1 Tim 5 - Kalate Zambe Nnomo a Mfefe Mfefé Nkôñelan

Bebuni mevale meva

¹ Te komekane nnôme môt, ve ô lebe nye aval ane wo lebe éso. O kobô'ô bendômane be bôt aval ane bobenyoñ,

² benya binga aval ane benyua, a bengone be binga aval ane be benyôkal, ve a *mfuban ôse.

³ Semé'é minkus, e mi mi ne fo'o minkus.

⁴ Yaa, nge nkus ô bili *bon nge bendaé, e mbe ba yiane taté yé'é na be bo mam me mbunan mfa'a menda me bôte map, a su'ulane ya'ane bebiaé bap. Nalé nye a ne fo'o mvaé e mise me Zambe.

⁵ Mfa'a ya wu ô ne fo'o nya nkusu, e wu wo kôme fo'o nyiñ étam, ô teléya ndi nleme jé be Zambe a wo bo mbane ya ja'é a ye'elan *môs baa alu.

⁶ Ve wu wo simesane ve mimvôman, ô ne ñwuan, ô kusa bo vevee.

⁷ Mam mete mme fe wo yiane bendé, nde mia ye bo tee bijô.

⁸ Nge môt éziñ a bo te ba'ale bôte bé a dañedañ ba ba nyiñ e *nda jé, a beneya mbunan. A ne *abé a lôte môt a ne te buni.

⁹ Minga a ye tiliban nsamba minkus vengevenge ve a ntoo mimbu mewôm mesaman, a na a nga bili ve nnôme wua.

¹⁰ Ba yiane fe yeme nye amu mbamba mimboone mié: a nga yale *bon a too fe anyep, a nga sôbe mebo mimfufup, a volô bewô'ô ôlun minlem, a ve fe émien mfa'a ya bo bôt e mam mese me ne mvaé.

¹¹ Ve mfa'a minkus mi ne bengon, wo ye bo te kañese mie. Amu éyoñ minkômbane miap mia ye dutu be na be lume Krist mvus, ba ye kômbô beta ke meluk,

¹² a zuu mekua e be bebien amu be tyameya ntiñetane wop ya ôsu.

¹³ Nalé fe na, amu be nji bi ésaé ya bo, ba yé'é ke bimo e menda menda. Saa ve na be nji bi ésaé ya bo, ve ba kobô ékobôkobô, ajô te sobô.

¹⁴ Ajô te ma kômbô na bisoé minkus mi beta ke meluk, be bi *bon, be ba'ale menda map, a bo te ve afôla e be bibôta bi nsiñ.

¹⁵ Amu éyoñ ma kobô ji, mivok mi yaleya feñ a tôñe Satan.

¹⁶ Nge minga a buni a bili minkus, a vumane mie, a ba'ale'e mie. E nji bo mvaé na keké é be'e mbe'e te, nde ja ye bi éyoñe ya be'e mi mi ne fo'o minkus.

¹⁷ Bemvendé ba jôô mvaé, ba yiane nyoñ ésemé mebime mebaé, a dañedañe ba ba tu'u nyôl ésaé nkatane Mbamba Foé, a e ñye'elan.

¹⁸ Yaa, mintilan mia jô na: wo ye bo te dibi anyu nnôme nyak a tibi fese yôp, a na: Mbo ésaé a yiane nyoñe ma'ane mé.

¹⁹ Te kañese mbo'olan ba bo'olô *mvendé ajô, vengevenge ve bengaa be ne bebaé nge belaa.

²⁰ E ba ba bo *abé, ô komeka'ane be ézezañe bôt été. Nalé ba bevo'o ba ye ko woñ.

²¹ Ma vu wo soñ asu Zambe a di Krist Yésus a mintobane be éngele na: Ba'ale'e metiñ mete, teke ôbangam, teke bo jam éziñ a *nsemane mingum mi bôt.

²² Te bo ôjeja'a ya beté môt éziñe mo, te nyoñe ngabe ya éza *abé. Ba'ale'e womiene *mfuban.

²³ Jôké'é nyu ve mendim étam, nya'a fe woon mon abim, amu ôsañe wôé, a amu mbane ate'e nyôle wôé.

²⁴ Abé bôte b'éziñ da yené ne ngeññ, ja'a be ngenane te ve be mekua. Ve di bôte bevok e wô'ô su'ulane yené atan.

²⁵ Mbamba mimboon, mmie fe mia yené ne ngeññ. Ve ja'ane mi mi ne nsolan mi wô'ô su'ulane yené.