1 Minkte 20 - Kalate Zambe Nnomo a Mfefe Mfefé Nkôñelan

David a nyoñe tisone Raba 2 S 11:1-12; 26-31; Sam 21:9 akk

¹ Eyoñe mbu ja tôñe valé, nje é ne ji bejô bôt ba ke bita, Yôab, a too nlô éwôlô nsamba mewosan, a nga kôlô si a ke ndamane si Beamônite a dili Raba bita. Ve David a nga li'i e Yérusalém. Eyoñe Yôab a nyoñeya a mane tyame Raba,

² nde David a nga nyoñ ékat é nga too e nlô *zambe Beamônite milkom. Be nga yene na ékate or te é mbe adit a lôte kili mewôm mela, ako'o e n'édima e too f'été, be nga jalé ékate te e nlô David. Be nga nyoñe fe abui biôme ya nsa e tison éte.

³ David a nga kee e bôt be nga too été minkôm a lôme be be ke be bo ngule bisaé ane nsalane bilé, beba *mekok nge besale ntya'a. Avale te fe a nga bo e bitisone bise ya Beamônite. Mvus éte nje a nga bulan e Yérusalém a e nkane bita wé ôse.

David a wosane Befilisteñ

⁴ Eyoñe mam mete me maneya, Israél a Befilisteñ be nga bo bita e Gézér. Eyoñe te nje Sibekayi, mone Hukatite, a nga wôé Sipayi, wua ya bone Berefayim; ane Befilisteñ be nga silibane si e bita bite.

⁵ Mewosan me nga beta taté e zañ Israél a Befilisteñ. Elhanañ, e mon Yahir, a nga wôé monyañe Gôliat jôé na Lami ya Gat, nyô a nga bili akoñ, ntyen ô too ane mbôbé betiñe biyé.

⁶ Mewosan mefe me nga boban e Gat. Ayabe môt é nga too valé é bili anyu asaman e wo ôse a abo ése, anyu ése é mbe nye mewôm menyin a anyiin, a too fe môte ya Rafa.

⁷ Nde a nga té Israél bita, a Yônatan e mone Siméa, monyañe David, a nga wôé nye.

⁸ Bôte bete be nga so e Rafa a e Gat. Be nga ku e mo me David a e mo bebo bisaé bé.