1 Tes 3 - Kalate Zambe Nnomo a Mfefe Mfefé Nkôñelan

¹ Nde, amu teke ngule ya jibi, bi nga yene mvaé ya li'i étam Atén;

² ane bi nga lôme mia Timôté, mojañe wongan, ébe mboésaé Zambe e nkatane Mbamba Foé Krist, asu ya yemete mia a ve mia ngule nyô e mbunane wônan été,

³ e nde môt éziñ a ye bo te ku ézezañe *meve'ele ya éyoñe ji, amu mia yeme na jame da yange bia nde le.

⁴ Eyoñe bi nga too e be mia, bi nga taté ve mia ayemé na, bia yiane tôban ékpwe'ele, a jame te nde e nga boban, mia yeme nalé.

⁵ Ajô te, amu teke ngule ya jibi, me nga lôme na be zu nyoñe mefoé ya mbunane wônan, me ko woñe na, ye Mve'ele bôt a ve'eleya mia, nju'u bi nga wu ki ô za bo momo.

⁶ Eyoñ ébiene ji, Timôté a ndôme suan e be bia a so'o wé. A te soo bia mbamba foé ya mbunan a nye'ane wônan. A kate bia na, mi bili mbamba ôsimesan éyoñ ése mfa'a wongan, a na, mia fe, aval ane bia, mia kômbô beta yene bia.

⁷ Nde a bobejañ, bi biya ngule minlem e be mia amu mbunane wônan, ézezañe ya mame mese me nga tyelé bia minleme yôp a e *meve'ele mangan été.

⁸ Eyoñe ji bi nga beta nyiñ amu mi yeme ngu e be Nti.

⁹ Za avale akéva bi ne ve Zambe amu ajô denan amu meva'a mese bi bili ajô denan asu Zambe wongan,

¹⁰ éyoñe bia ye'elan, alu baa *môs, a mban ôse na, a beta ve bia nguleya yene mia, a jalé e jôme ja jemban e mbunane wônan été'

¹¹ Zambe Emien, Esaa wongan, a Nti wongan Yésus, be wulu'u bia e *zen a kui bia e be mia.

¹² Nti a bo'o na nye'an mia nye'esan, bana a ba bevok, a bôte bese, ô yaé a bulu bo abui, aval ane nye'ane wongan mfa'a wônan ô né.

¹³ A yemete'e minleme mienane nalé, a *mfuban ô ne te bijô asu Zambe Esaa wongan, éyoñ Nti wongan Yésus a ye so a mimfufube mise.