1 Minkte 21 - Kalate Zambe Nnomo a Mfefe Mfefé Nkôñelan

Elañe bôt a awu bim

¹ Ane *satan a nga ke Israél e ngame yat a tindi David na a lañ Israél.

² David a nga jô Yôab a bivete y'ayoñe na: Kela lañan Israél, ataté Birséba a kui Dañ, a mi kate ma me yem e tañe bôt be né.

³ Yôab a nga yalane na: Nti a bo'o bôte bé be dañe bo abui tañe biyoñe ntet! A njô bôt, e masa wom, ye bese be nji bo bebo bisaé be masa wom? V'amu jé e masa wom a sili jame te? Amu jé Israél a ye be'e mekua'

⁴ Ve nkobô njô bôt ô nga dañe wu Yôab, ajô te Yôab a nga ke a wulu e Israél ase; mvus éte a nga bulan e Yérusalém.

⁵ Nde Yôab a nga kalane David e tañe bôt a nga mane lañ; Israél ase a nga bili bôte mewosan milione jia a ntete toyini; e Yuda, be nga too bôte mewosan toyini mintete minyin a mewôme zamgbwa.

⁶ Ve a nji lañe Belévit nge bôte ya Bényamin, amu woñ ô nga bi Yôab amu abendé njô bôt.

⁷ Zambe a nga wô'ô abendé te *abé, nde a nga bibi Israél.

⁸ Nde David a nga jô Zambe na me boya *abé e n'anen nde e ne nlañane bôt! Eyoñe ji kañese'e jamé ékobe mbo ésaé wôé, amu me nga bo ane nyô a ne fe'e momo!

⁹ Nde a nga kobô Gad ñyene mame David na:

¹⁰ Kele jô David na: Avale di nde Nti a jô na: Ma liti wo bibubua bilaa; tobe jia, a ma ye kuli je be wo.

¹¹ Ane Gad a nga kui be David a jô nye na: Avale di nde Nti a jô na:

¹² kañese'e jame da: nge mfumbale zaé tañe mimbu mila, nge ébôm ôsu besiñe bôé tañe ngon éla, nkpwaté mekône besiñe bôé ô nambe'e wo, nge na tañe melu mela, Nti a ye bôme si jôé a e nkpwaté mekône wé éyoñ a ye lôme éngele ya jian a mialane bim e si ése ya Israél? Fasek a kate ma e jam ma yiane ke yalan e môt a lôme ma.

¹³ Ane David a nga yalane Gad na: Me ne e beta ôlun été! A ne mvaé me ku e mo me Nti été amu mvame jé é n'anen abui; ve me bo'o te ku e mo me bôt!

¹⁴ Nalé Nti a nga bo na bim a dumen Israél été, a bôte toyini mewôme zamgbwale ya Israél be nga wu.

¹⁵ Zambe a nga lôm éngele e Yérusalém na a tyame nye; e zañe ntyamane Yérusalém, nde Nti a nga fombô a jôbane mbia jam ate. A nga jô éngele ntyame tisone na: Tebe'e! Bula'ane wo wôé mvus éyoñe ji. Engele Nti a nga tele bebé e nseñe Ornan, mone Yébuzieñ.

¹⁶ Nde David a nga bete mis a yene éngele Nti a tele e zañe si a yôp, nsoé nkpwaté mekône wé ô too nye wo, ô too Yérusalém e ngame yat. Nde David a bemvendé, minkuta e nyô, be nga ku mesu me butu si.

¹⁷ Ane David a nga jô Zambe na: Ye sa ma me nga jô na be lañe bôt? Ma me nga bo *abé a ma me nga bo e jam é n'abé; ve bôte ba be nga bo jé? A Nti, e Zambe wom, e wo wôé ô sila'ane ñhe e nyôle jam a e *nda bôte jam, ve ô bo'o te kut ébubua e be bôte bôé!

¹⁸ éngele Nti a nga jô Gad na kobô'ô David, nalé ate a ye bet a lôñe Nti ata'a metuna'a e vôme Ornan, mone Yebuzieñ, a wô'ô tya'a nlisi.

¹⁹ Ane David a nga bet aval'ane nkobô Gad a nga kobô e jôé Nti ô mbe.

²⁰ Ornan a nga kôñelan a yen éngele Nti. Nde ba be bobefame bé benyin be nga sobô; Ornan a mbe a tya'a nlisi.

²¹ Eyoñe David a nga kui e fefele Ornan, Ornan a nga wua dis a yene David, nde a nga kôlô e vôm ba tya'a nlisi a kute meboñe si ôsu be David asu é butu si.

²² Ornan a nga jô David na: Va'a ma e vôm be wô'ô tya'a nlisi nyô, me lôñe Nti ata'a metuna'a, va'a ma vôm ate mvol a tañe moné vôm ate a yiane kui, nalé ate ébubua ôkon ja ye kôlô be bôt.

²³ Ornan a nga yalane David na: Nyoñe je a masa wom njô bôt a bo je e jam wo ye yene mvaé; ma ve fe beyôme benyak asu mimvean ba di'i ngumba, mintoñ asu nja'a, a nlisi asu mveane ya mefup, ma ve biôm bite bise.

²⁴ Ve njô bôt David a nga jô Ornan na: Momo! Ma zu kuse vôm ate avale da yian, mvol a tañe moné jé, amu ma ye bo te soo Nti e jôm é n'éjôé, a ve mvean wo di'ibane ngumba ô too teke kui tañ!

²⁵ Ajô te David a nga ve Ornan or a too adit bifas mintete misaman asu vôme ya lôñe ata'a metuna'a.

²⁶ Nde David a nga lôñe Nti ata'a metuna'a vôm ate a ve mimvean ba di'i ngumba a mi ya nlatane ngbwa. A nga loone Nti, a Nti a nga yalane nye amu nduan é nga so yôp a suan ata'a metuna'a mvean ba di'i ngumba.

²⁷ Eyoñe te Nti a nga kobô éngele, nye ve some nkpwaté mekône wé abam.

²⁸ Melu mete, éyoñ David a yeneya na Nti a nga yalane nye e vôme Ornan mone Yébuzieñ a tya'a nlisi, nde a nga ve metuna'a vôm ate.

²⁹ Ve Tabernakel Nti, Nyô Môze a nga lôñ e *nkôte si, a ata'a metuna'a asu mimvean ba di'i ngumba, bi mbe éto y'ékôndô'ô yôp é ne Gabaoñ.

³⁰ Ve David a nji bo nguleya ke wé na a sili nkômbane Zambe, amu *nlem ô nga tyele nye yôp amu nkpwaté mekôn éngele Nti.