1 Minkte 24 - Kalate Zambe Nnomo a Mfefe Mfefé Nkôñelan

Betuni nkabane minsamba minyin bivete minsamba Belévit

¹ Minsamba mi bone b'Aron: bone b'Aron: Nabad, Abihu, Eléazar a Itamar.

² Nadab a Abihu be nga taté wu a ésaa wop teke li'i bon; Eléazar a Itamar be nga bo ésaé betuni.

³ David, nalé fe Sadok ya bone b'Eléazar a Ahimélek ya bone b'Itamar, be nga kabe bone b'Aron aval'ane bisaé biap bi né.

⁴ Bone b'Eléazar be nga bili abui bivet a lôte bone b'Itamar, éyoñe te be nga kabe be avale di na: Bone b'Eléazar be bi bivet awôm a bisamane ya menda b'ésaa, bone b'Itamar ki bivete ya menda b'ésaa muam.

⁵ Be nga kabe be a mboon *asimba, bana ba be ba bevok a amu bebo bisaé ya vôm a n'étyi a bebo bisaé be Zambe be mbe bone b'Eléazar a bone b'Itamar.

⁶ Ntili bekalate Semaéya, e mone Natanaél ya ayoñe Lévi, a nga tili be môé ôsu njô bôt a bebo bisaé ôsu be *ntuni Sadok, ôsu be Ahimélek, e mone Abiatar a ôsu be bivete ya menda me bôte betuni a Belévit. Be mbe be nyoñe *nda b'ésaa jia asu Eléazar a nyô fok asu Itamar.

⁷ Mboon *asimba ôsu ô nga liti Yehôyada; wu baa Yedaéya;

⁸ wu lale Harim; wu nyini Seorim;

⁹ wu tane Malkiya; wu saman Miyamin;

¹⁰ wu zamgbwale Hakôt; wu muame Abiya;

¹¹ wu ébulu Yasua; wu awômô Sekanya Hu;

¹² wu awômô a wua Eliasib; wu awômô a baa Yakim,

¹³ Wu awôm a lale Hupa; wu awôm a nyini Yesébeam;

¹⁴ wu awôm a tane Bilga; wu awôm a samane Imer;

¹⁵ wu awôm a zamgbwale Hézir; wu awômô a muam Hapitsét;

¹⁶ wu awôm a ébulu Pétaya; wu mewôm mebaa Ezékiel;

¹⁷ wu mewôme baa a wua Yakin; wu mewôm mebaé a baa Gamul;

¹⁸ wu mewôm mebaé a lale Delayahu, wu mewôm mebaé a nyini Maziahu.

¹⁹ Avale di nde be nga nyoñe mbe'e ya ésaé jap, asu ya nyiin e *nda Nti, avale nye'elan ô né ñwô ésaa wop Aron a nga telé avale Nti, Zambe ya Israél a nga bendé nye.

²⁰ Mfa'a bone be Lévi be nga li'i, biyôlé biap mbie bi: e bone be Amram: Kubaél; e Bone be Kubaél, Yedeyahu;

²¹ e be Rehayahu, e be bone be Rehayahu, Yikiya évet.

²² E be bone be Yitseharite: Selômôt; e be bone be Selômôt: Yehat.

²³ Benayi, Yériyahu, Amaryahu môta baa, Yahaziél e môta lale, Yekameam e môta nyini.

²⁴ E mone Uziél: Miké; e be bone Miké: Kamir;

²⁵ monyañe Miké: Yikiya; e be bone be Yikiya: Zakiri.

²⁶ Bone be Merari: Mali a Musi a bendaé bé bone be Yaziahu.

²⁷ Bone be Merari, e be mone wé Yaziahu, Kôham, Zahur a Ibri.

²⁸ E be Mali: Eléazar, nyô a nji biaé bon; e be Kis,

²⁹ bone be Kis: Yerameél,

³⁰ bone be Musi: Mali, Eder a Yerimôt. Bone Belévit mbe le ane menda b'ésaa me né.

³¹ Be fe ane bobenyañ bone be Aron, be nga bo *asimba ôsu be njô bôte David, Sadok, Ahimélék a bivete menda me bôte Belévit. Avale te nde e nga boban asu évete ya *nda bôt avale fe ane ôyôme môte ya bobenyañ.