2 Bb. 12 - Kalate Zambe Nnomo a Mfefe Mfefé Nkôñelan

Yôaz, njô bôte ya Yuda. Nkômane * nda Zambe

¹ Yôaz a nga bili mimbu zamgbwa éyoñ a nga tebe njô bôt.

² Mbu zamgbwale Yéhu, ñwô Yôaz a nga tebe njô bôt, a nga jôô mimbu mewôm menyin e Yérusalém. Nyia a mbe jôé na Sibiya, ngone ya Birséba.

³ Yôaz a nga bo mam me ne *zôsôô e mise me Nti nté ôse a nga tôñ melebe me Ntuni Yehôyada.

⁴ Ve bito ya bikôndô'ô yôp bi nji ke vas; bôt be nga ke ôsu a ve mimvean a beôlobinda e bito ya bikôndô'ô yôp.

⁵ Ane Yôaz a nga jô betuni na: Moné ase a ne ntelan étyi ba zuu nye e *nda Nti, nyô ba bo nye ésaé a too na: Moné môt ase a ve aval'ane ngule jé é né, nyô môt ase a ve *nda Nti aval'ane ésôse jé é né,

⁶ Betuni be nyoñe moné ate, môt ase e be bôt *a yem, asu ya kôm mevôm me ne ndaman, e vôm ase ba ye koone me.

⁷ Ve e nga kui na mbu mewôm mebaé a lale njô bôte Yôaz, betuni be nji ke kôm mevôme ya *nda me mbe ndaman.

⁸ Eyoñe te Yôaz a loone Ntuni Yéhôyada a betuni bevok a jô be na: Amu jé mi nji ke kôm mevôme ya *nda me ne ndaman? Eyoñe ji mia ye bo te beta nyoñe moné e be bôt mia yem, ve mia ye ve nye asu nkômane *nda.

⁹ Eyoñe te *ntuni be nga kañese na ba ye bo te beta nyoñe bôte moné, nge kôme mevôme ya *nda me ne ndaman.

¹⁰ Ane Ntuni Yehôyada a nga nyoñ éwolo, ve tub *abé ébuta'a, a telé éwolo e fefel ata'a metuna'a e mbo nnôm, e *zen é ne anyiine ya *nda Nti. Betuni ba ba'ale *mbé, be mbe be futi'i e moné ase ba zuu nye *nda Nti éwolo été.

¹¹ Eyoñ ba yene na moné a ntoo abui éwolo été, Ntili bekalate Njô bôt a Ntuni nnen be nga bete na be futi moné a nga too *nda Nti minkuta a lañe nye.

¹² E moné be maneya lañ, be nga kalane nye e mo me bôt be mbe ntelane ya wulu bisaé ya *nda Nti. Be nga belane moné ate, asu ya ya'ane bebo mendil a bebete mimfin be nga bo be saék e *nda Nti,

¹³ asu bemaot a beba *mekok, asu nkusane bilé a meko'o me ne mbaan, mbie bi nga yiane volô asu ya kôme mevôme ya *nda Nti me ne ndaman, a asu ndimelane moné ôse ô nga yiane asu nkômane *nda.

¹⁴ Ve moné be nga zuu nye *nda Nti a nji volô na be bo nye metoñ, nge jôm é ne argent, nge atyeñ, nge bilaé, nge metoñ, nge jôm é ne mboon a or nge argent asu *nda Nti;

¹⁵ Be nga ve bôte ba bo ésaé moné ate, be belane nye asu ya kôme *nda Nti.

¹⁶ Bôt ba nyoñe moné na be kalane nye bebo ésaé be nji ke lañe be sito'o, amu be nga bo ésaé *zôsôô.

¹⁷ Moné mimveane ya mmemane mekua a moné mimvean asu *abé, be nji zuu nye e *nda Nti; a mbe asu betuni.

¹⁸ Eyoñe te Azaél, njô bôte ya Siri, a nga bet a zu wosane Gat a nyoñe nye. Azaél a nga bili nkômbane ya bet a wosane Yérusalém.

¹⁹ Yôaz, njô bôte ya Yuda a nga nyoñe biôm bise bi ne ntelan étyi, e bi Yôzafat a nga telé étyi, nalé fe Yôram a Akazia, b'ésaa bé, bejô bôte ya Yuda, e bi émien a nga telé étyi, or ase a nga too akume ya *nda Nti a *nda njô bôt a lôme bie bise Azaél, njô bôte ya Siri: ajô te Azaél a nga ke Yérusalém ôyap.

²⁰ Mimboone mivo'o Yôaz, jam ese a nga bo, mi ne ntilan e kalate minkañete bejô bôte ya Yuda.

²¹ Bebo bisaé bé be nga bete nlô a bo nye njoñ; be nga wôé Yôaz e Bét-Milô, asiliki Sila.

²² Yôzabat, e mone Siméat, a Yehôzabad e mone Somer, bebo bisaé bé, be nga bibi nye, nde a nga wu. Be nga jame nye baa b'ésaa vôme wua e tisone David. Mone wé Amatsia a nga jôô éjiane jé.