2 Bb. 5 - Kalate Zambe Nnomo a Mfefe Mfefé Nkôñelan

Elizé a saé Naman, mone Sirieñ zam

¹ Naman, évete nsamba mewosane njô bôte ya Siri a nga yene mvaé be masa wé, masa wé a nga semé fe nye abui, amu nye Nti a nga belane nye na a nyii Besirieñ. Ve éwôlô môte te é mbe nzezam.

² Nde a mbe vana na, éyoñe minsamba Besirieñ mi nga ke ôban, be nga soo ôyôm ésoé ngone minga ya si y'Israél minkôm. A mbe a bo'o nga Naman bisaé.

³ Nde a jô masa minga wé na: Ngo'é nge tate wom a mbe e fefele *nkulu mejô a ne Samari ve a nga ye saé nye *zam!

⁴ Naman a nga zu kate masa wé jame te a jô'ô na: Ésoé ngone minga ya si y'Israél ja kobô avale di a avale di.

⁵ Ane njô bôte ya Siri a nga jô na: Kelek e Samari a ma ye lôme njô bôte ya Israél kalate. Eyoñ a nga ke, a nga nyoñe betalañ be argent a bifas bi or toyini ésaman a mengômesane môt a tyendé awôm.

⁶ A nga kee njô bôte ya Israél kalate a too ntilane na: Éyoñe ji, awolo kalate nyô a ke kui be wo, wo ye yeme na, ma lôme wo Naman mbo ésaé wom na, ô saé nye *zam.

⁷ Eyoñe njô bôte ya Israél a nga mane lañe kalate, a nga nyabe mengômesane mé a jô na: Ye me ne Zambe na me wôé a nyii, nde a sili me na me saé e môt a kone *zam? Yemane ñhe a yenane na, a jeñe mezene na bia nye bi bo mejô.

⁸ Eyoñ Elizé, môta Zambe, a nga wô'ô na njô bôte ya Israél a maneya nyabe mengômesane mé, a nga lôme bôt be kate njô bôte na: Amu jé wo te nyabe mengômesane môé? Lôme nye be ma, éyoñe te a ye yeme na *nkulu mejô a ne Israél.

⁹ Ane Naman a nga zu a bikabela bié a vagoñe wé a tebe *mbé ya *nda Elizé.

¹⁰ Elizé a nga lôme *nlôman ô kate nye na: Kele wobane Yordan biyoñe zamgbwa, éyoñe te minsône miôé mia ye beta bo *mvo'é, a wo ye bo *mfuban.

¹¹ Ane Naman a nga yaa a ke a jô'ô na: Ma too me simesa'ane na: A ye kui atan a zu vôm me né, éyoñe te émien a ye loone jôé Nti, e Zambe wé, a lôte wo wé e vôm ôkon ô né a saé nzezam.

¹² Beta b'asôé ya Damas: Amana a Parpar, ye be nji bo abeñ a dañe mendime mese y'Israél? Ye me nji bo nguleya woban été a bo *mfuban? Ane a nga bulan e beta ôlun été.

¹³ Ve bebo bisaé bé be nga zu bebé na be kobô nye; be nga jô nye na: A masa wom, nge *nkulu mejô a nga ye sili wo jam éziñ é ne ayaé, ngaa ô nga ye bo de? Nguma'ane ke di a te jô wo na: Woba'an a bo *mfuban!

¹⁴ Nde a nga sis a duban ôsôé Yordan biyoñe zamgbwa avale nkobô môta Zambe ô mbe: ane minsône mié mi nga beta bo ane mi ésoé ndôman, a a nga bo *mfuban.

¹⁵ Ane a nga bulane be môta Zambe a nsamba wé ôse; éyoñ a suaneya, a nga tebe ôsu vié a jô na: Ô lôô me yemeya na, Zambe a nji bo e si nyôna ése, vengevenge ve Israél. Eyoñe ji ma ye'elane wo na, kañese'e nyoñe das mbo ésaé wôé a ve wo.

¹⁶ Elizé a nga yalane na: Ane Nti, Nyô me tele ôsu vié a vee! Ma ye bo te kañese. Naman a nga yemete nye na a nyoñ ve a nga ben.

¹⁷ Eyoñe te Naman a nga jô na: Amu ô beneya, kañese'e na be ve mbo ésaé wôé éfuse si, abime mbe'e bemulé bebaé ô ne yian, amu mbo ésaé wôé a nji kômbô beta ve mvean ô ne ngumba, nge étyi'a e be bezambe befe, fo'o ve be Nti.

¹⁸ Ve Nti a jamé'é mbo ésaé wôé e jame di: Eyoñe masa wom a nyiin e *nda zambe Rimôn na a ke kañ, a a ye'ebe ma wo, ma fe me wô'ô kañ e *nda zambe Rimôn: ajô te Nti a jamé'é mbo ésaé wôé, éyoñ ma ye kañ e *nda zambe Rimôn été.

¹⁹ Elizé a nga jô nye na: Kele *mvo'é. Ane a nga kandane nye a wulu ôbe nté.

Zame Naman ja ke be Géhazi

²⁰ Ane Géhazi, ésoé mbo ésaé Elizé, môta Zambe, a nga jô émien na: masa wom a te done Naman e mone Sirieñ nyô, éyoñ a te bene nyoñe biôm a te soo bie e mo mé; ane Nti a vee! Ma zu tôñe nye mbile mvus, a nyoñe jôm éziñ.

²¹ Ane Géhazi a nga tôñe Naman. Eyoñe Naman a yeneya ane a zu nye mbile mvus, a nga ji'a sis e vagoñe wé si na a ke tôbane nye, a jô na: Ye mam mese me ne *mvo'é'

²² Nye na: Mam mese me ne *mvo'é. Masa a lôme ma me kate wo na: Tame yen bendômane bebaé ya nsamba bekulu mejô be ndôme suane be ma éyoñ ébiene ji be so'o minkôle y'Efrayim; nde ma ye'elane wo na ô ve talañe argent wua a mengômesane mebaé môt a ne tyendé asu dap.

²³ Naman a nga jô na: Kañese'e nyoñe betalañe bebaé. A nga yemete, nye ve futi betalañe be argent bebaé e minkuta mibaé été ve kalane mie bebaé ya bendômane bé, ô laté a mengômesane mebaé môt a ne tyendé, nde be nga ke ve bie Géhazi.

²⁴ Eyoñ be kuiya nkô, Géhazi a nga nyoñe bie e mo map, a tu'a bôé bie e *nda été a suu bôte bete be bulan.

²⁵ Eyoñe te émien a nga zu a tebe ôsu be masa wé. Elizé a nga jô nye na: A Géhazi wo so vé'

²⁶ Nye na: Mbo ésaé wôé a nji ke li nge li. Ve Elizé a nga jô nye na: Ye wo buni na me nji yene jame te e nsisime wom été éyoñe môt ate a te kôlô e vagoñe wé a zu tôbane wo? Ye éyoñe ya nyoñe argent, mengômesan, beôlivié, mefube mindi'i mi woon, mintômba, bikela, benyak, bebo bisaé befam a binga nje ji'

²⁷ E zame Naman ja ye kabetane wo a mvoñe bôte jôé nnôm éto. Ane Géhazi a nga kôlô vôm Elizé a nga too, zame nyôl éfumulu ane sut.