1 Pi 5 - Kalate Zambe Nnomo a Mfefe Mfefé Nkôñelan

Esaé * mvendé keké

¹ Nde ma lebe bemvendé be ne zañe jenan, ma, *mvendé, a ngabe ya mintaé mi Krist, ma, e nyô a ne nyoñe ngap ya étôto'o ja ye yené.

² Va'ane mbame mintômba ô nga vebane be mia bidi, a ba'ale wô, saa a ntindan, ve a nye'an, aval ane Zambe a kômbô.

³ Saa amu mia sôñe ma'an, v'amu nya nkômbane ya bo ésaé.Te jôô be njôane ya liti ve ônyu, ve bo'on éve'ela ya mbam.

⁴ Wôna, éyoñ njôô beba'ale mintômba a ye yené, mia ye nyoñ ékate duma é ne te ja ntuk.

Ejoté nyô a ñyemane ngul e mbunan été

⁵ Avale te mia bisoé bi bôt, su'ane miabebiene si e be bemvendé be bôt. A mia bese fufulu, bo'on éjoté nyô e zañe jenan. Amu Zambe a tele bôt be ne mebun e ngame yat. Ve a mvamane ba be ne nje'ebane minlem.

⁶ Ajô te su'ane miabebien éwôlô wo Zambe si, ndemben a ye bete mia yôp éyoñ é ne ntiñetan.

⁷ Ke'ane nye mam mese ma tyelé mia minleme yôp amu a ba'ale mia,

⁸ bo'one te dañe di nge nyu, momba'an! Nsiñe wônan, Satan, a ke a mon aval ane ñyôyo'o ngbwengbwem, a jeñe za a ne landé.

⁹ Yemane ngu e mbunan été, a bene nloone wé, mi yeme na, avale mintaé da, e ne nnane be bobenyoñ be ne mmialane *si nyô.

¹⁰ Zambe ya *mvam a mvolan, nyô a nga loone mia étôto'o jé é too nnôm éto e be Krist, a ye beta telé mia mebo si éyoñ mi maneya wô'ô mintaé nté éziñ.

¹¹ A ye yemete mia, a ve mia nka'a mvus, a bo mia na, mi bo te fô'ôsan.

Nwômesane kalate a mebatan

¹² Me nga tili mia e bone mejô ma a Silveñ, nye ma yen ane monyañe ya tabe nye ndi. Me sôñe na, me lebe mia a bo mia mi yeme na, mi tii amu mvame Zambe étam.

¹³ Nsamba bôt ô ne ntoban e Babilôn wo batane mia, a Mark fe, mone wom.

¹⁴ Mi bata'an wua a nyô mbok, a nlatane menyu me bobenyañ. Mvo'é é bo'o be mia bese mi ne be Krist.