1 Tes 5 - Kalate Zambe Nnomo a Mfefe Mfefé Nkôñelan

Môse Nti

¹ Mfa'a mimbu a biyoñ ya été, a bobejañ, e nji bo mfi na môt a tili mia de.

² Mia bebien mia tu'a yeme na: E môse Nti wo zu aval ane ñwuwup a alu.

³ Eyoñe bôt ba ye jô na, za avale *mvo'é di, za avale évôvoé di! Eyoñe te njuk wo ye kui be be atemetem aval ane mintaé mi abiaé mia kui e be minga a ne abum, a ba ye bo te ngule ya tup.

⁴ Ve mia a bobejañ, mi nji bo e dibi été, avale *môs ôte ô ne kui be mia atemetem ane ñwuwup.

⁵ Yaa mia bese mi ne bone be ne éfufup été, bone be *môs. Bi nji bo bone b'alu, nge ba be dibi.

⁶ Ajô te e mbo'one te kean ôyo ane ba bevok, ve mbo'on évevé, atyeñ.

⁷ E ba ba ke ôyo, ba ke wô a alu, e ba ba wu bilam, ba wu bie a alu;

⁸ ve bia bi ne ba be *môs, e mbo'on atyeñ, bi jaé ébene mbunan a ji nye'an, a ékôngô ndi nleme nyian.

⁹ Amu Zambe a nji té bia na, bi tôban ayaa dé, ve na bi bi ényiñ amu Nti wongan Yésus Krist,

¹⁰ nyô a nga wu amu ajô dangan avale ya na, ja'ane bi vee, nge ôyo, bia ye nyiñe nlatan a nye.

¹¹ Amu ajô te, va'ane mia mia ngule minlem, a yemeta'an mia mia avale mi tatéya de na mia bo.

Mebendé a mebatane

¹² A bobejañ, bia sili mia na mi semé e ba ba wu nju'u ésaé e zañe jenan, ba bômbô évevé ajô denan e be Nti a komekane mia.

¹³ Amu ésaé jap, lita'ane be abui ésemé e nye'an été. Taba'ane *mvo'é, mia mia.

¹⁴ Bia lebe mia a bobejañ, komeka'ane ba ba nyiñ mbia ényiñ e tyabetyabe été, mi va'a ngule *nlem e be ba be bili je tyôtyoé. Mia yiane bo biviala'a mintetek, lita'ane njiban e be bôte bese.

¹⁵ Taba'ane ntyele na mi butan *abé a *abé, ve jeñane mvaé e zañe jenan éyoñ ése a e be bôte bese.

¹⁶ Taba'ane e meva'a été biyoñe bise.

¹⁷ Ye'elan te jô'é.

¹⁸ Va'an akéva biyoñe bise, amu nkômbane Zambe mfa'a wônan ñwô le e be Krist Yésus.

¹⁹ Te dimane Mfufube Nsisim,

²⁰ te biasan mejô bekulu mejô;

²¹ fasane mame mese a fek, ba'ala'ane ma me ne mvaé.

²² Sa'ala'ane mame mese me ne *abé.

²³ Zambe ya *mvo'é émien a fubu'u bia mingumba a na minsisime mienan, minleme mienan a menyôle menan bi bo'o mbamba mba'alan ane bia ye bo te bijô éyoñ Nti wongan Yésus Krist a ye so.

²⁴ E nyô a loone mia a ne nyô ya buni; émiene fe a ye bo de.

²⁵ A bobejañ, ye'elane fe ajô dangan.

²⁶ Bata'ane bobejañ bese a mfufube nlatan anyu.

²⁷ Ma bendé mia a jôé Nti na, e kalate nyô a lañeba'an e be bobejañ bese.

²⁸ E mvame Nti wongan Yésus Krist é tabe'e be mia bese.