2 Bb. 16 - Kalate Zambe Nnomo a Mfefe Mfefé Nkôñelan

Akaz, njô bôte ya Yuda

¹ Mbu awôm a zamgbwale Péka, e mone Remaliahu, a nga jôô, ñwô Akaz, e mone Yôtam a nga tebe njô bôte ya Yuda.

² Akaz a nga bili mimbu mewôm mebaé éyoñ a nga tebe njô bôt, a nga jôô tañe mimbu awôm a misaman e Yérusalém. A nji ke bo mam me ne *zôsôô e mise me Nti, avale David ésaa wé a nga bo.

³ A nga wulu e zene bejô bôte ya Israél, a kui vôme ya di'i mone wé e nduan, aval'ane b'angôndô mimboone ya meyoñe Nti a nga wôlé biôm ôsu bone b'Israél be mbe.

⁴ A nga ve mimvean a beôlobinda e bito ya bikôndô'ô yôp, e minkôle yôp a élé ése é ne nyumi si.

⁵ Ane Retsin, njô bôte ya Siri a Péka, e mone Remaliahu, njô bôte ya Israél, be nga bete na, ba ke wosane Yérusalém. Be nga bômane Akaz bita ve be nji kui na be dañe nye.

⁶ Eyoñe te fe Retsin, njô bôte ya Siri, a nga bulan éjôé Besirieñ si, a nga titane Beyude be nga too Elat, a b'Edomite be nga zu Elat vôm ate be too a kui môse wu.

⁷ Akaz a nga lôme minlôman e be Tiglat-Piléser, njô bôte ya Asiri be kate nye na: Me ne mbo ésaé wôé a mone wôé; betek, ô nyii ma, e mo me njô bôte ya Siri a mo me njô bôte ya Israél, mbe ba tebe a wosane ma.

⁸ Akaz a nga nyoñe argent a or bi nga too e *nda Nti, a akume ya *nda njô bôt été, a lôme bie ane éboteze e be njô bôte ya Asiri.

⁹ Ane njô bôte ya Asiri a nga wô'ô nye: njô bôte ya Asiri a nga bete na a wosane Damas, nde a nga nyoñe nye, a kele bôte be too été minkôme Kir, a a nga wôé Retsin.

¹⁰ Ane njô bôt Akaz a nga ke Damas, a ke tôbane Tiglat-Piléser njô bôte ya Asiri. Eyoñ a nga yen ata'a metuna'a ya Damas, njô bôte Akaz a nga lôme *ntuni Uri nkañete ya ata'a metuna'a ete, a avale biôm bise y'été bi né.

¹¹ Ntuni Uri a nga lôñ ata'a metuna'a, mevôm mese me too, avale njô bôt Akaz a nga mane kate nye a too Damas, a *ntuni Uri a nga mane lôñe nye te na njô bôt Akaz a so Damas.

¹² Ane njô bôt a nga bulan, a so'o Damas, a nga yen ata'a metuna'a, a subu de bebé, a bet été yôp;

¹³ A nga di'i mveane wé ô ne ngumba a mvean avut, a sôé woon a mbone wé, a miame fe metyi *bityi'a ya nlatane ngbwa ata'a metuna'a yôp;

¹⁴ wôna mfa'a ya ata'a metuna'a mvot e mbe asu be Nti, a nga vaa de e vôm e mbe e *nda ôsu, e zañe mfefé ata'a metuna'a a *nda Nti, ane a nga telé de e fefele mfefé ata'a metuna'a mfa'a ya akôé.

¹⁵ Ane njô bôt Akaz a nga bendé *ntuni Uri na: Wo yiane di'i mveane ya mametyé ô ne ngumba, a mvean avute ya mamengô'é, mveane njô bôt ba di'i ngumba, a wu njô bôt ô n'avut, mveane bôte bese ya si ba di'i ngumba, a mvean avute wop, wo yiane di'i bie e beta ata'a metuna'a yôp, a sôé fe woon a mbon été yôp, wo ye fe miame metyi mese ya mimvean ba di'i ngumba, a metyi mese ya *bityi'a été yôp. E di da fombô ata'a metuna'a mvot, mamien ma ye fas ajô y'été.

¹⁶ Nde *ntuni Uri a nga bo aval'ése njô bôt Akaz a nga bendé.

¹⁷ Ane Akaz, njô bôt, a nga tyi'i biteba'a ya si bitun bitun, a vaa fe befandé ba sôbane be e vôm be nga bete, a nga sili fe mañ me mvot si, mme me nga bete e benya'a be mvote yôb, a beté me e nta'ane meko'o yôp.

¹⁸ Amu njô bôt ya Asiri, Akaz a nga tyendé vôm ba tabe a mbe yôp e *nda Nti, nye be nga lôñ asu Sabat, e *nda été, a tyendé fe vôme njô bôt a nyiin e mfa'a ya atan.

¹⁹ Mimboone mivo'o ya be Akaz a mam mese a nga bo bi ne ntilan e kalate minkañete bejô bôte ya Yuda.

²⁰ Ane Akaz a nga bômbô baa b'ésaa vôme wua, a be nga jame nye baa b'ésaa e tisone David. Mone wé Ezékias a nga jôô éjiane jé.