2 Ko 10 - Kalate Zambe Nnomo a Mfefe Mfefé Nkôñelan

Paul a kaman ésaé jé

¹ Mamiene Paul, ma sili mia de a évôvoé a e *mvo'é Krist été, e ma ma yeme suu mamiene si éyoñe me ne ézezañe jenan bi lôane mesu, ve ayok e be mia éyoñe me ne ôyap;

² ma ye'elane mia na, éyoñe me ntoo be mia, me bo te belan ayo'o ma kômbô liti a bivele bi mis, asu ya wosan e bôt ba ve'e fe'e na e ntabane wongan ô tii e be amu ya minsôn.

³ Bôt, ane bi né, bi nji wosane fo'o ve aval ane bôt.

⁴ Momo, biôme mewosane biangan bi nji so e be bôt, ve ngule jap ja so e be Zambe, mfa'a ya tyam alem. Bia tyam asimesane befe'e,

⁵ a ngul ése ja liti ziñ, nje éte ja tebe ñyemane ya yeme Zambe e ngame yat. Bia bi ôsimesan ôse mbôk asu ya zuu wô na ô ve Krist mewôk,

⁶ a bi ne nkômane ya ve ébiasé ése *melep éyoñe mewô'ô menan ma ye bo ngum.

⁷ Fomba'ane mam ane me né. Nge môt éziñ a buni na a ne nyô Krist, a yeme nalé éyoñe jia. Nge a ne be Krist, bia fe!

⁸ A ja'ane ma dañe bo mebun a ngule Nti a nga ve bia asu ya kômôtô mia, saa asu njañane wônan, maa ye ke wô'ô ôson.

⁹ Me nji kômbô yené ane nyô a bo mia na mi ko woñ amu bekalate bam,

¹⁰ amu ba jô na: Bekalate bé be ne teke ajibi a ngu. Ve éyoñ a too ézezañe jangan a ne atek, a e nkobô wé momo jam.

¹¹ Môt ate a kôme'e yeme na: Avale bia kobô bi too ôyap e bekalate bangan été, avale te fe bia ye yené e mimboone miangan été.

¹² Yaa, bi nji bi ôvañe ya ve'an nge bo ane bewumulu bebien, éyoñe ba nyoñe bebien ane ôvek ô ne ntoban nge jôme ba funane je a bife, ba jañele fek!

¹³ Mfa'a wongan, bia ye bo te wumulu biabebien a lôte nné, ve bia ye bo nalé ézezañ ésaé Zambe a nga ve bia, éyoñ a nga bo na bi kui be mia.

¹⁴ Amu bi nji lôte nné wongan, aval ane nge bi nji ke zu be mia. Bia fo'o bi nga taté kui be mia a Mbamba Foé Krist.

¹⁵ Bi nji bi ngunguan wo dañ, ô so'o éza mboon ésaé, ve bi bili ndi *nlem, e meyaé ya mbunane wônan été na, bia ye dañe dañe yaé e be mia, aval ane nye'elane wongan ô né,

¹⁶ a nkeane Mbamba Foé ôyap a lôte be mia, teke bo ngunguane ya bisaé bi bobaneya e bifuse bi si bôte befe.

¹⁷ Nyô a nguan émien, a futi'i nguui jé e be Nti.

¹⁸ Saa nyô a wumulu émien nye a ne nkañesan, ve nyô Nti a sek.