2 Ko 8 - Kalate Zambe Nnomo a Mfefe Mfefé Nkôñelan

Melep asu nsondane mimvean

¹ A bobejañ, bia kômbô na mi yem abime mvame Zambe a nga ve bekeké ya Masédôan.

² Ezezañe minju'u abui mi nga ve'ele be, ava'a dap da fuluku a azoé dap da nemban, bi nga viane beté ôdo'é e mimvean mi ésôs.

³ Aval ane ngule jap é né, a dañe fe dañ abime ngule dap, me ne ngaa,

⁴ be nga sili bia, bebien, be yemete'e fe na, bi kañese be na be nyoñe ngab ésaé ya volô mimfufup.

⁵ Be nga taté ve bebiene be Nti a lôt abime bi nga buni, wôna e be bia, amu nkômbane Zambe.

⁶ A na, bi nga tu'a lebe Tite na, a kee ésaé mboon ésôs a nga taté e be mia ôsu.

⁷ Ve amu mi bili mame mese abui: mbunan, atyeñe nkobô, ñyemane mam, ayôñe mboon ésaé aval ese, mevale mese, a nye'ane mi nga nyoñe be bia, biane fe ésôs abui abui éyoñe ji.

⁸ Me nji jô jame te ane abendé, ve éyoñe ma liti mia ayôñe mboone ba bevok, ma ve mia afôla ya liti nya nye'ane wônan.

⁹ Mia tu'a yem ésôse Nti wongan Yésus Krist, nye ate, nkukum ane a mbe, a nga bobane *nzôzoé, amu na a bo mia minkukum amu azoé dé.

¹⁰ E ne tyiñe ma ve ajô te: jame te nde da yiane mia, amu mi mbe ôsu, saa ve mfa'a ya bo ésaé te, ve mfa'a ya tyi'i na mia bo je aso mbu ya mvus.

¹¹ Eyoñe jina ñhe, sonda'ane bo je; nalé ate mbamba mefe'e menan ma ye lu'an a mboon, abim ane ngule jenan é né.

¹² Eyoñe mbamba nkômban a né fo'o, Zambe a nyoñ jôme môt a ve, a fombô'ô biôme môt ate a bili, saa bi a nji bi.

¹³ E nji bo asu ya telé mia éndeñela'a été éyoñe mia volô e bôte bevok ve amu na, mi tebe avale da: ane éyoñe ji, e jôme mi bili abet, ja ye jalé jôme ja jembane be;

¹⁴ ndembene *môs éziñ, e jôme ba ye bi abet ja ye jalé jôme ja ye jembane mia: nalé mia ye tebe été jia,

¹⁵ ane e ne ntilane na: Nyô a nga kôan abui, a nji bi a lôte nné, a nyô a nga kôane tyôtyoé, a nji yi jôm.

¹⁶ Akéva e bo'o e be Zambe, nye a nga futi e nleme Tite, avale mbamba nkômbane da ya volô mia.

¹⁷ A nga kañese nloone wongan a, avôl avô, émien a nga zu be mia.

¹⁸ Bi nga lôm, e nsamba wé, e mojañ bekeké bese ba sek ajô *mbamba Foé.

¹⁹ E jame da beta dañe mvaé, e ne na, bekeké be nga tobe nye na bia be nye bi ke e dulu mimvolane di, ésaé bia bo asu duma Nti émien, a asu ya tôé e mbamba minkômbane miangan.

²⁰ Bia tu'a tabe ntyel asu ya sa'ale bijô bi ne so mebelane bizu'u bemoné bia ba'ale.

²¹ Bia ve ngule ya bo mvaé, saa ve e mise me Zambe étam, ve nalé fe e mise me bôt.

²² Bi nga lôme mojañ baa be minlôman, nyô bia zu bia ve'ele ayôñe mboon ésaé dé biyoñ abui, a éyoñe ji, a dañe beta liti nalé, amu a too mia ndi.

²³ Tite a ne nyô bia nye bia wulu, a ébe mbo ésaé wom e be mia; e bobejañ baa be nye be ne nsamba, be ne minlômane bekeké, asu duma Krist.

²⁴ Nde, lita'an e mise ya bekeké, ndeme ya nye'ane mi bili be, a ngunguane bi bili mia ajô dap.