1 Pi 4 - Kalate Zambe Nnomo a Mfefe Mfefé Nkôñelan

Mfefé ényiñ

¹ Nde amu Krist a nga jibi mintaé e minsôn été, mia fe taba'ane nkômane ya nyiñ ôsimesane te été. Nyô a jibi mintaé e minsôn, a kandaneya abé

² na, a nyiñ éyoñ a li'iya minsôn été, saa fe aval ane mbia minkômban ya bôt mi né, ve aval ane nkômbane Zambe ô né.

³ E ne été na, mi nga nyiñ ayap e nkômbane *meyoñ me ne te yeme Zambe été. E ne na: Bijabô, mbia minkômban, nso'one bilam, njeman mbia *mebôk, mbia bisulane bi ndian a nyuan, nkañane bengunemelan.

⁴ Ajô te ba kam amu jé mi nga tyetebe be, te fe fulan a be e mbia mboon été,

⁵ a ba ta mia. Ba ye yalan asu nyô a ne nkômane ya tyi'i bevevee a miñwuane mejô.

⁶ Amu ajô te, ja'ane e be miñwuan, *mbamba Foé a nga kateban e be be, nde ja'ane bôt ba tyi'i ajô dap e minsôn été aval ane bôt, ve ba nyiñ ane Zambe a zene ya Nsisim.

⁷ Asu'ulane ya mam mese e nto bebé, lita'ane na mi ne fek a bo'one te dañe di nge nyu, nde mia ye bi ngule ya ye'elan.

⁸ E jam ôsu, biane nye'an ô too e zañe jenan, amu nye'an wo buti jama mbia be mam.

⁹ Mi bo'o anyep, wua a nyô mbok, tee nkobô menyiñ.

¹⁰ Bela'an môt ase e mveane Zambe a nga ve nye, asu mvaé bôte bevok, éyoñe te mia ye bo mbamba bebelane ya ézu'u mimveane Zambe a ve.

¹¹ Nge môt éziñ a kobô, é bo'ok asu ya kalane mejô me Zambe. Nge mfe *a saane bôt, a bo'o de a ngule Zambe a ve, nalé ate Yésus Krist nyô a ne Zambe, a ye fo'o wum.

Njibane mintaé

¹² A bôt ma nye'e, te seman nge mia teme na mi ntele nkaba'a *meve'ele été, a bo te yene de aval ane nge é ne étua jam.

¹³ V'éyoñe mia nyoñe ngap e mintaé mi Krist, va'an, ndemben éyoñ étôto'o jé ja ye kulan, mia fe mia ye vak a fôn.

¹⁴ Nge ba kpwe'ele mia amu jôé Krist, mvom a mia, amu Nsisime duma, Nsisime Zambe, ô too be mia.

¹⁵ Môt éziñe ya be mia a bo'o te wô'ô mintaé amu na a ne ñwôé bôt, ñwuwup nge zemimfaka, nge na a ne nyô a kobô éza mam,

¹⁶ ve nge môt a wô'ô mintaé ane mbuni a bo'o te wô'ôson. A viane'e ve Zambe duma amu a be'e jôé mbuni.

¹⁷ Eyoñ é kuiya fo'o e ji ntyi'ane mejô wo taté e *nda Zambe; ve nge wo taté be bia, wôna asu'ulane ya ba ba bene buni Mbamba Foé Zambe da ye bo aya'

¹⁸ A nge zôsôa môt a nyiiban e nju'u été, wôna za jame da ye kui e be mbia môt a mbo mam *abé'

¹⁹ Ajô te e ba ba tôbane njuk ane nkômbane Zambe ô né be ke'e minsisime miap e be Nté biôm a ne teke atyendé; be bo'o mvaé.

²⁰ Ajô te, e ba ba wô'ô mintaé amu ba bo nkômbane Zambe mewôk be va'a Mbamba nté yôp a si minsisime miap. Be kele ôsu a bo mvaé.