¹ Mi lôô Amaryyahu, *ntuni nnen, a ne mia évet mfa'a ya mam me Nti mese, wôna Zebadiahu e mone Ismaél, ngovina ya *nda Yuda, asu mam me njô bôt mese, a mi bili Belévit ôsu vienan ane bivet. Ajô te yemane ngu a bo ane befam, a Nti émien a tabe'e be nyô a ye bo mvaé.