2 Bb. 18 - Kalate Zambe Nnomo a Mfefe Mfefé Nkôñelan

Ezékias, njô bôte ya Yuda

¹ Mbu lale Ozé, e mone Ela, njô bôte ya Israél a nga jôô, ñwô Ezékias, e mone Akaz, a nga tebe njô bôte ya Yuda.

² A nga bili mimbu mewôm mebaé a mitan, éyoñ a nga tebe njô bôt, a a nga jôô mimbu mewôm mebaé a ébu e Yérusalém. Nyia a mbe jôé na Abi, ngone Zakari.

³ A nga bo mam me ne *zôsôô e mise me Nti, aval ébien ésaa wé David a nga bo.

⁴ A nga vaa bito ya bikôndô'ô yôp, a nga bu'u mekôn a tyi'i fe akôn Akéra, a bo nyo mvot Môze a nga kôm bifuse bifus, amu a kui éyoñe te, bone b'Israél be nga di'i alobinda ôsu nyo mvot éte. Be nga loone je na Nehustan.

⁵ A nga futi ndi jé e be Nti, e Zambe Israél; bejô bôte bese be mbe nye ôsu a ba bese be mbe nye mvus, mfe a nji bo ane nye.

⁶ A nga kabetane Nti, teke kandane nye, a a nga ba'ale mebendé Nti a nga ve Môze.

⁷ A Nti a nga too be nye. Mam mese a nga bo, me nga ke ôsu. A nga bene njôane njô bôte ya Asiri teke beta ke éjôé jé si.

⁸ A nga bo njôô Befilisteñ a kui Gaza a si jé ataté azomezome menda bemombô ba tabe a kui bitison bi bili alem.

⁹ Mbu nyini njô bôt Ezékias a nga jôô, ô too e wu zamgbwale Ozé, e mon Ela, njô bôte ya Israél nye ki a nga jôô, Salmanazar, njô bôte ya Asiri, a nga bete na a jimbi Samari a dili nye bita.

¹⁰ A nga nyoñe nye e mvuse mimbu mila. Samari a nga nyoñeban e mbu ébulu Ozé, njô bôte ya Israél a nga jôô.

¹¹ Njô bôte ya Asiri a nga mane kee bôte ya Israél minkôm Asiri, a nga lumbu be e Ala a e Abor, ôsôé ya Gôzan, a nga kee fe be e bitisone ya Médés,

¹² amu be nji ke vô'ôlô tyiñe Nti, e Zambe wop, a amu be nga tyam élate jé, amu be nji ke vô'ôlô nge bo mam mese Môze, mbo ésaé Nti a nga bendé.

Sénakérib, njô bôte ya Asiri a dili Yérusalém bita

¹³ Mbu awôm a nyini njô bôt Ezékias a nga jôô, ñwô Sénakérib, njô bôte ya Asiri, a nga bete na a jimbi bitisone bise ya Yuda bi bili alem a nyoñe bie.

¹⁴ Ane Ezékias njô bôte ya Yuda a nga lôme bôte be kate njô bôte ya Asiri e Lakis na: Mbe'e ôse wo ye titi bitule biam, ma ye be'e wô. Eyoñe te njô bôte ya Asiri a nga sili Ezékias, njô bôte ya Yuda: betalañ be argent mintete mila a ba be or mewôm mela.

¹⁵ Nde Ezékias a nga ve argent ase a nga too e *nda Nti a nyô a nga too akume ya *nda njô bôt été.

¹⁶ Melu mete Ezékias a nga mane tyame mimbé ya Nda Zambe a mimbô'ô y'été, a vaa or a nga mane yañ été a ve nye njô bôte ya Asiri.

¹⁷ Ane njô bôte ya Asiri a nga lôme bôte ba e Yérusalém e be njô bôte Ezékias be so'o Lakis: Tartan, Rab. Saris a Rabsaké, be bili ngule nsamba mewosan. Be nga bet a kui Yérusalém. Eyoñe be beteya a kui, nde be nga tebe e beta ékasa'a ya ôsôé akôé, mfa'a zene ya afube ndube biôme meyañ é né.

¹⁸ Nde be nga loone njô bôt; ane Eliakim e mone Ilkiya, mba'ale akume ya *nda njô bôt a nga ke e vôme be mbe, ba Sebna ñyeme bekalate a Yôa, e mone Asaf, mba'ale mintilan.

¹⁹ Rabsaké a nga jô be na: Ma ye'elane mia mi kate Ezékias na: Avale di nde njô bôte ya Asiri a kobô na: Jé nje ô too je ndi'

²⁰ Ô nga jô a zesé bifia ya ñyeme na: Éfia jia étam ja yian asu ya bi *melep a ngu e mewosan. Eyoñe ji za nye ô too nye ndi éyoñ ô nga ben éjôé jam'

²¹ Eyoñe ji ô too ndi a Ejipte, zesé ntusane nkaé te, ñwô wo nyiin a tube wo ya nyô ase a ye'ebe be nye; avale Faraoñ, njô bôte ya Ejipte a né e be ba bese ba tabe nye ndi nde le.

²² Eyoñ éziñ wo ye jô me na: Bi too ndi e be Nti e Zambe wongan. Ve da na: Ye sa Nti ate nye a ne bito ya bikôndô'ô yôp a meta'a metuna'a Ezékias a nga mane vaa a jô'ô Yuda a Yérusalém na: Mia ye kute meboñe si ôsu ya ata'a metuna'a te e Yérusalém.

²³ Ajô te éyoñe ji, a ntoo ve kui *tyiñ a masa wom, njô bôte ya Asiri, a ma ye ve wo bikabela toyini ébaé, nge womien ô ne yene bebebe bikabela ya bet été yôp.

²⁴ Ô ne ben évete jia ya bebo bisaé be masa wom ba dañe tyôtyoé aya? Wo kôme tabe ndi a Ejipte amu bevagoñ a bewulu bikabela!

²⁵ Ye ma te bet a jimbi vôme nyô a tyame nye te na Nti a kañese jame te? Nti a nga jô me na: Betek a wosane si éte a tyame je.

²⁶ Ane Eliakim, e mone Ilkiya, Sebna a Yôa be nga jô Rabsaké na: Bia ye'elane wo na ô kobô bebo bisaé bôé aramééñ, amu nye bia wôk; ve te kobô bia nkobô Beyude e melo me bôt be too aka'a yôp.

²⁷ Rabsaké a nga yalane be na: Ye masa wom a te lôme ma na, me kate mia be masa wôé mejô ma? Ye sa bôt be too aka'a yôbe ba na: Ba di mebi map a nyu menyôlô'ô map, mia be be mbe a te lôme na me kate mejô mete.

²⁸ Eyoñe te Rabsaké a nga tebe, a yôtan a ngul ése e nkobô Beyude na: Vô'ôla'ane nkobô ya beta njô bôt, njô bôte ya Asiri!

²⁹ Avale di nde njô bôt a kobô na: Ezékias a bo'o te du'u mia amu a se nguleya kôté mia e mo mam.

³⁰ Ezékias a bo'o te dutu mia na mi tabe ndi e be Nti a jô'ô na: E ne fo'o a bebela na, Nti a ye kôté bia, a tisone nyô ja ye bo te fam e mo me njô bôte ya Asiri.

³¹ Te vô'ôlane Ezékias; amu avale di nde njô bôte ya Asiri a jô na: Taba'ane ma *mvo'é, su'ane miabebiene si be ma, éyoñe te môt ase ya be mia a ye di bibuma ya afube mindi'i dé a bi ya figié wé, a môt ase a ye nyu mendime ya anjeñe dé,

³² akekui ma ye so a kee mia e si é ne ane énjenan, e si é bili fôn a woon, e si é bili bidi a mefube mindik, é bili bilé bi ôlive, é bili mbon a wôé; éyoñe te mia ye nyiñ teke wu. Ajô te te vô'ôlan Ezékias; amu a ne nguleya solé mia a jô'ô na: Nti a ye kôté bia.

³³ Ye bezambe ya *meyoñ be nga tame nyii, *zambe ase si jé, e mo me njô bôte ya Asiri? Bezambe ya Amat a ba ya Arpad be ne vé'

³⁴ Bezambe ya Sefarvayim, Ena a Iva be ne vé? Ye be nga kôté Samari e mo mam'

³⁵ Bezambe ya mesi mevé be nga kôté si jap e mo mam ane Nti a ne kôté Yérusalém e mo mam'

³⁶ Ane bôte be nga tabe bivô, teke yalane nye ajô da; amu njô bôt a nga ve abendé na: Mia ye bo te yalane nye.

³⁷ Eliakim, e mone Ilkiya, mba'ale akume ya *nda njô bôt Sebna, ñyeme bekalate a Yôa e mone Asaf, mba'ale mintilan, be nga zu be Ezékias, mengômesan nyaban, a kate nye nkobô Rabsaké.