1 Minkte 23 - Kalate Zambe Nnomo a Mfefe Mfefé Nkôñelan

Belévit, élañe bôte jap a bisaé biap

¹ Eyoñ David a ntoo *mvendé môt njalan a melu, nde a nga telé mone wé Solômon njô bôte ya Israél.

² Ane a nga sulane bivete bise ya Israél, betuni a Belévit.

³ Be nga lañe Belévit ataté mimbu mewôm mela a lôte valé; tañe jap é mbe bôte toyini mewôm mela a muam.

⁴ David a nga jô na bôte toyini mewôm mebaé a ényin be bo ésaé ya fombô bisaé ya *nda Nti, bôte toyini ényin be too beba'ale mimbé,

⁵ a toyini ényin ke asu ya kañe Nti a bibômebômé me nga kôm asu ya kañe nye.

⁶ David a nga kabe be minsamba avale bone be Lévi be né: Gerson, Kahat a Merari.

⁷ Begersonite be mbe na: Laédan a Siméyo.

⁸ Bone be Laédan: Yehiél évet, Zétam a Yoél, bôte belaa.

⁹ Bone be Simeyi: Selômit, Haziél a Harañ, bôte belaa: Bivete ya menda me bôte Laédan mbie le.

¹⁰ Bone be Simeyi: Yahat, Zina, Yeuk a Beria. E bone benyine Simeyi mbe le.

¹¹ Yahat a mbe évet, Ziza e môta baa; Yeuk a Beria be nji ke biaé *bon abui, élañe bôt été, be mbe *nda bôte jia.

¹² Bone be Kehat: Amram, Yitsehar, Hébron a Uziél, bôte benyin.

¹³ Bone b'Amram: Aron a Môze. Aron a nga telébane fefele na a bo étyi, na a dañe bo étyi, émien a bone bé nnôm éto, asu ya di'i beôlobinda ôsu Nti, asu ya bo nye ésaé a botane bôt a jôé dé nnôm éto.

¹⁴ Môze a mbe môta Zambe; bone bé be nga loban ba be ayoñe Lévi.

¹⁵ Bone be Môze: Gersom a Eliézer.

¹⁶ Bone be Gersom: Sebuél évet.

¹⁷ Bone be Eliézer: Rehabia évet; Eliézer a nji biaé mone mfe, ve bone be Rehabia be mbe étua abui.

¹⁸ E mone Yitsehar: Selômit, évet.

¹⁹ Bone be Ebroñ: Yériyahu, évet; Amaria e môta baa, Yahaziél e môta lale a Yekameam e môta nyini.

²⁰ Bone be Uziél: Miké, évet; a Yikiya e môta baa.

²¹ Bone be Merari: Mali a Musi. Bone be Mali: Eléazar a Kis.

²² Elézar a nga wu teke biaé monafam; ve a nga biaé bobebinga mbe bobefame be Kis bendôme bap, be nga luk.

²³ Bone be Musi: Mali, Eder a Yérémôt, bôte belaa.

²⁴ Bone be Lévi mbe le aval ane menda b'ésaa me né, bivete ya menda me bôt aval élañe bôt be nga bo é mbe éyoñe wo lañ biyôlé bi môt ase. Be nga bo ésaé e *nda Nti ataté mimbu mewôm mebaé a lôte valé.

²⁵ Amu David a nga jô na: Nti, Zambe ya Israél, a veya bôte bé awo'on a Emien a ye tabe Yérusalém nnôm éto.

²⁶ Ajô te, mfa'a Belévit, ba ye bo te beta be'e *tabernakel a biôm bese ba yiane belane bie été.

²⁷ Be nga lañe bone be Lévi ataté mimbu mewôm mebaé a lôte valé aval'ane mejô David a nga kandane kobô me mbe.

²⁸ Bisaé biap, e mvuse bone b'Aron, asu ésaé ya *nda Nti, bi mbe bi fombô'ô minseñ a bitune menda, ntunane biôm bise bi n'étyi, biôm ba belane bie asu ésaé ya *nda Nti,

²⁹ minnoñ mi belet, ékekeb avut asu mimvean ya mefup, biwôlé bi ne teke mvusan, biwôlé ba yañ e fulafan a biwôlé bi ne ñyaman; avek ese ya biôm bia sôé ane mendim a bi ba ve'e nté;

³⁰ Tyé ése a ngô'é ése be nga yiane zu kañ a se'e Nti,

³¹ a ve Nti mimvean ba di'i ngumba asu Nti, e besabat, e metéé me ngon a e beta *mebôk, abime biyoñ e ne ntelan, e nye'elane wo jôô be éyoñ ése été.

³² Be nga yiane ba'ale *nda éndelé bendôba'an, vôm a n'étyi a ba'ale abendé bone b'Aron, bobenyañe bap, asu ésaé ya *nda Nti.