2 Bb. 14 - Kalate Zambe Nnomo a Mfefe Mfefé Nkôñelan

Amatsia, njô bôte ya Yuda

¹ Mbu baa Yôas e mone Yôakaz, njô bôte ya Israél a nga jôô ñwô Amatsia e mone Yôaz a nga tebe njô bôte ya Yuda.

² A nga bili mimbu mewôm mebaé a mitan éyoñ a nga tebe njô bôt a a nga jôô tañe mimbu mewôm mebaé a ébu e Yérusalém. Nyia a mbe jôé na Yehôadan, ngone ya Yérusalém.

³ A nga bo mam me ne mvaé e mise me Nti, ve sa ñhe ane David ésaa wé; a nga bo mam aval ébien ésaa Yôaz a nga bo.

⁴ Ve bito yo bikôndô'ô yôp bi nji vas; bôt be nga ke ôsu a ve mimvean a beôlobinda e bito ya bikôndô'ô yôp.

⁵ Eyoñ éjôé é nga bo ngu e mo mé, a nga wôé bebo bisaé bé be nga wôé njô bôt ésaa wé.

⁶ Ve a nji wôé bone be bôt be nga wôé ésaa, aval e ne ntilan e kalate metiñe Môze, e vôme Nti a bendé na: Ba ye bo te wôé *bon étom b'ésaa; ve môt ase a ye wu étome ya *abé dé.

⁷ A nga wôé Beédomite toyini awôm e mbi'ili nku; ézezañe bita, a nga nyoñe tisone Séla, a yôlé je jôé na Yôktél; jôé te e ne a zu kui môse wu.

⁸ Ane Amatsia a nga lôme minlôman e be Yôas e mone Yôakaz, e mone Yéhu, njô bôte ya Israél, be kate nye na: Za'ak, bia zu tômetan!

⁹ Nde Yôas njô bôte ya Israél a nga lôme bôt be kate Amatsia njô bôte ya Yuda na: Nsinik ya Libañ ô nga lôme *tyiñ e be Sédre ya Libañ na: Va'a mone wom ngo jôé a lu'u je! Ve betite ya afan be ne Libañ be nga lôt a mane tibi nsinik.

¹⁰ E ne fo'o na ô nga dañe b'Edomite, a e nleme wôé ô ne mevak amu nalé. Tame vak a duma dôé a tabe'e e jale dôé. Amu jé wo kômbô wua womien e bita bia ye soo wo minjuk'

¹¹ Ve Amatsia a nji ke wô'ô nye. Ane Yôas, njô bôte ya Israél a nga bet; be nga tômetan, nye a Amatsia, e Bétsemék ya Yuda.

¹² Ane Israél a nga dañe Yuda, a môt ase a nga tup e *nda éndelé jé.

¹³ Yôas njô bôte ya Israél a nga bi Amatsia njô bôte ya Yuda, e mone Yôaz, e mone Akazia mbôk e Bétsemék. A nga zu Yérusalém a sale mfine ya Yérusalém; nsalane te ô mbe menyi'i me mo mintete minyin, ataté *mbé y'Efrayim a kui *mbé ya abu'u *nda.

¹⁴ A nga nyoñe or, argent, a biôm bise bi nga too e *nda Nti a akume ya *nda njô bôt; a nga bi fe bôt, mvus éte a nga bulan e Samari.

¹⁵ Mimboone mivo'o Yôas, mam mese a nga bo, éwôlô jé, bita ba Amatsia njô bôte ya Yuda be nga bo mam mete me ne ntilan e kalate minkañete bejô bôte ya Israél.

¹⁶ Ane Yôas baa b'ésaa be nga bômbô vôme wua, a nga jambe e Samari baa be bejô bôte ya Israél. E mone wé Yérôbôam a nga jôô éjiane jé.

¹⁷ Amatsia, e mone Yôas, njô bôte ya Yuda, a nga nyiñ mimbu awôm a mitan e mvus awu Yôas e mone Yôakaz, njô bôte ya Israél.

¹⁸ Mimboon mivo'o Amatsia, a nga bo, mi ne ntilan e kalate minkañete bejô bôte ya Yuda.

¹⁹ Be nga kômesane wôé nye e Yérusalém, ane a nga tup e Lakis; ve be nga tôñe nye e Lakis wé, a vôm ate nye be nga wôé nye.

²⁰ Be nga be'e nye e bikabela yôp a be nga jame nye e Yérusalém baa b'ésaa e tisone David.

²¹ Nde bôte bese ya Yuda be nga nyoñ Azaria a too mimbu awôm a misaman, a telé nye njô bôt éjian ésaa wé Amatsia.

²² Nye a nga lôñ Elat a bulane nye éjôé Yuda si a koé na njô bôt a wuya.

Yérôbôam baa njô bôte ya Israél

²³ Mbu awôm a tane Amatsia e mone Yôaz, njô bôte ya Yuda a nga jôô, ñwô Yérôbôam, e mone Yôas, a nga tebe njô bôte ya Israél e Samari. A nga jôô nté mimbu mewôm menyin a wua.

²⁴ A nga bo mam me ne *abé e mise me Nti, a nji ke sa'ale *abé éziñe ya ma Yérôbôam, e mone Nébat, a nga tindi Israél na a bo.

²⁵ A nga beta kôme minné mi si ya Israél, ataté anyiine Amat a kui mañ ya Araba, avale Nti, e Zambe Israél a nga kobô anyu mbo ésaé wé Yôna e mone Amitayi ya Gat-Efer.

²⁶ Amu Nti a nga yen mbia ôsame a nga kui e be Israél. Olo ô nji fe bo, nge môte a ne fili, nge môt a volô Israél.

²⁷ Nti a nji ke jô na a ye tyame jôé Israél e jôbe si. Ajô te ñhe a nga nyii be a wo Yérôbôam e mone Yôas.

²⁸ Mimboon mivo'o Yérôbôam, mam mese a nga bo, mindañane mié, mewosane mé a nga bulane ve Israél Damas a Amat mbe be nga wô'a Yuda melu mvus, mam mete me ne ntilan e kalate minkañete bejô bôte ya Israél.

²⁹ Ane Yérôbôam a nga bômbô baa b'ésaa a bejô bôte ya Israél vôme wua. E mone wé Zakari a nga jôô éjiane jé.