1 Tim 4 - Kalate Zambe Nnomo a Mfefe Mfefé Nkôñelan

Mebendé mfa'a Timôté

¹ Nsisim a jô de ne sañesañ na: Biyoñ bia su'ulan, bôte b'éziñ ba ye kate mbunan. Ba ye lat a minsisime mi ne medu'an a miñye'elan mia so e be mimbia minsisim.

² Ba ye dimi fé amu bebadu'u belaa minsos, mbe bete mone môte ya minleme miap a mbili ndem étyé é maneya vé a nduan.

³ Ba ye tyili aluk; a kame bôt be di bidi biziñ, mbie bite Zambe a nga té na, *bebuni, ba be ne njalan a ñyemane benya mejôô, be nyoñe bie a mvean akéva.

⁴ Amu jôm ése Zambe a nga té é ne mvaé. A teke jôm ja yiane wuabane fé, nge ba nyoñe je a mvean akéva.

⁵ E ne na, mejô me Zambe a meye'elan bia fubu je.

⁶ Liti'i bobejañe mam mete mese: nalé wo ye bo mbamba mbo ésaé Krist Yésus, njalan a mejô ya mbunan, a mbamba miñye'elan mmie mite ô nga ji'a tôñ.

⁷ Mfa'a minkana mi ébiasé a ékobôkobô minnôme mi binga, ô bene bie. Ve wo, dañe'e semé mboone mam me Zambe.

⁸ Yaa, ésaé minsôn é ne fo'o mfi mfa'a mam m'éziñ. Ve mboone mam me Zambe ô ne mfi mezene mese.Ye ô nji bi ngaka'a ényiñ, ataté ényiñ y'éyoñe ji a kui ényiñe ja zu'

⁹ Njôane wu ô ne wu ya kôme tabe wô mebun, a wo yiane nyoñeban ngum e be bôte bese.

¹⁰ Amu nge bia wu njuk a wosan, e ne amu bi veya ndi nleme jangan e be vevea Zambe, e nye a ne nyii bôte bese, a dañedañ nyô *bebuni.

¹¹ Mame mete mme wo yiane bendé a ye'ele.

Eve'ela ya tôñ mfa'a bebuni

¹² Môt a bo'o te biasé wo amu na ô ne ésoé. Ve bo'o éve'ela e be *bebuni, mfa'a ya nkobô, ntaban, nye'an, mbunan a mfubane wôé.

¹³ Nté wo yange nsoone wom, va'a womien e nlañane Mintilan, nlebane bôt a e nye'elan.

¹⁴ Te biasé mveane *mvam ô ne be wo, ñwô ô nga vebane be wo a nkulane mejô, fufulu a *mbetane mo nsamba bemvendé.

¹⁵ E mam wo yiane tu'a ba'ale a *nlem ôse e mme le, nde meyaé môé ma ye yené e mise me bôte bese.

¹⁶ Ba'ale womien a nye'elane wôé. Bo'o mban, nde wo ye nyii womien a ba ba wô'ô wo.