2 Minkte 13 - Kalate Zambe Nnomo a Mfefe Mfefé Nkôñelan

Abiya, njô bôte ya Yuda

¹ Mbu awôm a muame, njô bôte Yérôbôam a nga jôô, ñwô Abiya a nga tebe njôô e Yuda.

² A nga jôô mimbu mila e Yérusalém. Nyia wé a mbe jôé na Mikayahu, ngone Uriel ya Yibéa. Bita bi nga boban e zañe Abiya a Yérôbôam.

³ Abiya a nga tya'a bita a mintobane biwôlô bi bôte mewosan toyini mintete minyin. A Yérôbôam a nga tebe nye ngame yat a mintoban biwôlô mimben toyini mintete muam.

⁴ A too e nkôle Temarayim, ngabe nkôle Efrayim, nde Abiya a nga tebe tetele a jô na: Vô'ôla'ane ma a Yérôbôam a Israél ase!

⁵ Ye mi nji yiane yeme na Nti, Zambe Israél, a nga ve David éjôé ya Israél éyoñe jia ya biyoñ bise, émien a bone bé, a élat é ne teke atyamé'

⁶ Ve Yérôbôam, e mone Nébat, mbo ésaé Solômon, e mone David, a tebeya a wosane masa wé.

⁷ Bemomo be bôt a mbia be bôt be nga sulane be nye a dañe Rôbôam, e mone Solômon. Rôbôam, amu a mbe mongô a *nlem atek, a nji bo nguleya yeme ngu ôsu viap.

⁸ Eyoñe ji mia jô na mia zu dañ éjôé Nti, nje é ne e mo me bone be David. Mi ne ézu'u bôt a mi bili bone benya'a be or, mbe Yérôbôam a nga bo ane bezambe.

⁹ Ye mi nji titane betuni be Nti, e bone b'Aron, nalé fe Belévit; a ye mi maneya bo miabebien betuni aval'ane bôte ya mesi mefe ba bo? E môt ase a zu a étoñe nnôme nyak a beyôme bikela zamgbwa na be ve nye nguleya bo *ntuni, mia telé nye *ntuni ya jôm e nji bo *ntuni.

¹⁰ Ve mfa'a wongan, Nti a ne e Zambe wongan a bi nji ke li'i nye: betuni ba bo Nti bisaé be ne bone b'Aron, a Belévit ba bo ésaé.

¹¹ Bia ve Nti mimvean mia di'ibane ngumba mametyé a mamengô'é mese, ba di'i beôlobinda be ne mbamba menyum; bia bôé minnoñ mi belet e tawôlô a ne mfubane yôp, a mamengô'é mese, bia bo'é ébi bifufube or a belambe bé; amu bia tôñ abendé Nti, e Zambe wongan. Ve mia, mi li'iya nye.

¹² Tame yenan: Zambe a betuni bé be ne be bia, be tele bia ôsu, a bi bili metoñ asu ya loñe ngu bi too mia e ngame yat. A bone b'Israél! Te wosane Nti, Zambe b'ésoo benan, amu mia ye bo teke dañ!

¹³ Nté te ôse, Yérôbôam a nga lôme ngab bezimbi éziñ é ke sobô e mvuse bôte ya Yuda; ajô te bôte ya Yuda be nga tele avale di: nkane bita Israél ô too be ôsu, bezimbi ke be nga solô be too be mvus.

¹⁴ Eyoñe bôte ya Yuda be nga kôñelan, be nga koone na ba yiane wosane mesu mebaé nde be nga sili mvolane Nti, éyoñe betuni be nga loñe metoñ,

¹⁵ ane bôte ya Yuda be nga bete metyiñe yôp! Nde, éyoñe bôte ya Yuda be nga bete metyiñ, Zambe a nga bôé Yérôbôam a Israél ase ôsu Abiya a Yuda.

¹⁶ Ane bone b'Israél be nga mate e mise me Yuda, a Zambe a nga ve be e mo map.

¹⁷ Abiya a e bôte be nga bo be na be bômban *abé, a mintoban mi bôt toyini mintete mitane ya bone b'Israél be nga wôéban.

¹⁸ Bone b'Israél be nga same éyoñe te, a bone be Yuda be nga dañ amu be nga ye'ebe be Nti, e Zambe b'ésaa bap.

¹⁹ Abiya a nga tôñe Yérôbôam a wôlé nye bitisone bi: Bétél a minlame mié, Yesana a minlame mié, Ebroñ a minlame mié.

²⁰ Melu me Abiya, Yérôbôam a mbe teke ngu, ane Nti a nga bibi nye, nye ve wu.

²¹ Ve Abiya a nga yemete éjôé jé. A nga lu'u binga awôm a benyin a biaé bobefame mewôm mebaé a bebaé a bobebinga awôm a besaman.

²² Mimboone mi Abiya, mam a nga bo a mam a nga jô, me ne ntilan e kalate ba loone na: Minsimesan mi *nkulu mejô Iddô.

²³ Ane Abiya a nga bômbô vôme wua ba b'ésaa; be nga jame nye e tisone David. E mone wé Asa a nga jôô éjiane jé.