1 Minkte 29 - Kalate Zambe Nnomo a Mfefe Mfefé Nkôñelan

Mimveane bôt bebien ba ve asu melôñe * nda Zambe

¹ Ane njô bôte David a nga jô ékôane bôt ése na: Mone wome Solômon, nye étame Zambe a nga top, a ne mongô a nte'an, ésaé ke anen, amu *nda nyô é nji bo asu môt, ve asu Zambe Nyô a too.

² Me maneya belan e ngule jam ése na me tôkane biôm asu *nda Zambe wom or asu biôme bi or, argent asu biôme bi argent, mvot asu biôme bi mvot, étyé asu biôme bia yian étyé a bilé asu biôme bia yiane boban a bilé, meko'o m'ônix a *mekok ba yiane totan e mevôm mevôm asu ya ve abeñ: meko'o ma faé me too menyôle menyô, mevale meko'o mese me n'édima a marbre a n'éfumulu abui.

³ Nalé fe na amu ma dañe nye'e e *nda Zambe wom, ma ve e *nda Zambe wom or a argent bi ne ébiam, ma beté bie e yôbe ya biôm bise me maneya tôkan asu vôm a ne étyi:

⁴ betalañ be or toyini éla, or ya Ofir a betalañ be argent toyini zamgbwa a too *mfuban asu ya yañe mimfine menda.

⁵ Mfa'a or asu jôm ja yiane or, a mfa'a argent asu jôm ja yiane argent, a mfa'a bisaé bise bebo bisaé ba yiane bo, za a bete wo yôp e môse ya den, te ntindan, a tiñeti Nti na a zu ve bie'

⁶ Ane bivete menda me bôt, bivete *meyoñ ya Israél, bivete betoyini a mintet, to'o bivet bia tindi bisaé bi njô bôt be nga ve teke ntindan.

⁷ Asu bisaé ya *nda Zambe be nga ve betalañ be or toyini étan, minsañ mi or toyini awôm, betalañ be argent toyini awôm, betalañ be mvot toyini awôm a muam, betalañ b'étyé toyini ntet.

⁸ E mo me Yéhiél mone Gersonite, be nga kalane fe meko'o mese me nga too asu *akume ya nda Zambe.

⁹ Bôt be nga vak amu mimvean be nga ve teke ntindan, amu be nga ve bebiene be Nti a minleme mise; njô bôte David fe a nga va'a jame te.

Meye'elane David

¹⁰ David a nga botane Nti ékôane bôt ése é too. David a nga jô na: A Nti, e Zambe ésaa wongan Israél, ébotan a wo ataté nnôm éto a kui nnôm éto.

¹¹ A Nti, Anen, ngu, étôtok, éjijin a mfaan bi ne émbiôé, amu jôm ése é ne yôp a si é ne énjôé, a Nti, njôan ô ne fe éñwôé e wo ô ne mbetan a ô koo biôm bise yôp!

¹² Akum a duma bia so be wo, wo wo jôô biôm bise, ngu a éwôlô bi ne e wo wôé été, e wo wôé fe ñwô ô bili nguleya nene a yemete biôm bise.

¹³ Eyoñe ji, a Zambe wongan, bia kañe wo a se'e étôto'o ya jôé dôé.

¹⁴ Amu me ne jé, e bôte bam ke jé ane bi ne nguleya bo avale mimveane di teke môt a tindi bia? Biôm bise bia so be wo, a e biôme bia ve wo nne bia so wo wôé été!

¹⁵ Bi ne beyeñ e mise môé a mintabe avale b'ésaa bangan bese be mbe; melu mangan bi too *si nyô me ne ane nsisiñ, a jam ya tabe de ndi e nji bo.

¹⁶ A Nti, e Zambe wongan, abui akum ese bi maneya tôkane dina na bia lôñe wo a jôé dôé e n'étyi *nda, ése da so e wo wôé été. Biôm bise bi ne émbiôé!

¹⁷ A Zambe wom, ma yeme na wo fase *nlem ô nyeke'e fe zôsôô; ajô te nde ma te bo mimveane mina teke ntindan ve e *zôsôô ya nleme wom, a éyoñe ji me yeneya a meva'a mese ane bôte bôé be ne va ba ve wo mimveane miap teke ntindan.

¹⁸ A Nti, e Zambe Abraham, Izak a Yakob b'ésaa bangan, kañese'e na e bôte bôé be ba'ale avale minsimesane dina ya minleme miap melu mese, a kañese'e na asimesane dap é bo ñyemetan ve be wo.

¹⁹ Va'a mone wome Solômon *nlem ô ne nkômesan ôse na wo ba'ale mebendé môé, miñye'elane miôé a metiñe môé, na wo bo me mese a na wo lôñe *nda nje me maneya tôkane biôme bina bise.

Solômon a telébane njô bôt

²⁰ Ane David a nga jô ékôane bôt ése na: Va'ane Nti e Zambe wônan akéva! Ane bôte bese ya ésulan be nga ve Nti, Zambe b'ésaa bap akéva. Be nga vitibi a kute meboñe si ôsu Nti a ôsu be njô bôt.

²¹ Mametyé, éyoñ *môs ôte ô lôteya, be nga ve Nti metuna'a a mimvean mia di'ibane ngumba: beyôm benyak toyini, beyôm mintômba toyini, bone mintômba toyini a mvean binyunyui y'été, a *bityi'a bife abui asu Israél ase.

²² Be nga di a nyu *môs ôte, e mise me Nti, abui mevak été, be nga telé Solômon e mone David njô bôt éyoñe baa, be nga wo'o nye mbon e mise me Nti ane njôô, a Sadok ane *ntuni.

²³ Ane Solômon a nga tabe éto njôane Nti ane njô bôt éjian ésaa wé, a Israél ase a nga bo nye mewôk.

²⁴ Bivete bise, bôte mewosan a bone be njô bôte David bese be nga bo njô bôte Solômon mewôk.

²⁵ Nti a nga bete Solômon ôyabe yôb abui e mise m'Israél ase, a nga bo njôane wé jame ya kam, njôane njô bôte mfe ya Israél ô nji bo nye ôsu ô too avale te.

Awu David

²⁶ David e mon Izayi a nga jôô Israél ase

²⁷ A nga jôô Israél mimbu mewôm menyin: a nga jôô Ebroñ mimbu zamgbwa, a a nga jôô e Yérusalém mimbu mewôm melaa a milaa.

²⁸ A nga wu a too nya mbamba *mvendé, njalan a melu, a akum a duma. E mone wé Solômon a nga jôô éjiane jé.

²⁹ Mimboon mi njô bôte David, mi ya ôsu a mi mia su'ulan, e kalate mimboon mi Samuel, ñyene mam, e kalate mimboone mi Natan nkul mejô a e kalate mimboon mi Gad ñyene mam,

³⁰ éjôé jé ése a éwôlô jé ése, e mam me nga boban melu mé, to'o na Israél été nge e bijôé bise ya mesi mevok.