1 Minkte 28 - Kalate Zambe Nnomo a Mfefe Mfefé Nkôñelan

Solômon nye a tyendé David

¹ Ane David a nga sulan bivete bise ya Israél, bivete *meyoñ, bivete minsamba bia bo ésaé be njô bôt, bivete betoyini a bivete mintet, ba be mbe bivete ya ba'ale akum a mimbam biyeme njô bôt a bone bé, bôte njô bôt a too be ndi, bezimbi ba dañ biwôlô a e bôte bese be bili ésemé.

² Ane njô bôte David a nga tebe a jô na: Vô'ôla'ane ma a bobejañ a bôte bam! Me nga bili nkômbane ya lôñe *nda e vôme éwolo élate Nti é ne bômbô é too fe ételé mebo Zambe wongan, me mbe me kômesa'ane na me lôñe je.

³ Ve Zambe a nga jô me na: Woo ye ke lôñe jôé dame *nda, amu ô ne môta mewosan, ô kuliya fe abui metyi.

⁴ Nti, Zambe Israél, a nga tobe ma e *nda bôt ésaa wom ése na me bo njô bôte ya Israél melu mese; amu a nga tobe Yuda a bo évet, a nga tobe *nda ésaa wom e *nda bôte Yuda été, a e bone b'ésaa wom été, a nga yene mvaé ya tobe ma na me jôô Israél ase.

⁵ E bone bam bese été, amu Nti a nga ve ma abui *bon, a nga tobe mone wom Solômon na a tooé nye éto njôane ya éjôé Nti Israél.

⁶ A nga jô me na: Mone wome Solômon a ye lôñe *nda jam a minseñe miam; amu me nga tobe nye na a bo mone wom a mamien ma ye bo nye ésaa.

⁷ Ma ye yemete éjôé jé nnôm éto, nge a yeme na a ba'ale mebendé mam a metiñe mam aval e ne môse wu.

⁸ Eyoñe ji, e mise me Israél ase, ékôane Nti ése, a Zambe Emien a too, Nyô a wô'ô bia, tuka'a ba'alane mebendé me Nti e Zambe wônan mese, nalé mia ye bi mbamba *si nyô a li'i je ane élik e be bone benan nnôm éto éyoñ mi maneya wu.

⁹ Mfa'a wôé, a mone wom Solômon, yeme Zambe ésoo wôé a saane nye a *nlem ôse, a *nsisim ô ne nkômesan, amu Nti a fase minlem mise a a yeme nkômban ôse. Nge wo jeñe nye, a ye bo na ô yene nye; ve nge wo li'i nye, a ye wua wo fé nnôm éto.

¹⁰ Yeme éyoñe jina na Nti a nga tobe wo na ô lôñe *nda ja ye bo nyô y'étyi. Yeme ngu a bo ane monafam.

David a kalane Solômon avale * nda Zambe ja ye bo

¹¹ Eyoñe te David a nga ve Solômon mone wé éve'ela'a mbala'a si ya *nda Zambe a mefase y'été: bitune bi *nda ba naan akum, bi ya yôp a bi ya été, a e vôm éwolo ja yiane bômbô.

¹² A nga ve fe nye bive'ela bise a nga simesane na bia yiane lôñeban: minseñ ya *nda Zambe, beta meba mbôma'an a minseñ, bitune bi *nda ba yiane naan *akume ya nda Zambe a biôm bi n'étyi bôt ba ve Zambe.

¹³ A nga ve nye afep é bili minsamba betuni a Belévit ntilan, nalé fe di bisaé bia yiane boban e *nda Nti bi ne ntilan a e di biôme ya nkañan e *nda Zambe été bi ne ntilan.

¹⁴ A nga kate nye abime or da yiane jôm ése ja yiane boban a or, a abime argent da yiane jôm ése ja yiane boban a argent,

¹⁵ nalé fe adite ya bibe'e belambe a belambe be or, bibe'e belambe a belambe be argent, avale ba yiane belan kan ése y'été,

¹⁶ adite ya wua ase ya betawôlô be or be ne asu belet ba ve Zambe, a adite ya betawôlô be argent,

¹⁷ adite ya bilum ba belane bie asu tit, di befandé a mende'e me or a ne *mfuban, adite ya befandé be or a ba be argent, avale ba yiane belane kan ése y'été,

¹⁸ adite ya ata'a metuna'a beôlobinda mboon a nya or. A nga su'ulane fe ve nye éve'ela vagoñ a n'étyi, a dañe dañe na Bekerubim be or ba buti éwolo élate Nti a mefabe map me ne ndaman.

¹⁹ David a nga jô na e mam mese ma me ne ntilan e kalate me nga nyoñe be Nti; kalate ate a liti ne sañsañ avale ba yiane bo e jôm ése é ne éve'ela été.

²⁰ David a nga jô mone wé Solômon na: Yeme ngu, bo'o ayo'o *nlem a bo ane fam; te ko woñ a te fô'ôban amu Zambe nyô a too, e Zambe wom, a ye tabe be wo; a ye bo te li'i wo nge vuane wo, akekui biôm bise asu ésaé ya *nda Nti bi maneya boban.

²¹ Minsamba betuni a Belévit asu ésaé ya *nda Zambe mmie mi. Mfa'a ya aval ésaé ése, ô bili mintyetyeñ mi bôt mi bili mbamba nkômbane ya bo ésaé e fefele jôé, nalé fe bivet a bôte bese be ne mewôk, e mam mese ba kobô be.