2 Ko 12 - Kalate Zambe Nnomo a Mfefe Mfefé Nkôñelan

¹ Ma yiane wumulu mamien! Ve nalé a nji volô jôm. Ve ma ye kobô ajô miñyenan a minlitane mi Nti.

² Ma yeme môt éziñe be Krist, nye ate, den a nto mimbu awôm a minyin, ye a mbe e nyôl été? Maa yem! Ye a mbe e nyôle jé atan? Maa yem, Zambe nye a yeme de, môt ate a nga beteban a kui yôbe lale.

³ A ma yeme na môt ate, ye a mbe a nyôle jé? Ye a mbe teke nyôle jé? Maa yem, Zambe nye a yeme de,

⁴ môt ate a nga beteban a kui Paradis, a a nga wô'ô bifia bi ne teke atoté mbie môt a nji bi nkañesane na a ba'alane tot.

⁵ Ma ye wumulu mamien amu môt ate, ve mfa'a wom ma ye wumulu mamien, ve ate'e dam été.

⁶ Ngo'é! Nge me nga kômbô wumulu mamien, me nji ye bo akut, me nga ye kobô ve bebela; ve ma jô'é amu bôte be za bi ma ôsimesane wo dañe jame be lôô be ma, nge jame ba wô'ô me kobô'ô.

⁷ A amu minlitane mite mi mbe bitua minlitan, asu ya sa'ale mebune mese, éyo é nga vebane minsône miam été, éngela Satan, ésaé jé é too na a bibi ma.

⁸ Me nga ye'elane Nti ajô te biyoñe bilale na, a vaa me je.

⁹ Ve a nga jô me na: E mvame jam ja yiane wo; e ngule jam é wô'ô yené ése ate'e été. Ajô te ma ye viane wumulu mamien ate'e dam été, nde e ngule Krist ja ye tabe e be ma.

¹⁰ Ajô te ma vak ate'e été, e meta été, e mengata'a été, e bitibela'a été e a woñ été amu Krist! Amu éyoñe me ne atek e nje me ne ngu.

Ntyelane nleme yôp Paul ajô bôte ya Korént

¹¹ Ma le me ntoo akut! Mi nga tindi ma été. Mia mi nga yiane wumulu ma. Amu beta minlômane bete be nji nyoñe jôm éziñ a dañe ma, to'o me ne momo jôm.

¹² Mendeme ya yemelane *nlôman me nga yené e zañe jenan: njibane *meve'ele mese, mendeme bitua bi mam, mesimba, mimboone mia liti ngul.

¹³ Jé mi nga bo te nyoñ ane bekeké bevok, nga ve na, e mfa'a wom, me nji diane mia? Jama'ane ma ékotekot éte!

¹⁴ Mi lôô na me ntoo fe nkômane ya zu be mia éyoñe lale, a ma ye bo te diane mia. Amu me nji jeñ akume denan, ve miabebien. Saa ke bone mbe ba yiane naane bebiaé bika'aé, ve bebiaé mfa'a *bon.

¹⁵ Mfa'a wom, ma ye kañese dimili, a ma ye ve mamiene ngumba asu denan. Nge, ma ke ôsu *a nye'e mia, ye ma ye nye'ebane tyôtyoé'

¹⁶ E bo'o nalé na me nji bo mia mbe'e! Ve akut ane me né, me nga bi mia a fe'e medu'an.

¹⁷ Nyôñane môt ase mia kômbô nyoñ e be bôte me nga lôme mia: ye me nga diane mia a wua ya be be'

¹⁸ Me nga yemete Tite, a lôme nye baa mojañe me nga jôô nye. Ye Tite a nga diane mia? Ye bi nji wulu avale nsisime da été? A avale mezene da été? Zene jia'

¹⁹ Aso ayap, mia simesane na bia kale biabebiene e mise menan? Momo, bia kobô asu Zambe e be Krist. Amu mame mete mese, a bôt ma nye'e, me ne asu ya kômôtô mia.

²⁰ Ma ko fo'o woñe ya zu koone mia, éyoñe ma zu, mi too teke avale ma kômbô, a na, mi ke mi bo te yene ma avale mia kômbô: metyama'an a bo momo be mia nalé fe éviele, ayaa, mesengan, bibôta, ékobôkobô, *minkobô mi ébiasé, biduñ.

²¹ Ma ko woñe na, éyoñ évo'o ma zu, e Zambe wom a za samele ma e mise menan, a na, me bo te kui vôme ya yi abui ya ba be nga taté bo *abé, a ba ba bo te kôñelane minlem amu mvine jap, mbia ntabane wop, a ébamba jap!