2 Bb. 8 - Kalate Zambe Nnomo a Mfefe Mfefé Nkôñelan

Amané nkañete minga Sunamite

¹ Elizé a nga kobô e minga a nga wômôlô mon a jô nye na: Kôlô'ô si, kelek, womien a *nda bôte jôé, kele tabe e vôm ô ne nguleya tabe; amu Nti a zu kuli mfumbale zaé: a zu kui e si tañe mimbu zamgbwa.

² Nde minga a nga kôlô si a bo avale môta Zambe a nga jô. Ane a nga ke, nalé fe e *nda bôte jé. A nga tabe e si Befilisteñ mimbu zamgbwa.

³ Eyoñe mimbu zamgbwa mi lôteya, minga a nga so sii Befilisteñ. A nga ke ye'elane njô bôt ajô ya si jé a afube dé.

⁴ Njô bôt a mbe a la'ane minlañ baa Géhazi, ésoé mbo ésaé môta Zambe, a jô'ô na: Kañete'e ñhe ma, e beta be mam bese Elizé a boya.

⁵ Nté a mbe a kañete'e njô bôt avale Elizé a nga wômôlô mbim, nde e minga Elizé a nga wômôlô monafam a nga zu sili njô bôte mvolan ajô ya *nda jé a afube dé. Ane Géhazi a nga jô na: A njô bôt, masa wom, tame yene minga a e monafame wé Elizé a nga wômôlô.

⁶ Ane njô bôt a nga sili minga minsili, nde a nga kate nye mam mese. Njô bôt a nga ve nye ngum évet, a a nga jô évete te na: Bo'o na, be bulane minga nyô jôm ése é ne énjé, a minsenge mise ya afup, ataté e *môs a nga kôlô si jangan a kui éyoñe ji.

Azaél a nyoñ éto njô bôte ya Siri

⁷ Ane Elizé a nga ke e Damas. Ben-Adad, njô bôte ya Siri a konôk, nde ba kate nye foé na: Môta Zambe a suaneya va.

⁸ Ane njô bôt a nga jô Azaél na: Nyoñe mvean a ke tôbane môta Zambe; wo ye sili nkômbane Nti be nye ô jô'ô na: Ye ma ye nyiñ ôkone wu'

⁹ Nde Azaél a nga tôban Elizé, a bili mvean, a jôm ése é ne mvaé e Damas, abime bekamel mewôm menyin be ne be'e. Eyoñ a nga kui, nde a nga tebe ôsu vié a jô nye na: Mone wôé Ben-Adad, njô bôte ya Siri a lôme ma be wo me sili wo na: Ye ma ye fo'o nyiñ ôkone wu'

¹⁰ Elizé a nga yalane nye na: Kelek a jô nye na: Yaa, wo ye nyiñ! Ve Nti a te liti ma na, a ye fo'o wu.

¹¹ Ane môta Zambe a nga tebe a tu'a fombô, nde a nga taté na a yôn.

¹² Azaél a nga jô na: Amu jé tate wom a yôn? Elizé na: Amu ma yem *abé wo ye bo bone b'Israél: wo ye futi nduan e bitisone biap bi ne nlôñan alem, wo ye wôé bendômane be bôte bap a nkpwaté mekôn, wo ye ko'otô bendaé bap a sale mebume ya binga bap be ne mebum.

¹³ Ane Azaél a nga jô na: Mbo ésaé wôé a ne jé, mvu éte, ane a ne nguleya bo abime beta jame te? Elizé na: Nti a te liti ma na, wo ye bo njô bôte ya Siri.

¹⁴ Nde Azaél a nga kandan Elizé a bulane be masa wé a nye ki ve sili nye na: Elizé a te jô wo aya? Nye na: A te jô ma na: Wo ye nyiñ!

¹⁵ Tyé kpwaa, Azaél a nga nyoñe mfinga, ve dube wô mendim a buti wô njô bôt asu, nde njô bôt a nga wu, a Azaél a nga jôô éjiane jé.

Yôram, njô bôte ya Yuda

¹⁶ Mbu awôm a tane Yôram, e mon Akab, njô bôte ya Israél Yôzafat a too njô bôte ya Yuda, ñwô Yôram, e mone Yôzafat a nga jôô ane njô bôt e Yuda.

¹⁷ A nga bili mimbu mewôm mela a mibaé, éyoñ a nga tebe njô bôt, a a nga jôô mimbu muam e Yérusalém.

¹⁸ A nga wulu e zene bejô bôte ya Israél, avale *nda Akab é nga bo, amu ngal a mbe ngon Akab, a a nga bo mam me ne *abé e mise me Nti.

¹⁹ Ve Nti a nji kômbô jiane Yuda, amu David mbo ésaé wé nye Nti émien a nga jô na: A ye telé nye mvoñ bejôô éyoñ ése, émien a bone bé.

²⁰ Melu mé, Edom a nga bene njôane Yuda a telé émiene njô bôt.

²¹ Ane Yôram a nga ke e Sayir a bevagoñ bé bese. A nga kôlô si a alu a bôé Bédomite be nga bômane nye a bivete bevagoñ, ve bôt be nga mate a ke sobô menda bindelé mabe si.

²² Mbenan Edom a nge bene njôane Yuda ô nga tabe a kui môse wu. Libna fe a nga bene njôane melu mete.

²³ Mimboone mivok Yôram a nga bo, e jam ése a nga bo, ye me nji bo ntilan e kalate minkañete bejô bôte ya Yuda.

²⁴ Ane Yôram ba b'ésaa be nga bômbô vôme wua: a nga jambe e tisone David ba b'ésaa. Akazia, e mone wé, a nga jôô éjiane jé.

Akazia, njô bôte ya Yuda

²⁵ Mbu awôm a baa Yôram e mone Akab, njô bôte ya Israél a nga jôô, ñwô Akazia, e mone Yôram, a nga tebe njô bôte ya Yuda.

²⁶ Akazia a nga bili mimbu mewôm mebaé a mibaé éyoñ a nga tebe njôô, a a nga jôô mbu wua e Yérusalém, nyia a mbe jôé na Atali, ngone Omri, njô bôte ya Israél.

²⁷ A nga wulu e zene *nda Akazi a a nga bo mam me n'abé e mise me Nti ane *nda Akab, amu a nga bili élat a *nda Akab a zene ya aluk.

²⁸ Ba Yôram, e mone Akab, be nga ke wosane Azaél, njô bôte ya Siri, e Ramôt ya Galad, nde Besirieñ be nga balé Yôram aveñ.

²⁹ Ane Yôram a nga bulan a ke saéban e Yizrél, a nga ke saéban meveñ Besirieñ be nga balé nye e Rama, éyoñ a nga wosane Azaél, njô bôte ya Siri, Akazia, e mona Yôram, njô bôte ya Yuda, a nga siliki a ke yene Yôram mone Akab, e Yizrél, amu ôkone wé ô mbe *abé.