1 Tim 2 - Kalate Zambe Nnomo a Mfefe Mfefé Nkôñelan

Meye'elan asu bôte bese

¹ Nde ma bendé ôsusua ya mame mese na, be bo minja'an, meye'elan, mbane ya sili, mvean akéva mfa'a bôte bese.

² Te vuane bejô bôt a ba bevo'o bese be bili bito bi ne ôyabe yôp. Nalé bia ye nyiñ évôvoé a *mvo'é e mbunane Zambe a éjijin été.

³ Jame te e ne abeñ a mvaé e mise me Zambe nyii wongan,

⁴ Nye a kômbô na bôte bese be nyiiban, a kui vôme ya yeme benya mejôô.

⁵ Amu Zambe a ne ve wua, mvañe fe ve wua e zañe Zambe a bôt, émien a ne môt, Krist Yésus,

⁶ nye a nga ve émien ane ngôtô asu bôte bese. E nkañete ô nga veban biyoñe bi mbe ntiñetan ñwô le,

⁷ ñwô ôte me nga teléban nkatefoé a *nlôman. Ma kobô bebela, me nji laa minsos, nye'ele beteyeme Zambe, e mbunan a benya mejôô été.

Befam a binga ésulan été

⁸ Ajô te ma yi na befam be ye'elan vôm ase be bete'e mimfuban mi mo yôp, teke ayaa nge meluman.

⁹ Ve mfa'a binga, ma yi na be jaé bijijine mengômesan, a biôme bi nyanga bi ne éjijin teke'e dia. Saa mfenane ésil, nge metabe me or, nge bibat a nyanga é ne tañ anen.

¹⁰ Ve be viane'e jaé mbamba mimboon, aval ane da yiane binga ba semé mame ya mbunan.

¹¹ Minga a yiane ku évô, a nyoñe nye'elan a nsuan émiene si.

¹² Me nji kañese na minga a ye'ele nge jôô fam, ajô te a yiane tabe évô.

¹³ E ne été na, Adam nye a nga taté kômban, Eve ke a su'ulan.

¹⁴ A saa Adam nye a nga du'uban, ve minga, éyoñ a du'ubaneya, a nga ku *ntyaman atiñ été.

¹⁵ Ve akôsa bo nalé, a ye nyiiban amu abiaé dé, nge a bo mbane ya tabe mbunan été, nye'an, *mfuban a éjijin été.