1 Tim 6 - Kalate Zambe Nnomo a Mfefe Mfefé Nkôñelan

Belo

¹ E ba bese be ne éto belo si, ba yiane yene bemasa bap ane ba ba yian ésemé mimfa'a mise. Nalé jôé Zambe a ñye'elane wongan bia ye bo te biaséban.

² E ba be bili bemasa ba buni, be bo'o te biasé be, a éfia na: Be ne bobenyañ ya mbunan. Ve be viane'e dañe dañe bo be ésaé *mvo'é, amu be ne *bebuni a bobenyañe ya nye'an, mbe ba nyoñe ngabe ya mbamba ésaé wop. E jam wo yiane ye'ele a bendé e nde le na:

Nya ésaé Zambe

³ nge môt éziñ a ye'ele ñye'elan ôfe, nge a bo te kabetane benya mejôô me Nti wongan Yésus Krist a ñye'elan wo lu'an a mbunane wongan,

⁴ yeme na, a ne ndim amu mebun. A ne ndiman, nkôkon wo jeñe ve nsañeta'ane a bifia bi môman. Vôm ate minyamete, mewôman, nkobane Zambe ébiasé,

⁵ mbia menyiñ a môman me ne te tyi'i e zañe bôt be bili mbia *nsisim, teke nguleya yeme benya mejô. Ba buni na, mam ma fombô mbunan me ne anjeñe mebu'uban.

⁶ Yaa, mfi ô ne e mame ya mbunan, mfa'a nyô a vak a abim a bili.

⁷ E ne été na, bi nji soo jôme si nyôna été. Avale te fe bia ye bulan teke kee jôm.

⁸ Nde nge bi bili bidi a mengômesan, bia yene mvaé.

⁹ Ve mfa'a ba ba kômbô bo minkukum, ba bili ôlame *mebôbela'a, abui mbia minkômban mi ne tee fek, mi mia ndamane bôt, a kee be nkuan a njañan.

¹⁰ E ne été na, ôzañ akum ô ne ndi ya mbia be mame mevale mese. Amu mveane binyiñe biab été, bôte bevok be nga dimi fé a li'i mbunan ôyap, a su'ulane nyabe minsisim miap a jama alun.

¹¹ Ve wo, a môta Zambe, sa'ale'e mam mete. Jeñe *zôsôô, mboone mam me Zambe, mbunan, nye'an, mban a évôvoé.

¹² Wosa'ane mbamba mewosan me mbunan, jeñ ényiñe ya melu mese, nje éte ô nga loban, aval ane ô nga mem mbunan mbamba mmeman ôsu ya abui bengaa.

¹³ Ma bendé wo asu Zambe, nyô a ve biôme bise ényiñ a e di Krist Yésus, nye a nga bo ngaa asu Ponse Pilate e mbamba mmemane mbunan wé été na:

¹⁴ ba'ale'e abendé te, teke aton nge bijô, akekui éyoñ Nti wongan Yésus Krist a ye yené,

¹⁵ ane nyô étam a ne Nkukuma, njôô ya bejôô, a ye liti e biyoñ bi ne ntelan.

¹⁶ Nye ate étam a ne te wu. A too éfufup é ne teke akui bebé été, teke môt a nga yene nye nge bo ngule ya yene nye. Etôtok a ngu bi bo'o be nye. Amen.

Melebe ya lebe minkukum

¹⁷ Jô'ô minkukume ya si nyôna na, be bo te bo mebun, a telé ndi minleme jap e be akum e ne teke jôme ya tabe je ndi ve e be Zambe nyô a ve bia biôme bise abui abui na, bi wô'ô mevak.

¹⁸ Be bo'o mvaé, a bo minkukume mfa'a ya mbamba mimboon. Be bo'o ésôs a kabane mvaé a bôte bevok.

¹⁹ Nde ba ye kôane bebien mbamba akum a libi melu ôsu, a bi ényiñ é ne fo'o nya ényiñ.

Mebatan

²⁰ A Timôté, ba'ale'e jôm é nga vebane be wo. Sa'ale'e mbia *minkobô a bisô bi ékotekote ñyeman.

²¹ Amu bôte bevok be nga buni na ba yem, ane be nga viane li'i mbunan. Mvam é tabe'e be wo!