2 Bb. 21 - Kalate Zambe Nnomo a Mfefe Mfefé Nkôñelan

Manasé, njô bôte ya Yuda

¹ Manasé a mbe mimbu awôm a mibaé éyoñ a nga tebe njô bôt. A nga jôô mimbu mewôm metan e Yérusalém. Nyia a mbe jôé na Efsiba.

² A nga bo mam me ne *abé e mise me Nti, a nga ve émien mfa'a beangôndô mimboone meyoñe Nti a nga wôlé biôm ôsu bone b'Israél.

³ A nga beta lôñe bito ya bikôndô'ô yôp mbie ésaa wé Ezékias a nga mane vaa, a nga lôñe *baal meta'a metuna'a, a nga bo akône akéra aval Akab, njô bôte ya Israél a nga bo, a nga kut ateté ya yôbe meboñe si a kañe de.

⁴ A nga lôñe meta'a metuna'a e *nda Nti nje Nti a nga jô na: E Yérusalém, nye ma ye tooé jôé dam.

⁵ A nga lôñ ateté ya yôbe meta'a metuna'a e minseñe mibaé ya *nda Nti.

⁶ A nga di'i monafame wé e nduan; a nga bi'i mame ya melu ôsu a bo majik. A nga telé bôt ba loone bôt be maneya wu be bi'i fe mame ya melu ôsu. A nga ke ôsu a dañe bo mam me n'abé e mise me Nti a bo nye na a wô'ôlun.

⁷ A nga telé éve'ela akéra a nga bo e *nda Nti a nga jô David a mone wé Solômon na: E *nda nyô a e Yérusalém nye me nga tob e *meyoñ mese ya Israél été na, ma ye tooé jôé dam nnôm éto;

⁸ Ma ye bo te beta bo na, mebo me Israél me ndeñ atane ya si me nga ve b'ésaa, nge ba ba'ale a bo mam mese me nga bendé be, aval ane *atiñ ese mbo ésaé wom Môze a nga ve be e né.

⁹ Ve be nji ke wôk, a Manasé a nga yale be feñ, a kui na be nga bo *abé a dañe meyoñe Nti a nga tyam ôsu bone b'Israél.

¹⁰ Eyoñe Nti a nga kobô a anyu bebo bisaé bé bekulu mejô na:

¹¹ Amu Manasé, njô bôte ya Yuda a nga bo beangôndô be mame bana, amu a nga bo éndaman a dañe mam mese Beamorééñ be nga bo nye ôsu, a amu a nga bo na Yuda a bo *abé a bengunemelane bé,

¹² ajô te ñhe Nti, Zambe Israél, a kobô na: Ma zuu bidim e Yérusalém a e Yuda, e too na, melo ma ye bo ne miaññ e be nyô ase a ye wô'ô be kobô'ô jame te.

¹³ Ma ye limi nkole Samari a lévo ya *nda Akab, e tisone Samari. Ma ye fimi Yérusalém ane ba fimi beta ésua a buti nye asu si, éyoñe be maneya nye fimi.

¹⁴ Nde ma ye telé *mebuka'a ye ngabe jam e fefe, a kee be e mo besiñe bap; besiñe bab bese ba ye sa be a telé be soé,

¹⁵ Amu be nga bo mam me n'abé e mise mam, a bo na me wô'ô ôlun, ataté môse b'ésaa be nga kôlô Ejipte, a kui e môse wu.

¹⁶ Manasé a nga kuli fe metyi abui me ne teke bijô, a jalé Yérusalém a metyi mete, ataté aku'u di a kui di avok, te lañ *abé a nga dutu Yuda na a bo mam me ne *abé e mise me Nti.

¹⁷ Mimboone mivo'o ya be Manasé, ma mese a nga bo, a *abé a nga bo, me ne ntilan e kalate minkañete bejô bôte ya Yuda.

¹⁸ Manasé a nga bômbô baa b'ésaa a jambe afube ya *nda jé, afube Uza. Mone wé Amon a nga jôô éjiane jé.

Amon, njô bôte ya Yuda

¹⁹ Amon a nga bili mimbu mewôm mebaé a mitan éyoñ a nga tebe njô bôte, a nga jôô mimbu mibaé e Yérusalém. Nyia a mbe jôé na Mesulémét, ngone Arut ya Yôtba.

²⁰ A nga bo mam me ne *abé e mise me Nti, aval ésaa wé Manasé a nga bo;

²¹ A nga wulu e *zen ése ésaa wé a nga wulu, a nga kañe bengunemelan ésaa a nga kañ a kute be meboñe si;

²² A nga li'i Nti, e Zambe b'ésaa, a a nji wulu e zene Nti.

²³ Bebo bisaé b'Amon be nga bôndé fe'e ya bo nye *abé. Be nga wôé njô bôt e *nda jé été.

²⁴ Ve bôte ya si éte be nga wôé bôte bese be nga bôndé fe'e ya bo njô bôt Amon abé; nde be nga telé mone wé Yôzias njô bôt éjiane jé.

²⁵ Miboone mivo'o ya b'Amon a mam a nga bo, bi ne ntilan e kalate minkañete bejô bôte ya Yuda.

²⁶ Be nga jame nye e soñe jé, afube Uza. Mone wé Yôzias a nga jôô éjiane jé.