2 Ko 9 - Kalate Zambe Nnomo a Mfefe Mfefé Nkôñelan

Mebendé mefe ajô mimvean

¹ Mfa'a mimvolan mimfufup, e nji bo mfi na me tili mia de.

² Ma yeme mbamba minkômbane mienan, a ne ne wulu ngunguan a mia e be bôte ya Masédôan. Me nga bo me jô'ô be na, Akayi a ne nkôman aso mbu ya mvus, a ayôñe mboone denan e nga fô'ô bekeké abui.

³ Ma lôme mia bobejañ, e nde ngunguane me bili mia ô za bo zesé mfa'a ôte a na, avale me mbe me jô'ôk, mi tabe fo'o nkôman.

⁴ Ma ko woñe na, nge bia be bôte ya Masédôan bia zu, a koone mia teke nkôman, mbamba ndi *nlem ate, a viane bo ôsone wongan, ma jô na ôsone wônan.

⁵ Nde ñhe me nga buni na, ma yiane loone bobejañe na be zu bia ôsu e be mia, a kômesane mimveane mienan. Mengaka'a me ésôse menan, éyoñe be maneya kôane me, ma ye bo mveane nya ésôse, saa wu ôkak.

⁶ Yemane na, nyô a mias mmiasan ôkôlôt, a ye fe kôan nkôan ôkôlôt. A e nyô a miase mmiasan ésôs, a ye fe kôane nkôan ésôs!

⁷ Môt ase a va'ak ane e nleme wé ô tyi'iya, teke ôlun nge ntindan, amu Zambe *a nye'e nyô a ve a mevak.

⁸ Zambe a ne nguleya jalé mia a mevale me akume mese, nalé ate mia ye fe bi abet asu mboon ôse ô ne *mvo'é, ve koone na mi bili abime da yiane mam mese a éyoñ ése.

⁹ Ane e ne ntilane na: A nga kap, a nga ve minzôzoé, *zôsôô wé a too nnôm éto.

¹⁰ Nyô a ve mmiase fese mvoñ a belet ane bidi, a ye fe ve mia mvoñ, a fôlô je, a yale bibuma bi *zôsôô bienan.

¹¹ Mia ye bo minkukume mezene mese, a e mevale me ésôse mese, mme ma ye bete mvean akéva be Zambe amu bia.

¹² Amu ésaé mimvean mite é nji yiane jalé ve minkômbane mimfufub étam, ve bo fe na mvean akéva mfa'a Zambe ô bo abui abui.

¹³ Eyoñe ba ye se'e ésaé te ane é né, ba ye ve Zambe duma, amu mewô'ô mia ve Mbamba Foé Krist, a amu ésôse jenan e fufulu ésaé mia be be été, a mia be bôte bese été.

¹⁴ A zene ya meye'elane map mfa'a wônan, ba ye liti mia nye'ane wop, amu abui mvame Zambe a nga bo mia.

¹⁵ Akéva e bo'o be Zambe amu mveane wé ô ne teke jame ya jô.