2 Minkte 16 - Kalate Zambe Nnomo a Mfefe Mfefé Nkôñelan

Asa a wosane njô bôte ya Israél

¹ E mbu mewôm mela a samane Asa a nga jôô, Béka, njô bôte ya Israél, a nga zu té si ya Yuda bita *môs éziñ. Ane a nga lôñe Rama na a ndeñele e bôte b'Asa, njô bôte ya Yuda na be bo te kui atan nge nyiin été.

² Nde Asa a nga kuli argent a or bi mbe akume ya *nda Nti a nyô njô bôt atan; wôna a nga lôme bôt be kate Ben-Adad, njô bôte ya Siri a nga too Damas na:

³ Ma yi na élat é bo e zañe jañgan, avale fe é nga too e zañe ésaa wom a ésoo. Ô lôô ma lôme wo argent a or. Kelek a tyam élate mia Béka, nalé a ye ke ma ôyap.

⁴ Ane njô bôte Ben-Adad a nga wô'ô njô bôt Asa; a nga lôme bivete bezimbi bé bi ke wosane bitisone ya Israél. Be nga bôé Iyôn, Dan, Abél Mayim a binaan akum bi ne e bitisone ya Néftali.

⁵ Eyoñe Béka a nga wô'ô jame te, a nga jô'é nlôñane Rama a telé bisaé.

⁶ Ane njô bôt Asa a nga belane Yuda ase na be be'e *mekok a bilé Béka a nga belane bie asu melôñe ya Rama, wôna a nga belane bie asu ya lôñe Yéba a Mispa.

⁷ Melu mete ñyene mam Anani a nga ke be njô bôt Asa a jô nye na: Amu ô nga ye'ebe e be njô bôte ya Siri, teke ye'ebe e be Nti, e Zambe wôé, nkane bita njô bôte ya Siri ô sendéya wo mo.

⁸ Ye bôte ya Kus a ba ya Libi be mbe teke bi beta nkane bita, bevagoñ a bikabela étua abui? Ve da na Nti a nga ve be e mo môé amu ô nga ye'ebe be ma.

⁹ Amu Nti a wulu mise mé e si ése na e ba nleme wop ôse ô ne be nye be yeme ngu. ô boya ane môt a nji bi fek ajô dina été, amu ataté éyoñe ji, bita bia zu kui be wo.

¹⁰ Ane Asa a nga wô'ô ñyene mam ôlun a futi nye mimbôk, amu a nga yaa nye amu ajô te. Eyoñe te ébiene fe nje Asa a nga tibili bôte b'éziñe ya ayoñ.

¹¹ Mimboon mi Asa, mi ya atata'a a mi ya asu'ulan, mi ne ntilan e kalate bejô bôte ya Yuda a Israél.

¹² Mbu mewôm mela a ébulu ya éjôé jé, Asa a nga bi angôndô ya mbia ôkon e mebo mé; ve da to'o na éyoñe ya ôkone vié, a nji jeñe Nti, ve yene ve bedokita.

¹³ Asa a nga bômbô ba b'ésaa; a nga wu e mbu mewôm menyin a wua ya éjôé jé.

¹⁴ Be nga jame nye e soñe jia ya mesoñ a nga fak, e tisone David. Be nga bôôé nye énoñ be nga mane futi mimbon mi ne mbamba menyum a beôlobinda be ne nkôman, aval'ane atyeñ nkôme beôlobinda da yian. A be nga di'i beta ngab y'été asu dé.