2 Ko 6 - Kalate Zambe Nnomo a Mfefe Mfefé Nkôñelan

Bebo bisaé be Zambe

¹ Amu bia be nye bia bo ésaé, bia lebe mia na mi bo te nyoñe mvame Zambe ane jôm é ne zezé.

² Amu a jô na: Eyoñe ja yian, me nga yalane wo, a e môse nyian, me nga volô wo. Tame yen, éyoñe ji é ne mbamba éyoñ. Tame yen éyoñe ji é ne môse nyian.

³ Bi nji kômbô kolé môt ôbak a *zen éziñ, nde ésaé jangan ja ye bo tee bijô.

⁴ Ve bia ve ngule ya liti biabebien ane bebo bisaé be Zambe, e mban abui été, ôlun été, étibela'a été, e biyebe été,

⁵ e minkasa été, e bikukuma été, ate'e nyôl été, évevé été, e mbômbane zaé été a *mfuban ôse,

⁶ a ñyeman ôse, a njiban ôse, a mbamba *nlem ase, e Mfufube Nsisim été, e nye'an ô ne tee medu'an été,

⁷ e bebela nkobô été, e ngule Zambe été a mengale me *zôsôô asu mewosan a e nkamane biabebien,

⁸ e duma a ébiasé été, e mbia jôé a e mbamba jôé été; nlañeban ane belaa minsos, ve bi too ba ba kobô benyaa mejôô,

⁹ e ba bôte ba dimi, ve da be tuka'a fe yeme bia miñwuan, ve da bi vee, bia bômban, ve teke wôéban,

¹⁰ njalan a ôlun, ve éyoñ ése e mevak été, minzôzoé, ve bi bo'o bôt abui minkukum; teke jôme mo, ve e too ke na, bia bi bili mam mese!

Nkandan a abé

¹¹ Bia bebien bi nga kobô mia. Teke ntindan éziñ. A bôte ya Korént, nleme wongan ô ne ñyomban abui.

¹² Yemeyeme a nji bo mia e be bia. E nne yemeyeme a ne mia e be miabebien été.

¹³ Mia fe bo'one bia nalé, ma kobô mia ane bone bam, na mia fe mi kui bia minleme mienane ne ngeññ!

Nda Zambe vevea Zambe

¹⁴ Te teban ébôñeté jia si fufulu a bete buni. Za mfula'an a ne bo e zañe *zôsôô a ékotekot? Nge na za nlatan a nee zañ éfufup a dibi'

¹⁵ Za nkuane tyiñi a nee zañe Krist a Beliar? A za mfulane mame a nee zañe mbuni a môte a ne te buni'

¹⁶ Nda Zambe a *ngunemelan be bili élate jé é ne be fufulu? Amu bia bi ne Nda Zambe vevea Zambe, avale Zambe a nga jô na: Ma ye tabe a wulu ézezañe jap. Ma ye bo Zambe wop, a ba ye bo bôte bam.

¹⁷ Ajô te kuian atan, a li'i bôte bete, a tabe nkandan a be: Nalé Nti a jô. A te nambane jôm é ne mvin. A ma ma ye nyoñe mia.

¹⁸ A ma ye bo mia Esaa, a mia ye bo bobefam a bobebinga mfa'a wom. Nalé Nti a ne ngul ése a jô.