2 Bb. 1 - Kalate Zambe Nnomo a Mfefe Mfefé Nkôñelan

Ôkon a awu Akazia njô bôte ya Israél

¹ Eyoñ Akab a wuya, Môab a nga ben éjôé ya Israél.

² Akazia a nga koo e nka'alé ya étune *nda jé ya yôp a ku si, ve balé mbia mbalan. E nde a nga lôme minlôman a jô mie na: Kele silane nkômbane Baal-zébul, *zambe y'Ekroñ, me yem nge ma ye yet ôkone vi!

³ Eyoñe te éngele Nti a nga kobô Elie mone Tisbite na: Kôlô'ô si ô ke tôbane minlômane njô bôte ya Samari a jô mie na: Ye amu Zambe a nji fe bo Israél, nde mia ke sili nkômbane Baal-zébul *zambe ya Ekroñ'

⁴ Ajô te Nti a kobô avale di na: Wo ye bo te sis a kôlô énoñ ô nga bet amu wo ye fo'o wu. Ane Elie a nga ke.

⁵ Ane minlôman mi nga bulane be njô bôt, nye ve jô be na: Amu jé mia te bulan'

⁶ Be nga yalane nye na: Môt éziñ a te zu tôbane bia a jô bia na: Bula'ane be njô bôt a te lôme mia, a jô nye na: Avale di nde Nti a jô na: Ye amu Zambe a nji fe bo Israél, nde wo lôme bôt be ke sili nkômbane Baal-zébul, *zambe y'Ekroñ? Ajô te, wo ye bo te sis, a kôlô énoñ ô nga bet, amu wo ye fo'o wu.

⁷ Nde njô bôt a nga jô be na: Môt a te zu tôbane mia a kobô mia mejô mete a too aya'

⁸ Be nga yalane nye na: Môt ate a too a be'e ngômesan mimvote mi tit a sandé ékôbe tit ntiñetan angeteñ. Nde a nga jô na: Elie mone Tisbite le!

⁹ Ane njô bôt a nga lôm évete nsamba bezimbi mewôm metan e b'Elie ba be bôte bé mewôm metan. E nde évet éte é nga ke be nye. Elie a nga too abôbône nkôle yôp. Evete nsamba bezimbi é nga jô nye na: A môta Zambe, njô bôt a jô na ô sise nkôle si!

¹⁰ Ve Elie a nga yalan évete nsamba bezimbi mewôm metane na: Nge me ne môta Zambe, nduan é so'o yôb a di'i wo, womien a bôte bôé mewôm metan! Eyoñe te nduan é nga so yôb a di'i nye, émien a e bôte bé mewôm metan.

¹¹ Eyoñe te njô bôt a nga beta lôm évete bezimbi mewôm metan éfe e b'Elie ba be bôte bé mewôm metan. Evete bezimbi é nga kobô a jô nye na: A môta Zambe, njô bôt a jô na ô ji'a sise nkôle si!

¹² Ve Elie a nga yalane be na: Nge me ne môta Zambe, nduan é so'o yôb a di'i wo, womien a e bôte bôé mewôm metan! Nde nduan é nga so yôb a di'i nye, émien a e bôte bé mewôm metan.

¹³ Ane njô bôt a nga lôm évete bezimbi mewôm metane lale ba be bôte bé mewôm metan. Nde évete bezimbi lale ji é nga bet, v'éyoñ a nga kui, a nga kute meboñe si asu b'Elie, a ye'elane nye a jô'ô na: A môta Zambe, ényiñe jam a ji bebo bisaé bôé, e bôte bana mewôm metan, bi tame bo édima e mise môé!

¹⁴ Amu na nduan é soya yôb a di'i bivete bezimbi mewôm metane bibaé y'ôsu ba be bôte bap. V'éyoñe ji, ényiñe jam é tame bo édima e mise môé!

¹⁵ Ane éngele Nti a nga kobô Elie na: Kele nsamba wé! Te ko nye woñ a jam éziñ! Nde Elie a nga kôlô si a ke be njô bôt ba nye

¹⁶ a jô njô bôte na: Avale di nde Nti a jô na: Amu ô nga lôme minlôman mi ke sili nkômban baal-zébub, *zambe ya Ekroñ, ye Zambe a nji fe bo Israél, nyô ya sili nkômban a bili? Amu ajô te nde wo ye bo te sis a kôlô énoñ ô nga bet amu wo ye fo'o wu.

¹⁷ Ane Akazia a nga wu avale nkobô Nti a nga kobô Elie ô mbe. A amu Akazia a mbe teke mon, nde Yôram a nga jôô éjiane jé ataté mbu baa Yôram e mona Yôzafat a nga jôô e Yuda.

¹⁸ Mimboon mi Akazia mivok, mam a nga bo ye me nji bo ntilan e kalate minkañete bejô bôte ya Israél'