2 Ko 2 - Kalate Zambe Nnomo a Mfefe Mfefé Nkôñelan

¹ Mfa'a wom, me nga tyi'i jame dina na: Ma ye bo te bulane be mia a ôlune *nlem.

² A nge ma ve mia ôlune minlem, za a ye ve ma avak, ye saa nyô me nga ve ôlune *nlem'

³ E jame me nga sôñ e kalate wom été e mbe na: éyoñe ma suan, me sa'ale ajô dina na e bôte be nga yiane ve ma avak, be viane ve ma ôlune *nlem. Me too ndi *nlem e mfa'a wônan na, ava'a dam e ne fe éndenane bese;

⁴ ajô te, ézezañe minju'u été a nleme ntya'an, nje me nga tili mia a mili'i mis, saa asu ya ve mia ôlune minlem, ve na, mi yeme nye'an wo fuluku, ñwô me bili mia.

Paul * a jamé nsiñe wé

⁵ Nge môt éziñ a nga ndeñele, saa ma a nga bo, nge me nji beté jam, ve mia bese a *zen éziñ.

⁶ Da sili na môt avale te a nyoñe *mvam é so'o e be ngume nsamba;

⁷ ajô te mia yiane viane mvamane a volô nye *nlem, a za kee ényônyongo ya abui ôlun été.

⁸ Ajô te ma lebe mia na mi liti ndeme nye'ane be nye;

⁹ amu éyoñe me nga tili mia, me nga sôñe na me yene ndeme ja liti na mewô'ô menan me mbe ngumba.

¹⁰ A e nyô mia mvamane nye, nye ma ma mvamane nye! Nge ma me nga liti *mvam, nge me nga bo nalé, e mbe amu mia, Krist émien a lôô,

¹¹ nde bia ye bo te du'ubane be Satan, amu bi nji dimi minsôñane mié.

Esaé ja fombô mfefé élat

¹² Ane me nga kui Trôas, mfa'a ya kañete Mbamba Foé Krist, akôsa bo Nti a nga yoé ma *mbé ne ngeññ, *nlem ô nji bômbô ma si amu me nji koone Tite, monyañe wom.

¹³ Ane ñhe me nga li'i be a ke Masédôan.

¹⁴ Akéva e bo'o be Zambe, nyô a kee bia biyoñe bise e ndañane wé été amu Krist, a nye fe a belane bia asu ya miam vôm ase, ôlobinda ñyeman e vôm ase. A zene ya e be bia.

¹⁵ Jam e ne na: Bi ne mfa'a Zambe, mbamba ényume Krist, asu ba ba nyii bebien, a asu ba ba jañele bebien.

¹⁶ Mfa'a bana, ényum awu ja kee môt awu, mfa'a ba bevok, ényum ényiñ ja kee môt ényiñ. A za a ne nkôñe ya bo aval ésaé te'

¹⁷ Bi nji bo ane bevo'o abui ba kuan ajô Zambe; bia kobô tee medu'an, e señe Zambe, asu Zambe, a e Krist été.