2 Ko 11 - Kalate Zambe Nnomo a Mfefe Mfefé Nkôñelan

Paul nya nlômane

¹ Ngo'o nge mi mbe nguleya jibi akute dam abim éziñ; yaa! Jiba'ane ma!

² Me bili e *nlem abane mfa'a wônan; avale da ane Zambe. Amu me nga bo mia *atiñ aluk e be nnôme wua, asu ya liti mia e be Krist ane *mfuban éndune ngon,

³ ve ma ko woñe na, avale Satan a nga wone Eve a medu'ane mé, asimesane denan e bo te ndaman, a li'i tyi'ibi ényiñ a nlatan Krist.

⁴ Yaa, nge môt ôsusua a zu, a kañete mia Yésus mfe, nye a nji bo nyô bi nga kañete mia, nge mia nyoñe nsisime wo selane wu mi nga nyoñ, nge Mbamba Foé mfe, saa nyô mi nga nyoñ, mia jibi fo'o nye.

⁵ Me nji tu'a buni na beta minlômane bete ba dañe ma jôm éziñ.

⁶ Yaa me ne asu'u nkobô! Mfa'a ñyemane mam, jam afe le. E mame mese a mezene mese, bi nga liti mia ndem.

⁷ Ye e mbe nkobane na me suu mamiene si a bete mia yôp, éyoñe me nga kañete mia *mbamba Foé Zambe e zesé'

⁸ Me nga vose bekeké bevok, me kañese'e nyoñe jôme ya nyiñe je e be be asu ya saane mia.

⁹ A éyoñe me nga bili minkômbane miziñ nté me nga too be mia, me nji diane môt éziñ, amu e bobejañ be nga so Masédôan be nga ve ma biôme me nga kômbô; me nga sa'ale *zen ése ya bo te ka'a mia mbe'e, ma ye ke ôsu a sa'ale.

¹⁰ Ma yemete nalé, e bebela Krist a ne be ma na ba ye bo te solé ma e ngunguan ôte e mesi ya Akayi.

¹¹ Amu jé? Ye amu me nji nye'e mia? Zambe nye a yeme de!

¹² E jame ma bo, ma ye beta bo de, nde ma ye vaa amu ase ya ba ba jeñe nye, asu ya bo ngunguane na bia be be bi ne nkôñe wua!

¹³ Bôte bete be ne bikotekote minlôman, belaa minsos ba sobô e nkôñe minlômane mi Krist été.

¹⁴ E nji bo jame ya semé amu Satan émien a wô'ô sobô a yené ane éngele éfufup.

¹⁵ Nde e nji bo beta jame mfa'a bebo bisaé bé na be sobô ane bebo bisaé be *zôsôô. Asu'ulane dap da ye bo ane mimboone miap mi né.

Mintaé mi Paul

¹⁶ Ma beta de ba'alane na: Be bo'o te simesane na me ne akut, nge na: Kañesa'ane ñhe na me ne akut, nalé ma fe ma ye wumulu mamien abim éziñ.

¹⁷ E jame ma zu jô, me nji jô de ane di Nti, ve aval ane nyô a ntoo akut, ve me tuka'a yeme na me bili jame ya wumulu de mamien.

¹⁸ Amu abui bôt da wumulu ebien amu mfi ya minsôn, ma fe ma ye wumulu mamien.

¹⁹ Mia kañese jibi bôt be ne mekut, e mia mia yeme fas.

²⁰ Mia jibi na, be veñesane mia belo, be mine mia, be fone mia, be fombô mia e mfa'a ya si, be bibi mia e mesu.

²¹ Ma jô de asu ôsone wongan, aval ane nge bi nga too atek. E jôme be ne ayo'o ya jô, ma kobô ane akut, ma fe me ne ayo'o ya jô nalé.

²² Ye be ne Beébre? Ma fe nalé! Ayoñ Israél! Ma fe nalé! Ba ya mvoñe bôt Abraham? Ma fe!

²³ Ye be ne bebo bisaé be Krist? Me tame kobô éfia akute na ma ma dañedañ. E minju'u été, me nga dañ; e menda mimbôk, me nga dañ; e ñwobane bibôm, me nga tôbane wô abui abui; e beangôndô ya awu été, me nga wulu be abui biyoñ!

²⁴ E be Beyude, me nga bibane minkasa mewôm mela a ébu biyoñe bitan;

²⁵ biyoñe bilaa, me nga biban alé e be Berômeñ; be nga lume ma *mekok éyoñe jia; me nga ye wu ôsôé biyoñe bilaa; me nga lôte ngume *môs a ngum alu e mendime si.

²⁶ Me nga wulu a mebo bebé éyoñ ése a tôbane minju'u mi beta b'asôé, beze mimfaka, ziñe bobejañe y'ayoñ, minju'u mia so e be betebuni, beangôndô be mam e bitison, e *nkôte si, e mañ, e be bikotekote bi bobejañ!

²⁷ Nyôle nte'an a njuk; évevé bebé éyoñ ése; zaé a évé, mbômbane zaé éyoñ ése; avep a soé;

²⁸ teke lañe mame mevo'o mese, ésaé jam *môs ôse ntyelane nleme yôp ajô bekeké bese.

²⁹ Za a ne atek, me teke nyoñe ngap? Za a ku, jame te teke di'i me *nlem'

³⁰ Nge ma yiane wumulu mamien, ma ye wumulu mamien ate'e dam été.

³¹ Zambe, Esaa Nti Yésus, nyô a yian ékaña'a nnôm éto a yeme na me nji laa minsos.

³² E Damas, ngovina a mbe éjiane njô bôt Arétas a nga bo na be ba'ale tison asu ya bi ma.

³³ Ve be nga daa me vundu, a suu ma si tetele mfin me me too e nkoé été, ane me nga fam e mo mé.