2 Ko 7 - Kalate Zambe Nnomo a Mfefe Mfefé Nkôñelan

¹ Amu bi bili avale mengaka'a te, a bôte ma dañe nye'e, e ntunane biabebien e mfa'a avale mvin ese ya minsôn a *nsisim. E sonda'ane telé biabebien étyi e nkoone Zambe woñ été.

Paul a diine bôte ya Korént e nleme wé

² Va'ane bia éto minleme mienan été; bi nji bo môt éziñ abé; bi nji kpwé môt éziñ azoé; bi nji diane môt éziñ.

³ Sa mfa'a ya ve môt éziñe mekua nde ma kobô nalé, amu me maneya jô nalé na: Mi ne e minleme miangan été awu a ényiñ.

⁴ Me too beta ndi e be mia, e ngunguane me bili mia ô ne anen, *nlem ô bôô ma si abui, meva'a mam ma fuluku alune dam ese été.

⁵ Amu na, nkuane wongan e Masédôan, bi nji bi awo'on ve alune mevale mese. Mewosan atan, woñe ke été.

⁶ Ve Zambe, nyô a volô ba ba suu bebiene si minlem, a nga volô bia minlem éyoñe Tite a nga so,

⁷ saa ve nsoone wé étam, ve ngule *nlem a nga nyoñe be mia; a nga kate bia beta nkômbane wônan e mili'i menan, a beta ésaé wônan mfa'a wom, avale ya na me nga beta bi ava'a da dañ ngu amu nalé.

⁸ Yaa, nge me nga ve mia ôlune *nlem amu kalate wom, me nji jôban. Ve nge me nga jôban e mboone te, kalate ate, ma yene nalé na a nga ve mia ôlune *nlem, ja'ane ve nté éziñ,

⁹ ma vak éyoñe ji, saa ñhe amu ôlune wônan, ve amu *nkôñelane nlem ô nga so amu nye. Amu ôlune wônan ô mbe ane Zambe a kômbô. Nde mfa'a wongan, mi nji bi mbia jam éziñ.

¹⁰ Amu ôlun, ane nkômbane Zambe ô né, wo ve *nkôñelane nlem, wo ke kui e nyian, teke mejôba'an. Ôlun avale *si nyô ja kômbô, wo soo awu.

¹¹ Mia yiane viane yen e mam ôlun, ane Zambe a kômbô, ô nga soo me be mia: mbamba nkômban mfa'a wônan, avôle ya kamane miabebien! Abim ate'e nyôle te! Abime woñe te! Abime nkômbane ya beta yene ma te! Aka'a mveane ngule ya bo ésaé! Abime nkômbane ya vaa *abé te! Akôsa bo mame mete mese, mia bebien mi nga liti na, mi mbe *mvo'é ajô te été.

¹² Tyi'ibi na, nge me nga tili mia, e nji bo ajô nté ntañete, nge ajô ya nyô be nga bo *abé, ve asu ya liti mia, e mise me Zambe, ayôñe mi bili mfa'a wongan.

¹³ E jame dina nde e nga volô bia *nlem. Nge ô vaa e mvolane *nlem ô ne éñwongane te, bi nga beta dañe vak amu meva'a Tite, me so'o ngumba nje'ebane nleme si a nga nyoñe be mia bese.

¹⁴ Amu nge me nga liti nye ngunguan éziñ amu mia, me nji wô'ô ôson, ve amu bia zu bia kobô mia bebela biyoñe bise, e nde ngunguan bi nga liti Tite ajô denan ô nga kabe.

¹⁵ Nye'ane wé mfa'a wônan, ô ne ve nenenen, éyoñ a simesane mewô'ô menan, mia bôte bese, avale woñ a mfô'ôban mi nga nyoñe nye.

¹⁶ Ma vak amu me ne ngule ya tabe mia ndi mfa'a ya mame mese.