2 Bb. 4 - Kalate Zambe Nnomo a Mfefe Mfefé Nkôñelan

Bitua bi mam bi Elizé Mvolane nkuse minga

¹ Minga éziñe ya binga be nsamba bekulu mejô a nga yône be Elizé a jô'ô na: Mbo ésaé wôé, a ne nnôme wom, a wuya, a wo yeme na mbo ésaé wôé a mbe a koo Zambe woñ: éyoñe ji e môte bi bili mvôla a zuya nyoñe bone bame bebaé na be bo nye belo.

² Elizé a nga jô nye na: Wo kômbô na me bo wo jé? Kate ma jôm ô bili e *nda jôé. A nga yalane na: Mbo ésaé minga wôé a nji bi jôm éfe *nda ve abime mbone me ne woban.

³ Elizé na: Kele yôé mevie'e me ne bikôkoé abim ese ô ne nguleya yôé e be bôte mia be be mi too,

⁴ éyoñe te wo nyiine *nda été, ô dibe mia be bone bôé *mbé, a sôé mbon e mevie'e été; e vie'e ôse wo jaé, ô telé wô e fefe.

⁵ Ane minga a nga kôlô e vôm Elizé a nga too, ve dib émien a bone bé *mbé. Bone bete be nga kalane nye meviek, nye ki a sô'é mbon été.

⁶ Eyoñe meviek me jaéya, a nga jô monafame wé na: Kala'ane ma vie'e ôfe! A nga yalane nye na: Mevie'e me maneya. Ane mbon ô nga tebe teke fe lôt.

⁷ Ane a nga zu kate môta Zambe jame te, nye ki ve yalane na: Kele kuane mbon a ya'ane mvôla, mvus éte wo ye nyiñ a *mebuka'a, womien a bone bôé.

Elizé a wômôlô mone ngone Sunamite

⁸ Môs éziñ Elizé a nga lôt e Sunem. Ewôlô minga é nga too wé, é nga yemete nye na a kañese di bidi e *nda jé. Ataté éyoñe te, a nga ke e *nda jé a di éyoñ ése a lôt.

⁹ Ane minga ate a nga jô e nnôme na: Ma yeme na e môt a zu be bia nyô éyoñ ése a ne e môt a n'étyi.

¹⁰ Bi tame lôñe nye mon étune *nda, mfa'a ya yôp, bia ye futi nye énoñ a tawôlô, éto a lambe été, éyoñ a zu be bia, a ne nguleya ke wo'on été.

¹¹ Môs éziñ Elizé a nga zu be be, nde a nga ke étune *nda ya yôb a bômbô si.

¹² A nga jô Géhazi mbo ésaé wé na: Lo'one ngone Sunamite éte! A nga loone nye, nye ve tebe ôsu be mbo ésaé.

¹³ Elizé a nga jô mbo ésaé wé na: Kate nye na: Ô maneya belane bia a ésemé ése avale di, jé ñhe nje bi bo wo? Ye bi kobô ajô dôé e be njô bôt, nge e be évete ya nsamba mewosan? Minga a nga yalane na: Me too e zañe bôte bam.

¹⁴ Elizé nye na: Jé ñhe bi bo asu dé? Géhazi a nga yalane na: Kee a ne teke mon, a nnôme wé a ntoo nnôm.

¹⁵ Elizé na: Lo'one nye! Ane a nga loone nye, minga ve tebe anyiine *mbé.

¹⁶ Elizé a nga jô nye na: Mbu wo zu, aval'éyoñ ébiene di, wo ye bi monafam. Nd'a nga jô na: Momo! A masa wom, a ne môta Zambe, te laane mbo ésaé wôé a ne minga minsos.

¹⁷ Nde minga a nga nyoñ abum a biaé monafam aval'éyoñe te ébien, mbu ô nga tôñe valé, aval Elizé a nga jô.

¹⁸ Ane mon a nga yaé. Môs éziñ a nga ke koon ésaa e vôme bekôane bidi be né,

¹⁹ nde a jô nye na: Ma wô'ô nlô mintaé! Ma wô'ô nlô mintaé! Esaa a nga jô mbo ésaé wé na: Kele nye be nyia!

²⁰ Ane mbo ésaé a nga nyoñe nye a kee nye be nyia. Mon a nga tabe nyia mebo a kui e zañe *môs, nde a nga wu.

²¹ Eyoñe te a nga bet a ke bôé nye énoñe môta Zambe, ve dibe nye e *nda été a kui atan.

²² A nga loone nnôm a jô na: Ma ye'elane wo na ô lôme wua ya bebo bisaé a jia ya bijakas, ma ke a kui be môta Zambe, ma le ma zu.

²³ Nnôm a nga jô na: Amu jé wo kômbô ke be nye den? Den a nji bo mfefé ngon nge Sabat. Minga a nga yalane nye na: Te tyelé nleme yôp!

²⁴ Ane a nga futi éto éjakase yôp a jô mbo ésaé wé na: Kelee ma, wulu'u, a te tebe *zen te na me jô wo na ô tebe!

²⁵ Nde a nga ke be môta Zambe e nkôle Karmel. Nné ane môta Zambe a nga yene nye ôyap, a nga jô Géhazi, mbo ésaé wé na: Minga Sunamite le a zu!

²⁶ Mate'e ô ke tôbane nye a sili nye na: Ye ô ne *mvo'é? Ye nyo nnôm a ne *mvo'é? Ye mon a ne *mvo'é? A nga yalane na: Mam mese me ne *mvo'é!

²⁷ Eyoñ a kuiya nkô bebé be môta Zambe, a nga bi nye mebo. Géhazi a nga zu bebé na a sô'ôlô nye, ve môta Zambe a nga jô na: Jôké'é nye, amu a bili ôlun a Nti a te solé ma de; a nji ke kate ma jam.

²⁸ Minga a nga jô na: Ye ma me nga sili e Nti wome na a ve ma mon? Ye me nji jô na: Te du'u ma'

²⁹ Elizé a nga jô Géhazi na: Yemete'e ases angeteñ, nyoñe ntume wome mo a ke! Nge wo tôbane môt éziñ, te batane nye; a nge môt éziñ a batane wo, te yalane nye. Wo ye beté ntume wom asu monafam.

³⁰ Eyoñe te nyia monafam a nga jô na: Ane Nti a vee, a ane womiene fe ô vee, ma ye bo te kandane wo! Nde Elizé a nga kôlô si a tôñe nye.

³¹ Géhazi a mbe be ôsu; a nga beté monafame *ntum asu, ve teke *tyiñ nge ndem éziñe ya ényiñ é nga yené. Nde Géhazi a nga beta zu tôbane Elizé a kate nye na: Mongô a nji ke vee.

³² Ane Elizé a nga kui *nda, a koé fo'o na mongô a wuya, a bôô énoñe jé.

³³ Elizé a nga nyiin a fetebane *nda été baa mon a ye'elane Nti.

³⁴ A nga bômbô mongô yôp a buti anyu dé éndéé yôp, a mise mé éméé yôp, nalé fe mo mé éméé yôp; a nga same nyôle jé énjéé yôp; ane nyôle mongô é nga bili ayôñ.

³⁵ Elizé a nga sis e *nda, a wulu'u ataté li a kui li, éyoñe te a nga beta bet a same nyô e mongô yôp. Eyoñe te mongô a nga semele biyoñe zamgbwa a kui mis.

³⁶ Ane Elizé a nga loone Géhazi a jô na: Lo'one minga Sunamit ate! Nde a nga loone nye; ane a nga ke vôm Elizé a nga too, Elizé ve jô nye na: Nyoñe mone wôé!

³⁷ Nde a nga zu ku nye mebo, ve kute meboñe si a su'ulane nyoñe mone wé a kui atan!

Elizé a fubu étutu'a é bili nsu

³⁸ Ane Elizé a nga bulan e Gilgal. Mfumbale zaé a mbe e si melu mete. Amu nsamba bekulu mejô ô nga tele nye ôsu, nde a jô mbo ésaé wé na: Tame sôbe beta minkeññ a yam étutu'a été asu nsamba bekulu mejô.

³⁹ Wua ya be be a nga ke afan a jebe bilok. Nde a nga koone ndi'i woone ya fé vôm ate, a nga to'é ngon afan a jalé je éndelé jé été. Ane a nga bulan a tyi'i je bifuse bifus e minkeñe étutu'a été, amu be nji tu'a yeme jôm étutu'a te é mbe.

⁴⁰ Nde be nga ve bôte bidi. Ve nné ane be nga tye'e étutu'a te, be nga bete metyiñe yôp a jô na: Awu e ne minkeññ été a môta Zambe! Ajô te be nga bo te fe nguleya di.

⁴¹ Ane môta Zambe a nga jô na: Za'ane ma avut! Nde a nga futi de minkeññ été a jô na: Va'a bôt be di! Jôm éziñ é n'abé é nji fe beta bo minkeññ été.

Elizé a bo belet abui abui

⁴² Ane môt éziñ a nga so Balkalisa. A nga soo môta Zambe belet ya *bembômô: belet fôn mewôm mebaé a mfefé blé e nkuta wé été. Elizé a nga jô na: Va'a bôte ba be di.

⁴³ Ane mbo ésaé wé a nga yalane nye na: Me ne nguleya ve je bôte ntet aya? Ve Elizé a nga jô na: Va'a bôte bete be di amu avale di nde Nti a kobô na: Ba ye di a *mebuka'a ma ye li'i.

⁴⁴ Nde a nga telé belet ôsu viap; be nga di a *mebuka'a me nga li'i avale nkobô Nti ô mbe.