1 Tim 1 - Kalate Zambe Nnomo a Mfefe Mfefé Nkôñelan

Mebatan

¹ Paul, nlômane Krist Yésus, amu mbendane Zambe nyii wongan a Krist Yésus, e ndi nleme jangan,

² ma tili Timôté, nya mone wom e mbunan été. Mvam, nkoon éngôngo a *mvo'é, bi bo'o be wo, bi so'o e be Zambe Esaa, a e be Krist Yésus Nti wongan.

Mbia beye'ele

³ Aval ane me nga bendé wo éyoñe me nga kôlô a ke Masédôan, tabe'e Eféze a ji'a bendé bôte bevo'o na, be bo te ye'ele nye'elan ôfe,

⁴ nge kabetan a minkana, a bindan bi ne teke suk; mam mete ma dutu bisô a li'i fe'e Zambe, nje ja litiban e mbunan été.

⁵ Nsôñane ya abendé di ô ne ajô nye'an wo so *mfuban nlem, mbamba mone môt ya *nlem, a mbunan ô ne fo'o nya mbunane.

⁶ Mfa'a ya kandane mam mete, bôte bevok be nga dimi fé, mfa'a nkobô ô ne teke jôm été.

⁷ Ba ve'e fe'e na be ne beye'ele metiñ, ve e too na, bebien be nji yeme jôme ba jô, nge mame ba yemete a ngul ése.

⁸ Bia yeme fo'o na metiñ me ne mvaé, éyoñe ba belane me ane da yian.

⁹ E jam bia yiane tu'a wôk e nde di: *atiñ e nji bo amu zôsôa môt, ve mfa'a ba be ne te suu bebiene si, bekange, bewosane ñyebe, bebo mam *abé, bendamane étyi, bebiasé mam me Zambe, bewôé beésa bap, bewôé benyia bap, bewôé bôt,

¹⁰ bebo ébamba, e bôte ba fulane befam bevok, bekuane belo, belaa minsos, bekane mengana minsos a ba bese ba wosane mfufube nye'elan.

¹¹ E jam da lu'an a Mbamba Foé duma Zambe a nee ébotan, nye a nga vebane be ma nde le.

Ekaña'a mvame Krist

¹² Ma ve nyô a nga ve ma ngul akéva abui, e ne na Krist Yésus Nti wongan; nye a nga yene ma ane nyô a yian, éyoñ a nga nyoñe ma ane mbo ésaé wé.

¹³ Ma, e nyô a mbe mbiasé ñyebe, nkpwe'ele a njet. Ve *mvam é nga vebane be ma, amu me nga bo nalé e ndiman été, me teke mbunan.

¹⁴ Yaa, e mvame Nti wongan é nga fuluku be ma, nalé fe nye'an a mbunan bi nee Krist Yésus été.

¹⁵ Njôane wu ô ne nya njôane ya kañese be bôte bese na: Krist Yésus a nga zu *si nyô a nyii bebo mam *abé, mbe bete ma me ne nyô ya ôsu.

¹⁶ Ve nge *mvam é nga vebane be ma, é mbe amu na Krist Yésus a liti abui nye'ane dé, me too nyô ya ôsu, ane éve'ela ya ba ba ye buni nye, a nyoñ ényiñe ya nnôm éto.

¹⁷ Duma a étôtok bi bo'o be njôô ya nnôm éto, e Zambe a ne te wu, te yené, susu'a Zambe, nnôm éto a nnôm éto. Amen.

Mbamba mewosan

¹⁸ A mone wom Timôté, abendé ma ve wo nde le, aval ane minkulane mejô mi nga toteban melu kôa be wo, nde wo ye wosane mbamba mewosan, nkômetan a mie,

¹⁹ a mbunan, a *mfuban mone môte ya *nlem, nye ate bôte bevok be nga bene bo mewôk, a mbunane wop ô nga ke ényônyongo.

²⁰ Bevo'o ya nsamba ôte be ne Ymené baa Alékzandre. Me nga kalane be mo me Satan, nalé ba ye yé'é na be bo te beta biasé Zambe.