2 Ko 3 - Kalate Zambe Nnomo a Mfefe Mfefé Nkôñelan

Esaé ya mfefé Elat

¹ Ye bia ye beta bendé mia biabebien? Nge na, ye bia beta yi bekalate ba bendé bia e be mia, nge ba ba so be mia, ane bôte b'éziñ ba bo'

² E kalate wongan a ne mia, kalate, ntilane minleme miangan, bôte bese ba yem a be lañeya nye.

³ Ja'an aya nge aya, mi ne kalate Krist a nga ve ésaé jangan ntilan, saa a mendim me nkôs, ve a Nsisime Zambe a vee, saa ntilan e bifase *mekok, ve bi minsôn, e minleme mienan.

⁴ Bebela bi bili e nye le, asu be Zambe, amu Krist.

⁵ Saa ke amu ngule jangan bi ne ngule ya futi e be biabebien, ve ngule jangan ja so be Zambe.

⁶ Nye ate a nga ve fe bia ngule ya bo bebo bisaé be mfefé élat, saa ji metiñ, ve ji Nsisim. Amu metiñe ma wôé, ve Nsisim wo nyii.

⁷ Amu na, nge ésaé awu, nkpwelane metiñ ako'o yôp, é nga too étôtok avale ya na, bone b'Israél be mbe te ngule ya fombô asu Môze amu étôtok, ve é too jôm ja lôt,

⁸ abim avé ésaé Nsisim ja ye beta dañ'

⁹ Nge ésaé mveane mekua, é nga too étôtok, abim avé ésaé *zôsôô ja ye beta dañe dañ'

¹⁰ Teke bebé, ja'ane jôm é nga too étôtok, é nji fe bo étôtok, éyoñ é ne asu jôm é bili étôto'o ja dañ.

¹¹ Amu, nge jôm é mbe ji ja lôt é nga boban étôtok, abim avé ji é tooto ja ye dañ'

¹² Ngu amu avale ndi nleme te, bi ne njalan a mbunan.

¹³ Bi nji bo ane Môze, nye a nga bo a solé'é asu a éndelé na, bone b'Israél be bo te yen asu'ulane nlôtezene mfaé.

¹⁴ Ve atyeñe dap e nga bo dibi! A kui e môse wu, éyoñe ba lañe nnôme kalate Zambe, éndelé te é ngenan é yaa. E nji vas, amu e be Krist nye ja vas.

¹⁵ Yaa, a kui môse wu, éyoñ ése ba lañe Môze, éndelé ja buti minleme miap.

¹⁶ Ve *nkôñelane nlem étam e be Krist ñwô éndelé te ja kôlô.

¹⁷ Amu Nti a ne Nsisim. A e vôme nsisime Nti ô né, vôm ate éto fili é né.

¹⁸ A bia bese mesu me ne tee mbutan, bia liti minkôkô mi étôto'o Nti, bia veñesañe mesu a nyoñ éyeka'a te ébien, njalan a étôto'o ja beta dañ anen amu Nti, nyô a ne Nsisim.