1 Minkte 22 - Kalate Zambe Nnomo a Mfefe Mfefé Nkôñelan

¹ Ane David a nga jô na: E ndaa Zambe Nyô ja ye lôñebane va, a ata'a metuna'a asu mveane ya Israél ba di'i ngumba da ye lôñebane va.

David a kômesane nlôñane * nda Zambe

² Ane David a nga bendé na be sulan mintabe mi mbe si ya Israél, nde a nga ve beba *mekok ésaé ya tyi'i beta *mekok asu nlôñane *nda Zambe.

³ David a nga kômesane fe abui mvot, abime be mbe te fe nguleya vek,

⁴ a bilé bi sédre teke alañé, amu Besidônieñ a Betirieñ be nga zu ve David abui bilé bi sédre.

⁵ David a mbe a jô'ô na: Mone wome Solômon a ne mongô a nte'an; ve ki e too na e *nda ja ye lôñeban asu Nti ja ye bete duma dé a étôto'o jé nya ôyabe yôp e mesi mese; ajô te ma zu bo ngômesan asu dé. Nalé ate David a nga kômesan abui, éyoñ a ngenane te wu.

⁶ Ane David a nga loone mone wé Solômon a bendé nye na a lôñe Nti, Zambe ya Israél *nda.

⁷ David a nga jô Solômon na: A mone wom, me nga bili nkômban ya lôñe *nda asu jôé Nti e Zambe wom.

⁸ Ve Nti a nga kobô me na: Ô kuliya abui metyi a bo fe bita bi ne ngu; woo ye ke lôñe *nda asu jôé dam amu ô sôéya abui metyi si ôsu viam.

⁹ Tame yen mon a ye bialé be wo, a ye bo e môt a bili awo'on, amu ma ye ve nye awo'on éyoñe ma ye kôté nye e be besiñe bé ba bômane nye; amu jôé dé da ye bo na Solômon, a ma ye ve Israél *mvo'é a évôvoé melu ya ényiñe jé.

¹⁰ E nye a ye lôñe *nda asu jôé dam. A ye bo e mone wom, a ma ma ye bo nye ésaa; a ma ye yemete éto njôane jé Israél été nnôm éto.

¹¹ Ajô te éyoñe ji, a mone wom, Nti a tabe'e be wo, éyoñe te e mame môé ma ye ke ôsu a éyoñe te wo ye lôñe ndaa Nti e Zambe wôé, aval a nga jô e mfa'a wôé!

¹² Nti Emien a kañese'e ve wo ñyemane ya yeme wôk nalé fe atyeñ, Emien a va'a wo mebendé mé wo yiane kalan Israél asu ya ba'ale metiñ me Nti e Zambe wôé!

¹³ Eyoñe te e mame môé ma ye ke ôsu, nge wo bo memvinda a minjôane Nti a nga bendé Môze asu Israél. Bo'o ngu a ayo'o *nlem, te ko woñ nge fô'ôban.

¹⁴ Abime biôme di nde me maneya kômesan a abime ngule dam asu ndaa Nti: betalañ be or toyini ntet, betalañ be argent akutu wua. Mfa'a mvot a étyé bi ne abui abim be se nguleya vek. Me kômesaneya fe bilé a mekak, wo ye beta beté bilé bife a meko'o mefe.

¹⁵ O bili abui bebo bisaé: beba *mekok, bôt ba yeme kpwele biôm e *mekok a e bilé, a bôt be ne mintyetyeñ e mboone biôm mevale mese.

¹⁶ Or, argent, mvot a étyé bi ne tek'alañé. Tebe'e tetele a bo ane fam, a Nti Emien a tabe'e be wo!

¹⁷ Ane David a nga bendé bivete bise ya Israél na be volô mone wé Solômon:

¹⁸ ye Nti, e Zambe wônan, a nji bo be mia, a ye a nji ve mia awo'on meku'u mese? Amu a nga ve bôt be too *si nyô e mo mam, a si éte é ntoo éjôé Nti a ji e bôte bé si.

¹⁹ Ajô te ke'ane ñhe minleme mienan a minsisime mienane na mi jeñe Nti, e Zambe wônan; kôla'ane si mi lôñ e Zambe a too étaba'a é n'étyi, éyoñe te mia ye soo éwolo élate Nti a biôm bi ne ntelan étyi asu Zambe e *nda ja ye lôñeban a jôé Nti.