1 Tes 1 - Kalate Zambe Nnomo a Mfefe Mfefé Nkôñelan

Ntili kalate a mebatan

¹ Ma, Paul, bia Silvain bi too a Timôté, ma tili keké ya Tésalônik é nee be Zambe Esaa wongan a e be Nti Yésus Krist. Mvam a *mvo'é bi bo'o be mia.

² Bia ve Zambe akéva biyoñe bise ajô denan mia bese éyoñe bia simesane mia e meye'elan mangan été;

³ éyoñ ése bia simesane mbunane wônan wo bo ésaé, nye'ane wônan wo tôbane njuk a mbane ndi minleme jenan, mbie bite bia sobia e be Yésus Krist, asu be Zambe ésaa wongan,

⁴ bi tuka'a yem, a bobejañe Zambe *a nye'e, na a nga tobe mia.

⁵ E ne été na, nkañetane Mbamba Foé wongan e be mia ô nji bo ve zesé nkobô, ve ngu, ésaé Mfufube Nsisim, mbamba ntôane mam. A e ne été, ane mia yeme na, e nga kui be bia nalé amu mvaé jenan.

⁶ A mi nga vu bia, bia a Nti, a nyoñe mejô me Zambe ôlun été, nalé fe ava'a Mfufube Nsisim.

⁷ Amu nalé, mi ntoo éve'ela e be *bebuni bese ya Masédôan a Akayi.

⁸ Ajô Zambe e maneya wô'ôtane saa ve Masédôan a Akayi étam, e té'é be mia, ve nalé fe foé ya mbunan wônan e be Zambe é maneya tu'a mialane vôm ase, aval e nji beta sili na bi kobô de.

⁹ Amu môt ase a kañete, a kobô'ô ajô dangan, ane mi nga nyoñe bia, a ane mi kôñelaneya mfa'a Zambe a nlumane bengunemelane mvus asu ya bo vevee a nya Zambe bisaé.

¹⁰ asu ya yange Mone wé a so'o yôp, nyô a nga wômôlô miñwuan, Yésus, e nyô a wôlé bia e be ayaa da zu.