2 Ko 5 - Kalate Zambe Nnomo a Mfefe Mfefé Nkôñelan

¹ Amu bia yeme na, nge étaba'a jangane ya *si nyô ja jamban ébien, nje éte é ne ve ébem, bi bili *nda, mboon ésaé Zambe, étaba'a é too nnôm éto e yôp, e nje é nji boban a mo me môt.

² A bia tat amu beta nkômbane ya jaé, e *nda bi be'e éyoñe jina yôp, énjangan ja so bia yôp, *nda jangane ya yôp.

³ A too ve na be koone bia bi be'e mengômesan, saa minsoé.

⁴ Amu, e bia bi ne ébeme jina si, bia tat édudu'u nyôl ése. E ne nalé na, bi nji kômbô vaa biyé, ve bia kômbô beté éyé e ji évo'o yôp, ndembene jôme ja wu ja ye mineban ényiñ été.

⁵ Nyô a nga kôme bia amu ényiñe ja zu te, a ne Zambe, nyô a nga ve bia *bembômô be Nsisim.

⁶ Ajô te ñhe bi ne njalan a ndi nleme biyoñe bise, ve bi yeme na, nté bi too e nyôle nyôna été, bi ne atane ya *nda jangan, ôyab a Nti.

⁷ Amu bia wulu a mbunan, saa a mis.

⁸ Yaa, bi ne njalan a ndi *nlem, a bia yene mvaé ya kôlô étaba'a nyôle ji, a ke tabe e fefele Nti.

⁹ Ajô te nkômbane wongan ô ne na bi ve nye nleme mvaé ja'ane bia ba'ale étaba'a jangan, nge kôlô je.

¹⁰ Amu bia bese bia yiane tebe asu éto ntyi'ane mejô Krist teke jôme ja solé bia, ane môt ase a ye nyoñe ma'ane me mam a nga bo nté ényiñe minsône jé, nge mvaé, nge *abé.

Esaé ya beta late ngbwa

¹¹ Amu bia yeme woñe Nti, bia jeñe zene na bôt be kañese bia, a asu Zambe, jôm éziñ é nji solé bia.Ma buni fe na, jôm éziñ é nji solé ma e be mone môte ya minleme mienan.

¹² Bi nji beta bendé biabebiene be mia, ve bia kômbô ve mia éyoñe ya nguane je ajô dangan, nde mia ye bi jame ya yalane ba ba bo miñyené ya atan, saa mi ya *nlem.

¹³ Nge bi nga yené ane mekut, e mbe amu Zambe; ve nge bi ne fek, e ne amu mia.

¹⁴ Nye'ane Krist wo bametane bia a ôsimesane wuna na, môte wua a nga wu asu bese, nalé ate ñhe bese be nga wu.

¹⁵ A a nga wu asu bese, nde bevevee ba ye bo te beta nyiñ asu dabe bebien, ve asu nyô a nga wu a wômô amu be.

¹⁶ Nde ataté éyoñe ji, bi nji yiane beta yeme môt éziñ ñyemane minsôn. Nge bi nga yeme Krist ñyemane minsôn, éyoñe ji, bi nji fe yeme nye nalé.

¹⁷ Ajô te nge môt éziñ a ne be Krist a ntoo mfefé ététéa, nnômô ô lôteya, ô bobaneya mfefé.

¹⁸ Mame mese ma so e be Zambe, nye a nga beta late bia be nye e be Krist a ve bia ésaé nlatane ngbwa.

¹⁹ Amu ja'ane aya nge aya, Zambe nye a nga beta late *si nyô ngbwa a émiene be Krist, teke lañe bikobe biap e minlô mi bôte yôp ve viane futi éfia: nlatane ngbwa e be bia.

²⁰ Ajô te bi ne nlômane bijian asu Krist, a Zambe émiene nye a loone mia, a bela'ane bia. A jôé Krist, bia ye'elane mia na, jôka'ane miabebiene mi beta late Zambe ngbwa.

²¹ Nyô a nji yem *abé, ve a nga funane nye *abé amu bia, ndembene bia ye bo zôsôa Zambe amu nye.