2 Bb. 23 - Kalate Zambe Nnomo a Mfefe Mfefé Nkôñelan

Yôzias a kôme mam

¹ Ane njô bôt a nga lôme tyiñe na, be sulane bemvendé bese ya Yuda e fefele jé Yérusalém.

² Eyoñe te njô bôt a nga bet e *nda Nti, baa be bôte bese ya Yuda a ba bese be too Yérusalém, betuni, bekulu mejô a ayoñ ese, ataté môt a ne tyôtyoé a kui nyô a ne anen. Ane a nga lañe mejô mese me mbe kalate élat été nye be nga som e *nda Nti. A nga lañe nye e melo map.

³ Njô bôt a nga tele e fôsbôdene yôp, e mise me Nti, nde a nga bo élate ji na, a ye tôñe Nti a ba'ale mebendé mé, miñye'elane mié, a minjôane mié, a e nleme wé ôse, a nsisime wé ôse, nalé a ye ba'ale mejô ya élate te, mme me ne ntilan e kalate ate été; a bôt bese be nga nyiin élat été.

⁴ Ane njô bôt a nga bendé Ilkiya *ntuni nnen, betuni be ne beba'a, a beba'ale *mbé na, be kuli e biôm bise bi nga boban asu *baal atane ya *nda Zambe Nti, nalé fe bi bi nga boban asu akéra, a ateté ese ya yôp; a nga di'i bie e Yérusalém atan, e mesi ya Sédroñ, a bo na, be be'e asube y'été a kee de e Bétél.

⁵ A nga vaa betuni bejô bôte ya Yuda be nga telé, e too na, be nga bo be diki'i beôlobinda e bito ya bikôndô'ô yôp, e bitisone ya Yuda, a e mevôm ma bômane Yérusalém; a nga vaa fe ba be mbe be diki'i beôlobinda asu *baal, jôp, ngon, ateté e tii a jôp, a beta nsamba ateté ase ya yôp.

⁶ A nga vaa akôn akéra e *nda Nti été, a kee de e Yérusalém atan, e mbi'ili Sédroñ; a nga di'i de nduan e mbi'ili Sédroñ e ntoo ve asub asup. A nga wua asube y'été e soñe bôte ya ayoñe yôp.

⁷ A nga tyame menda bebo ébamba mme me mbe e *nda Nti été, e vôm ate nye binga be nga bo be tiñe bindelé ya buti akôn akéra.

⁸ A nga loone betuni bese ya bitisone ya Yuda; a nga ve bito ya bikôndô'ô yôbe mvin, e vôme betuni be mbe be diki'i beôlobinda, ataté Géba a kui Birséba; a nga tyam bito ya bikôndô'ô yôp bi mbe e fefele mimbé, e ji é mbe anyiine ya *mbé Yasua, évete ya tison, e ji é mbe mbo ngal, éyoñe be mbe be nyi'in e *mbé ôse ya tison môt a ne kômbô nyiin.

⁹ Ve da na, betuni ya bito ya bikôndô'ô yôp be nji bo nguleya bet ata'a metuna'a Nti e Yérusalém; be mbe nguleya di ve belet é ne te mvusan ézezañe bobenyañ.

¹⁰ Njô bôt a nga ve Tôfét mvin, nyô a mbe mbi'ili mona Inom nalé môt a ye bo te beta di'i monafame wé nge monaminga wé e nduan asu duma Molok.

¹¹ A nga vaa bikabela bejô bôte ya Yuda be nga telé asu duma jôb anyiine ya *nda Nti, bebé a étune *nda mia'a ba loone na Nétan-Mélék, nje éte é mbe mfa'a ya mbala'a si; a nga di'i bevagoñe be jôb e nduan.

¹² Njô bôt a nga tyame fe meta'a metuna'a me mbe mbala'asi étune *nda Akaz ya yôp, mme bejô bôte ya Yuda be nga telé, nalé fe meta'a metuna'a Manasé a nga lôñ e minseñe mibaé ya *nda Nti; A nga vaa me valé a wua asube y'été e mbi'ili Sédroñ.

¹³ Njô bôt a nga ve bito ya bikôndô'ô yôb bi nga too Yérusalém nka'a yate mvin, e nkôl éndaman, mfa'a ya nké, mbie Solômon a nga lôñ asu duma astarté, mbia jôme Besidônieñ, duma Kemôs, mbia jôme Môab, duma milkom, angôndô bone b'Amon.

¹⁴ A nga bu'u mekône *mekok, a ba'é mekôn m'akéra a jalé mevôm me nga tele a bivese bi bôt.

¹⁵ Yôzias a nga tyame fe ata'a metuna'a e mbe e Bétél, a éto ya ékôndô'ô yôp Yérôbôam, e mone Nébat, a nga lôñe na a dutu Israél a bo abé; a nga tyam ata'a metuna'a te a éto jé ya ékôndô'ô yôp, a di'i éto ya ékôndô'ô yôp a bo je v'asub asup, a nga wua fe akôn akéra e nkaba'a nduan été.

¹⁶ Eyoñ a nga bulan, Yôzias a nga yene mesoñ me nga too e nkôle yôbe valé; ane a nga lôme bôt be ke nyoñe bivese ya mesoñ mete na, a di'i bie ata'a metuna'a yôp: a nga ve de mvin avale mejô me Nti me mbe, mme môta Zambe a nga yôtan.

¹⁷ Yôzias a nga beta sili na: Za a ne nlôñane soñe wuli? Nde bôte ya tison be nga yalane na: E soñe môta Zambe a nga so Yuda a yôtan e mam ô ndôme mane tôé e ata'a metuna'a ya Bétél nje le.

¹⁸ Ane a nga jô na: Jôka'ane je! Môt a bo'o te nnambe bivese bié! Nde be nga li'i bivese bié a bi bi *nkulu mejô a nga so Samari.

¹⁹ Yôzias a nga mane fe tyam menda mese me mbe bito ya bikôndô'ô yôp, e bitisone ya Samari bejô bôte ya Israél be nga lôñ asu ya soñe Nti na a yaa. A nga bo bie aval ébien a nga bo bi ya Bétél.

²⁰ A nga wôé betuni bese ya bito bi mbe bikôndô'ô yôp, e bitisone bite, e meta'a metuna'a yôp; a nga di'i fe bivese bi bôt été yôp. Eyoñe te a nga bulan e Yérusalém.

Abô'ô Pak, awu Yôzias

²¹ Ane njô bôt a nga ve bôte bese abendé di na: Jeman abô'ô Pak asu duma Nti, e Zambe wônan, aval e ne ntilan e kalate élat.

²² Be nji tame jem avale pa'a te, ataté éyoñe betyi'i mejô be nga jôô Israél, to'o éyoñe bejô bôte ya Israél a Yuda be nga jôô.

²³ Ve mbu awôm a muame Yôzias a nga jôô, ñwô be nga jeme Pak éte e Yérusalém asu duma Nti.

²⁴ Yôzias a nga mane fe vos ba be mbe be bi'i bekôn a ba be mbe be bi'i mame ya melu ôsu, betérafim, bengunemelan a mbuan ôse be mbe be yenek e si ya Yuda a e Yérusalém, nalé mejô ya metiñ ma ye tôéban, mejô me mbe ntilan e kalate *ntuni Ilkiya a nga som e *nda Nti.

²⁵ Njô bôte mfe a nji bo nye ôsu, a too nyô a nga bulan e be Nti a nleme ane nye, a wulu'u ane metiñe me Môze mese me né. Mvuse jé, mfe a nji tebe a too nalé.

²⁶ Ve Nti a nji bulane mvus, éyoñe ya beta ayaa a nga kalane nye ane nduan mfa'a Yuda, amu *abé ese Manasé a nga bo nye.

²⁷ Nti a nga jô na: To'o Yuda, ma ye fe telé nye fefe a kôlô e vôme me né, avale me nga telé Israél e fefe, ma ye ben e tisone me nga top, Yérusalém, nalé fe e *nda me nga jô na: E jôé dam da ye tabe valé.

²⁸ Mimboon mivo'o mi Yôzias, mam mese a nga bo, ye me nji bo ntilan e kalate minkañete bejô bôte ya Yuda'

²⁹ E melu mé, Faraoñ Nékô, njô bôte ya Ejipte, a nga bet a ke tôbane njô bôte ya Asiri mfa'a ya Efrat. Eyoñe te njô bôte Yôzias a nga wulu a ke tôbane nye, ve Faraoñ, nné ane a nga yene nye, a nga wôé Yôzias e Megidô.

³⁰ Eyoñ a wuya, bebo bisaé bé be nga be'e nye e vagoñ a kee nye Megidô e Yérusalém. Be nga jame nye e soñe jé. Ane bôt be nga too Yuda be nga nyoñe Yôakaz, e mone Yôzias a wo'o nye mbon, a telé nye njô bôt éjian ésaa wé.

Yôakaz, njô bôte ya Yuda

³¹ Yôakaz a nga bili mimbu mewôm mebaé a mila éyoñ a nga tebe njô bôt; a nga jôô ngon éla e Yérusalém. Nyia a mbe jôé na: Amutal, ngone Yérémi ya Libna.

³² A nga bo mam me ne *abé e mise me Nti, mezene mese, aval b'ésaa bé be nga bo.

³³ Faraoñ Nékô a nga ka'a nye ngata'a e Ribla, e si Amat na, a bo te beta jôô e Yérusalém. A nga sili Yuda *toya a too betalañ be argent ntet a talañ or wua.

³⁴ Faraoñ Nékô a nga telé Eliakim, e mone Yôzias njô bôt, éjian ésaa wé Yôzias. A nga tyendé nye jôé a yôlé nye na Yehôyakin. A nga bi Yôakaz mbôk a zuu nye Ejipte, vôm ate a nga wu.

³⁵ Yehôyakin a nga ve Faraoñ argent a or, ve a nga taté yemelan abim akum e ne si jé, asu ya ve moné ate, aval abendé Faraoñ e mbe; a nga miate bôte ya si jé na be ve Faraoñ Nékô argent a or, môt ase aval ane tañe jé é né.

Yéhôyakim, njô bôte ya Yuda

³⁶ Yehôyakin a nga bili mimbu mewôm mebaé a mitan éyoñ a nga tebe njô bôt; a nga jôô mimbu awôm a wua e Yérusalém. Nyia a mbe jôé na Zebuda, ngone Pedaya ya Ruma.

³⁷ A nga bo mam me ne *abé e mise me Nti, e mezene mese, avale b'ésaa be nga bo.