1 Tim 3 - Kalate Zambe Nnomo a Mfefe Mfefé Nkôñelan

Ajô betebe ôsu ya keké

¹ Njôane wu ô ne wu ya tabe wô mebun na: Nge môt éziñ a kômbô éto évék, a kômbô mbamba ésaé.

² Ve yeme na, évék a yiane bo tee bijô, nnôm a bili minga wua, te dañe di, fek a yeme nyiñ a bôt, anyep, ngule ya ye'ele,

³ Saa nyuu bilam, nge môta mewosan, ve évôvoé, nlate bôte ngbwa, môt a nji yange ma'an,

⁴ nyô a yeme jôô *nda jé émien, a tibi bone bé yôp na be ve nye mewôk a éjijin ése.

⁵ E môt a ne te yeme jôô *nda jé émien, a ye ba'ale keké Zambe aya'

⁶ A bo'o te bo nyô a ndôme kôñelane *nlem, a zaa kuu, amu ndime ya mebun, a nyoñe mekua, aval ane Satan a nga bo.

⁷ Da yiane fe na, a bi mbamba nkañete be bôte ya atan, a zaa kuu ôson été e mevote me Satan été.

Bediakon

⁸ Avale da, bediakon: ba yiane bo ba ba yian. Be kobô'ô ve tyiñe jia. Te ve bebien ajô bilam, nge jeñe moné mezene me ne ékotekot.

⁹ Be ba'ale nsolane jame ya mbunan a mfubane mone môte ya *nlem.

¹⁰ Be fe be taté'é ve'eleban; wôna, nge be nji bi jame ya jô be, ba ye bo ésaé diakon.

¹¹ Binga fe avale da, ba yiane bo éjijin, saa beso'o bôt, ve te dañe di nge nyu; e ba ya buni mimfa'a mise.

¹² Bediakon be bo'o beyôm be bili minga wua, be yeme jôô bone bap a menda map mebien.

¹³ Amu, e ba ba bo ésaé diakon mvaé, ba lañebane nsamba ô ne mvaé, a bi beta ndi *nlem a so e mbunan ô nee Krist Yésus été.

¹⁴ Ma tili wo mam mete ndi nleme na, me mbeme koone wo ana'ana,

¹⁵ Ve nge da kui na, ma bo te ji'a so, wo ye yem ane wo nyiñ e *nda bôte Zambe été, nje é ne keké vevea Zambe, akôn a éviala'a benya mejôô.

¹⁶ E ne bebela na, nsolane jame wo fombô mbunan ô ne anen. Ô nga yené minsôn, nkaleban a Nsisim, beéngele be nga nye'e be yene wô, ô nga kateban e be bikuu. Ô nga buniban émo jina été, ô nga wum étôtok été.