1 Pi 1 - Kalate Zambe Nnomo a Mfefe Mfefé Nkôñelan

Mebatan

¹ Ma Pierre, nlômane Yésus Krist, ma tili mintobane mi bôt mi too ane beyeñ, *mmialan e mefôla ya Poñ, Galati, Kapadôs, Azi, a Bitinie.

² Mintoban a e fe'e Zambe Esaa, a ntelan étyi ya Nsisime na, be wô'ô Yésus Krist a nyoñe ngabe ya mmiamane metyi mé. Mvam a *mvo'é bi bo'o e be mia abui abui.

Mvean akéva

³ Zambe a bo'o ébotan, Esaa Nti wongan Yésus Krist. Amu e beta *mvam wé été, a nga bo bia na, bi beta bialé a bi vevea ndi *nlem, amu ñwômane Yésus Krist e miñwuane na,

⁴ bi nyoñe ngab é ne te ngule ya boé, nge tabe mvin, nge viele. Ngab éte é ne mia mba'alane yôb été.

⁵ Mia bete ngule Zambe ja ba'ale amu mbunan mfa'a nyian ô ne bebé ya yené éyoñ ja su'ulan.

⁶ Nde, tyela'ane si a mevak, amu nalé, akôsa bo ôyôme nté, mi ne wô'ôlun amu *meve'ele mevale meva.

⁷ Meve'ele mete ma liti ngule ya mbunane wônan. Amu ja'a or nye ate a ja ntuk, a wô'ô ve'eleban a nduan. Avale te mbunane wônan wo dañe or wo yiane fe ve'eleban. Nde mia ye nyoñ ékaña'a, a étôtok a duma éyoñe Yésus Krist a ye yené.

⁸ Nyô mia nye'e te yen, a buni ja'an a ngenan te yené éyoñe ji. Ajô te mia vak beta meva'a ya étôtok,

⁹ a nyoñe nyiane ya minsisim mienan ane ma'an.

¹⁰ Ajô nye'an ôte nde bekulu mejô be nga tu'a fas, a jeñ. A be nga kulu mejô ajô mvean, ñwô Zambe a ye ve mia.

¹¹ Be nga jeñe na be yem éyoñ a e mezene minlitan mi Nsisime Krist ô mbe be be mi nga yiane tôéban; amu Nsisim ôte ô nga taté yemete ajô mintaé mi mbe mba'alan asu Krist, a e duma e nga yiane tôñe mie.

¹² E nga litiban e be be na: Saake asu dabe bebien, v'asu denan nde be nga Kate Foé éte, nje bekañete Mbamba Foé be nga Kate mia a ngule Mfufube Nsisim a nga so yôp, a nje beéngele ba kômbô yem. Nsisim a nga liti. Amu Nsisim a nga too e be be ate, a nga taté kat ôsusua, mintaé Yésus Krist a yiane jibi a étôto'o ja yange mie.

Nloon ya nyiñ mbuban

¹³ Ajô te taba'ane nkôman asimesane denan été. Bo'one fek. Tela'ane ndi nleme jenan ése e *mvam ja ye so e be mia éyoñe Yésus Krist a ye yené!

¹⁴ Bo'one Zambe mewôk, a bo te beta bo mbia minkômban ya melu mvus, éyoñe te mi nga too ndiman été.

¹⁵ Ve aval ane nyô a nga loone mia a ne étyi; mia fe avale da, bo'on étyi e ntabane wônan ôse été,

¹⁶ amu e ne ntilane na: Bo'on étyi amu me ne étyi.

¹⁷ A nge mia loone nyô a ne te semé mingume mi bôt, a tyi'i môt ase ajô aval ane mboone wé ô né na Nti, koone nye woñ e ntabane wônan été nté mi too *si nyô.

¹⁸ Mi yeme na mi nji kôtéban a biôm bia ja ntuk ane argent, nge or, e momoo aval ényiñ mi nga nyoñe be beéso benan,

¹⁹ ve a metyi me ne édima, aval ane ma me mone ntômba a ne teke éyem nge aton. E ne na, metyi me Krist.

²⁰ Nye ate a nga veban te yene mbôka'a ya *si nyô ô za bômbô'ô a biyoñ bia su'ulan amu mia.

²¹ Amu nye, mia buni na Zambe a nga wômôlô nye miñwuan a ve nye étôtok, avale ya na, mbunane wônan, a ndi nleme jenan bi ne e be Zambe.

²² Eyoñe ji, amu mewô'ô menane e benya mejôô, mi maneya tune miabebien, nde mia ye nye'esan ane bobenyañ, tee medu'an éyoñ ése.

²³ Mi nga beta bialé mfefé, saa mvoñ jaa ja ntuk, ve nyô é ne te ja ntuk.

²⁴ Amu na, nsôn ôse ô ne aval ane élok, a étôto'o jé ése ane sam élok: élo'o ja kôt a e same jé ve kutan,

²⁵ ve njôan Nti ô too nnôm éto. Ajô te nde mbamba foé a nga kateban e be mia, nye a ne njôane te!